Surbung Tlang Thuthang December 15, 2008

December 15th, 2008.

Zimbabwe ramih tihri natnak nasazet thlengcun zia umlam a panthei hrih cuangloih mithi zatcu 792 an kimzo, WHO cun Zimbabwe ramih tihri natnak cu a rangthei bikih ti cimih zanglo asilen mitampiin an thihphah vivo ding tiah ansim, himi thuah Zimbabwe Information Minister Sikhanyiso Ndlovu cun an ramih tihri natnak thlengcu British in Biological Chemical ralthuam hmangih beihnak asi ati,
Tuihlan khalah Zimbabwe President Robert Mugabe khalin Europe rampawl lakihsin Cholera hmangin an ramcu siim tumtu anum tiah a rak simzo, President Mugabe cun an ramih tihri natnak cu kandonehzo tiah asimnan aid worker pawlcun tihri natnak hi a lengrero laiih thlaziat sung a daihding tihi simtheih asi hrihlo tiah an sim, British leh Europe ram hrekkhat pawl leh African ram hrekkhat pawlcun Zimbabwe Presidnet Mugabe cu bangter dingah an duhih South African Anglican Bishop Pretoria Seaka tlacun kum zabi 21- nak Hitler ti rori in asim….

**** Asia ramlian pathum Japan, China leh South Korea hotupawl cun leitlunih sumpai tlasia tukleh boruak hlumcaktuk kilkhawi danding reltlang nak annei, Hithu reltlannak Japan ram Tokyo khawpi ih neihmi ahhin Japan Prime Minister Taro Aso, Chinese Primier Wen Jabao leh South korea President Lee Myung-bak pawlhin ram inn hnen sumdawn tawnawk naktha leh sumpai Currency thlengawk danding khal anrel tlangcih,
Tokyo ih Japan cozah hnattuan hotu dangpawl khalin tui ramhruaitupawl ih biakawk nakcu Japan leh a ram inn hnenpawl rualrem awknak leh laicin awknak ttha a suah sinsin ter an beisei, tuittum hi ramdangmi telloih anmahte an biakawk vawikhat nak asi…

**** British Royal Marines minung pali cu Afghanistan ramih Taleban Tapungpawlih Bomb puah miah anthi, hi bomb puakhi tui tlawngkai ninga ahkhan asi, British Prime Minister Gordon Brown cu Afghanistan ah fehin hi ralkap thipawlcu upa nak a pe, Prime minister Gordon Brown cun hiralkap thipawl cu British ram hrangah an nunnak anpe ih Britain ram leilung leh mipi in kan hngilh dahlo ding ati,

Prime Minister Gordon Brown cun Bastion Camp ralkap pawlih hmaiah thusimin Afghanistan ramih nanhna ttuan ruangah Britain ramleh a mipi kanhim ih Britain ramhin a lo upatin a lo suangzet asi ati, hi Bomb puahnak hmunhi Helmand Province ih Sangin kiangah asiih kum 2001 ihsin Afghanistan ram ahhin British ralkap hi 132 anthih nak asi thlang, Cuihnu ah Prime Minister Gordon brown cun Kabul khawpi panin Afghanistan President Hamid Karzai a kawmcih….

**** United State leh Europe ramih Drug Cocaine tamzet tawllut ttheutu Nortedelvalle hotu hlun Montoys Dondiego cu US Drug Enforcement Administration kutah pek asizoih cumi hnuah US ralkap vanzamin Miami thlenpi asiih, tuisun tlawngkai nikhatah Court ah hruai asiding, a mahhi Drug tawlru , mithat, sun eiru, leh thildang sualnak point 12 neiah puh asi, FBI pawlcun hipa hi Left wing tapungpawl leh Right wing Paramillitary Group pawlin an bawm tiah ansim, himipa an kaihhi Colombia cozah hrangah hlawhtlin nak nasa zet asi….

Khuang Lian Sum.

Subject: Re: -[Rihli]- Surbung Tlang Thuthang
To: Rihli@yahoogroups. com
Date: Saturday, 13 December, 2008, 11:51 PM

December 13th, 2008.

Mizansunah Belgium Police pawlin tapung misual minung 14 ankaiih  himi sualpawl hin Britist Prime Minister Gordon Brown leh European Union hruaitupawl thihcilh antum tiah ansim, police pawlin ansimnakah hi misual minung 14 pawlhin Belgium khawpi Brussels ih european Union hruaitupawl tawnkhawm awknakah thihcilh Bomb tipuah antumih, Hi anmi kaihmi pali cu Belgium mi an siih himi palilakah pahnih cu Pakistan leh Afghanistan ih hungum tuinaite ih Belgium ramih ra tlungmi ansi tiah ansim, hipawlih thilti dan ah ziangpawlin anfial tileh ziangruangah timi pawl thuhla pawimawhhi zinzawi rero lai asi…

**** Taiwan President hlun Chen sui Bian kum 57 micu Taiwan Court cun thubuai a awrhter felzo, Chen sui Bian hi sumpai i ruleh thupru ih puh asiih tuikan dungthla Nov, 12 niih sin thawnginn ah khum asi, Chen Sui Bian cun himi an puhnak thupawl cu thildiklo puhnak asiih China leh Taiwan ram pahnih pehtlaih awknak duhlotu asi ruangah Taiwan President thar Ma Ying-jeou in tihmin siat a duh ruangah a phuahcawpmi asi ati,Taiwan President thar Ma Ying- Jeou hi China thawi pehtlaih awk duhtu asi, Chen Sui Bian hi tuikum May thlaha khan Taiwan President ihsin a tla ih cuhnu ah China leh Taiwan ram pahnih pehtlaih awknak thuhi a dozet tu asiih, Curuangah China leh Taiwan cun Chen Sui Bian hi china dodaltu asi ruangah khal thubuai awrter bet an tum…

**** US cozah cun India ramih thilsual tuahttheutu Tapung misual pawl Pakistan ramsungih umpawl cu khohkhahzet leh nazetih an tlunih thurel dingah Pakistan cozah a nawrbetsal, US Deputy Seretary of State John Negroponte cun pakistan ramah fehin Pakistan ramsungih umhmun khuar Tapung Lashker-e-Taiba, Jamaat-ud- Dawa, Jaish-e-Mahammad leh Al Rashid Trust pawlcu cangvai theilo dingih tuahdingah Pakistan cozah thunei tupawl cu a ngen, The Dawn thuthangca in a ngannakah John Negroponte in Pakistan cozah hnenih Tapung misual list a pekmi sungah mitampiin an theihdah lemlomi Pasban Ahle-e-Hadith pawlih hminkhal a telve,John Negroponte cun himi sualpawlhi Pakistan leh India in lungrual tei ando cimih zamranglo asiah cun an ram pahnih hrangah thilttih nungbik asi ati, US cozah cun Tapung misual pawl nuai cimit nakdingah cun India leh Pakistan cu a bawm vivo ding ati, Culaiah Pakistan Foreign Minister cun misualpawl cu theitawkin a zingzawi reroih India cu a
thutheihmi leh a hmuhmi Pakistan hnenih simduhlo ah a puh….

***** Iran President Mahmoud Ahmadinejad cun Israel cu East mildle ram tibuaitu leh Arab rampawl lungrualnak tisetuah a puhih , leilungtlunih terrorist an umnakkhal Israel leh America ruangah asi ati, Iran cun Israel cu leitlunram ihsi nuaihlo a tumnak cu a phalo ih, himihi Iran ram duhdanlawng siloin Arab ram zate leh leitlun ramtampi ih duhdan asi ati,

Relzovekin Israel leh Iran hngirhngo awknak hi a rehthei dahloih tuikan dung thlathum reizo ahkhan Israel cun Iran ralthuam hmunpi kapse tumin US President Bush kha arak rawnih asinan Israel in Iran a kah asilen Iranin Afghanistan leh Iraq ramih US ralkap umnak hmunpi pawl kahve a tum ruangah Bush cun Israel cu Iran kaplo dingin a dilnak asi Israel cun Iran hnenah Ralkap cahnak hmanmai locu hrildingdang kanneilo tiah araksimzo,.. ..

**** Ukrainen ram lawngpi MV Faina Tank 33 Grenade Rocket Louncher tampi phurtu Kenya ram panlai Somalia lawngrukhmang misualpawlin kandung Sept,24 ih ankaih micu lawngneitu Company leh a rutu misualpawl cu December thlacem zawngah an berem awzo nan a rutu misualpawlin lungkim lonak anneisalih tutiang tlensuakthei asihrihlo, Himi rualin tuikan dungthlaih lawngrukhmang misualpawlin ankaihmi thotho Saudia Arabia lawngpi Oil tanker Sirius Star petrol $ million 100 man phurtu khal a netupawl leh a rutu misual rualpawlcu anremaw theiziknan tuah cun anbiakawk nakkhal cawlhsansal asi,
Relzo vekin Somalia ramhi rambuai kum 17 lenglo cozah ttha mumal um theilo asi ruangah a rammipi pawl harsa leh retheizet ansiih misual khal antamzet, Curuangah Somalia tipithuanthum ahhin lawngrukhmang misual tampi anumih khaultlawng lawngpawlhi anru ringringih a tlensuaknak dingah pawisa $$ tamzetzet an ngenttheu,hi misualpawl hi ralthuamhriamnam thazetzet anneih ve raungah cozah khalin duhvekin a titheicelo, US, Russia, UK, pawlleh ramdangdangin himi sualpawl dodingleh kildingahhin Lawngralkap Navy leh raldonak lawng khal a kuatrero, Hi lawngrukhmang misualpawlhin Gulf of Aden ah lawng 14 leh a hnattuantu minung 208 an hrenglai…

Khuang Lian Sum..

— On Sat, 13/12/08, pa sum <sumfunglen@ yahoo. co.in> wrote:

From: pa sum <sumfunglen@ yahoo. co.in>
Subject: Re: -[Rihli]- Surbung Tlang Thuthang
To: Rihli@yahoogroups. com
Date: Saturday, 13 December, 2008, 1:00 AM

December 12/ 2008.

Mizanah Iraq ram Kirkuk khawpi ih restauran pakhatah thihcilh Bomb a puakih minung 50 lenglo anthi ih minung 100 lenglo in hriamhma anpu,Hi hriamhma pupawl hi Kirkuk sizung innpi ah ret ansi ih an lakah bese zetzet an um ruangah mithi an umbet vivo zum asi,hi Bomb puahnak hmunah hin Kurdish official pawlleh Arab traibal hruaitu pawlin lunch an i tlanglai asiih, Bomb paitu hin restauran hmaiah a Car park ta in restauran sungah a bomb cu palutin mipi tamnak laifangah a tipuakih cu ruangah mithi leh hriamhmapu an tam phahnak asi, Nikum khalah himi restauran ah hin Car bomb tipuakzo asiih minung 25 anrak thizo,Kirkuk ahhin Iraqi, Kurdish, Arab, leh Turkmen pawlhi ankarlak ah buainak a suak ringring ih minung tampi in anthihphah zo,

**** Russia ram Kirovsk thil laihsuahnak khurpi cu a puakih minung 9 anthiih minung 3 cu an umnak hmun theilo in anhlo, Hi mine hi OAO Apatit Company Russia ramih Fertilizer tuahsuaktu tumzet asiih, himi a puahnak sanhi Russia cozah in a zawihnit tum rerolai….

**** Poland ram Poznan ih UN climate Conference ih biakawknak neihlai rero miah US President Candidate hlun John kerry cun leilungtlun boruaksia hlumcaktuk tuahthat dingleh dodingah US cun theitawp suahin hma a hruai vivo ding tiah asim,Hi tawnkhawm awknak ahhin European Union hruaitu pawlkhalin leilungtlun boruaksia hlumcaktuk mihi tuahttha leh dotlang dingin European Union rampawl lungrual zetih ttan antum thu ansim,

Kum 2020 ahcun European Union cun carbon Emission peksuakzat cu za ah 20% ih timal nakding 20-20-20′ packge cu neithei dingah zumnak an nei, himi hrangdingah euro million 200 packge khal tuahsuakthei antum, EU cun a tumtah nakah 2020 ahcun carbon peksuahhi za ah 20% ih timalin Renewable Energy Sorce khal za ah 20% ih titamsin atum, himi hi EU in rem ati khal asilen European Parliament ih pawmpi nak a lakhmaisa a ttul, Hi conference ahhin John Kerry hi President Elect Obama ih aiawh ih telmi asi….

**** Bank of America Corporation cun sumpai dinhmunih tlaksiat nak nasazet a tawn ruangah kumthun sungah a hnattuantu pawl minung 30,000 leh 35,000 karlak cu banter hai ansiding tiah asim, himi sumpai dinhmunih harsat nak a tawnmiih a tuahtheu mi thilumsun asi ati, Sumpai dinhmunin tthatlam a pancuanglo asiah cun hnattuantuhi himi hnakih tamkhal banter asi theitiah ansim,
Hi Company Merill&co hi tuah hnattuantu minung 3,08,000 hrawng annei Bank of America hi US ahcun Bank tthabik ih ruah asi,Tui sumpai tlase zet mihin US economy khal tamzetin a tisia….

***** India ram External Affairs Minister Pranab Mukherjee cun Mumbai kawpi siimtu terrorist minu 10 pawlcu Pakistan ramsungih Lashker-e-Toiba pawlih Training pekmi ansi ati, Cumi laiah Pakistan cun India in himithu ah a thutheimi hi fiangfai zetin theihnak aneilo ih Evidence felfai zet anei asiah cun pakistan hnenah pedingin a ngen,

Pakistan foreign Minister Shah Mahmoud Qureshi cun India cozah cu Evidence an neih mi thuhi Pakistan hnenih peduhlo leh simduhlo ah a puhve,relzo vekin Mumbai khawpi buainak rapthlak zet a suah ah khan External Affairs minister Pranab Mukhrejee cun Mumbai siimtu terrorist Pakistan ramsungih Camp neipawlcu India in ralkap cahnak hmangin a beilo dingti hi simtheih asilo ih a ram leilung neitu khalin India ih sanlet nak hi an maiduhhril mi ah an pawmthiam a ttul ding tiah araksimzo, ih India leh Pakistan ram pahnih biakawk nak fehlai khal bansan a siih , tuittumah hin Pakistan cun India cu tarmitdum bunih thil a zoh asi ati,

Himi lakah Pakistan cun Lashker-e- Toiba tanpi zettu ih a puhmi Jamaat-ud-Dawa zungiin office a kharsakih an party hotu minung 7 khal house arrest in a ret ih midang 122 khal ramdang fehthei lodingin a hrentar hai,UN security in Jamaat-ud-Dawa pawlcu terrorist cazinih a ret ruangah Pakistan khalin UNSC duhdan vekih thilti lo cu hrildingdang aneilo, Pakistan Prime minister Adviser on Interior Affiars Rehman Malik cun UNSC in Jamaat-ud- dawa pawl terrorist ih a puangcu Pakistan khalihn a pawmpi ve tiah a sim….

Khuang Lian Sum.

— On Fri, 12/12/08, pa sum <sumfunglen@ yahoo. co.in> wrote:

From: pa sum <sumfunglen@ yahoo. co.in>
Subject: Re: -[Rihli]- Surbung Tlang Thuthang
To: Rihli@yahoogroups. com
Date: Friday, 12 December, 2008, 5:58 AM
December 11th, 2008.

US President thar Barack Obama cun lllinois Governor Rod Blagojevich cu bangdingin thu a pe, Kantheih zovekin lllinois Governor hi US President hriltlinmi Barack Obama ih Senate seat lawnglak zuarruk tumah puh ih kaih asiih Asinan bail in suahsal asi, US President thar Obama hi President ih hriltlin asiih sin ni 12 nakah lllinois Senator sinak hi a bansanih, tu ah hin a hmun awl luahtu dingah thuhla ngainuamlo zet a umhicu a mah khalin nuamlo a tithu asim, Obama ih ruahdan ahcun Senate ih a hmun ruak luahtu dingcu lllinois rorelnakin a hril dingih, cumi a silo hmanah dandiktakin ziangtinkim felfai zetih tuah a duhthu asim, Blagojevich hi tuihlan ihsin nawhthuh sum laru ih puhnak ruangah vawitampi rak zawihnit rero zomi asiih tuittumah dan pahbal thu awrhter sal bet asi…

***** Mizoram ih Congress Legislature Party hotu Pu Lal Than Hawla cu mizansunah Chief Minister ih lakluh asi, Chief Minister lakluh rualah hin Cabinet Minister pahnih Pu R Lal Zir Liana leh Pu H Lian sailoa cu Governor Lt General MM Lakhera in ramhna tuandingah leh cozah thuruk humhim thadingah rinumnak thutiam a lakterhai,

{ Pu Lal Than Hawla hi Mizoram Chief Minister dingah a vawili lakluh nak asi, Mizoram Chief Minister hi vawithum a rakttuanzo,1984, 1989,leh 1993 ahkhan CM a rak sizo, Pu Lal Than Hawla hi 1940 May 19 ah a suakih Apa hi Pu Hmar Tawng Phunga asi,A Nupi hi Pi Lal Riliani asih fapa 1 leh fanu pathum annei, thiamnak lamah BA asi, 1978, 1979, 1984, 1987, 1989, 1993, 2003, leh 2008 ahhin MLA ih hriltlin asi, tuikum Mizoram MLA hril awknak ah hin Serchhip constituency leh South Tuipui Constituency ihsin hriltlin veve asi….

***** Pakistan leh India ramri Pakistan ramsungih um Kashmir ih umhmun khuar pawlkom pakhat Jamaat-ud-Dawa pawlcu United Nations cun Tapung misual hmin cazin sungih a rettel thu a pungzo, Culaiah hi Jamaat-ud- Dawa party hruaitu Maulana Abdul Aziz Alvi cun thiamthu reltumin theitawp a suah rerove, UN in hiti vekin in ruat khalhai sehla kan thiltum mileh kan hnattuan cu kan fehpi vivo ko ding ati, Cui tlunah kanthilti dingmi leh kanthil tummi ah UN Security council hnenih simleh an siannak lakhmaisak hi thil ttulah kan ruatlo ih kandildah fawnlo ding ati,

Hi Jamaat-ud-Dawa pawlhi tui kandung India ram Mumbai buainak ih minung 200 zikte thiih minung 300 lenglo hriamhma tuarnak thuah hnamhnawih aw telve ih puh ansiih, Asinan anmah lamcun Mumbai buainak thuah an tello thuleh zianghman an theihpi lothu an simve, Hi Jamaat-ud-Dawa hotupa Maulane Abdul Aziz Alvi cun Mumbai buainakih an pawl hnamhnawih awknak an neiti thu theih fiangnak a um asiah cun kanthil tisual miah kanmah leh kan mah zo fiangfai awkhi kan hrehlo asi ati,

UN cun Lashkar-e- Toiba hotu pali khal Tapung misual cazin sungah a retcihzoih cumi pawl sungah himipawl dinsuaktu Hafiz Mohammed Sajeed khal atel, Culaiah Pakistan Prime Minister Yousuf Raza Gilani cun Lashkar-e-Toiba hotupa Lakhvi leh biakpawh awknak lam mithiam Zarar Shah cu tuinai ah kaih ansizo tiah asim,

Defence Minister Chaughry Ahmed Mukhtar khalin Jaish-e-Mahammed dintu Maulana Masood Azhar khal kaih ngahzo asi tiah asim, Pakistan cozah cun Jamaat-ud-Dawa cu United Nations in misual asi tiih a puanfel asi ahcun a ttul danvekin hipawlih tlunah thutthennak a tuah dingtiah a rak puangzo,
UN ih Pakistan ambassdor Abdullah Hussain Haroo cun UN security council ih thusuah mi hmuahhmuah cu UN duhdanin pakistan cun a tuah vivo koding tiah asim….

India ram Parliament Session neih rero laimiah Home Minister Pu P Chidambaram cun tuisunah khan Mumbai khawpi buainak suahnaksan thu a rel fiangih, ramsung humhim nakding thuah danthar tuah tum asi thukhal asim bet, hi ram humhim nak thu ih danthar tuahnak dingah hin thil felfailo umleh rinhlel ummi thukhal phorhsuah thluh asi ding ati, National Investigative Agency dinnak ding Bill cu tui tui Parliament session neihlai rero miah pass tum asi ati,

Home Minister cun tuittum Mumbai khawpi buainak rapthlak zet suahnak cu Pakistan ihsin puaksuak mi thil asi tikhal India hin a thei fiangzo ati, Commando ralkap pawlkhal Training thazetih pek vivo leh Intelligence pawlkhal tthezetih thuam ansi dingih tipi thuanthum kap pawlkhal khohkhah zetin kilvennak tuah vivo asi ding ati, hithu hi Mumbai khawpi buainak a thlenhnuaih cozah lamih si thusuak vawikhat nak asi,

Opposition Party hotu LK Advani khalin Mumbai buainak rapthlak zetcu buainak zaran men asiloih Pakistan ihsin irh suakmi thil asi ruangah hi buainak tisuaktu cu a hrampi tiang dawi vivo ih hawlsuak a ttul asi ati…

Khuang Lian Sum.

— On Wed, 10/12/08, pa sum <sumfunglen@ yahoo. co.in> wrote:

From: pa sum <sumfunglen@ yahoo. co.in>
Subject: -[Rihli]- Surbung Tlang Thuthang
To: Rihli@yahoogroups. com
Date: Wednesday, 10 December, 2008, 10:58 PM

December 10th,2008,

Kantheih zovekin India ram Mizoram State Constituency 40 umnak Mizoram Legislative Assembly hrilawk nakih MLA seat 32 neitu Pu Lal Than Hawla ih kaihhruai Indian National Congress (INC) MLA thar pawlcu tuisunah Mizoram khawpi Aizawl Congress Bhavan ah tawnkhawm awknak an neiih Congress Legistature Party hruaitu dingah Party President leh Chief Minister hlun Pu Lal Than Hawla cu lungrual takin an hriltling, himi Congress Legislature Party meeting ahhin Pu Lal Than Hawla ih kaihhruai cozahthar lakluh dingcu thaisun nazi 2:30 siding in anrelcat,

Himi hnuah Pu Lal Than Hawla leh MLA hriltlin mi pawlcun Raj Bhawan ah Governor Lt General MM Lakhera va hmucihin Congress Lagislature party cun Pu Lal Than Hawla Chief Minister ih an hril thuleh Pu Lal Than Hawla ih kaihhruai Congrees in cozahnak an tuahthei thu khal anvasimcih,Thaisun ahhin Chief Minister Pu Lal Than Hawla cun Minister dang ziangmawzat a lakluh bet zum asi, Minister dang lakluh thuah hin Chief Minister ih thuthu a si ruangah minister ziangzat a lalut ding tileh zopawl an siding ticu theihthei asi hrihlo,

Mizoram State Legislative Assembly vawi 5 nak MNF cozah cu tuithla ni riat thawhtan niah khan Mizoram Governor Lt Gen, MM Lakhera cun a tthiatbalzo, Assembly tthiatbal nakthupekhi Vote siarthluh veten Governor hin a hmin ngancihin thu a suahcih, Asi nan ram danpi vekin Speaker dang hrilhlan sungcu Speaker hlunin a hna a ttuansunzawn hrihding, asinan mipiin MLA thar an hriltlin zoruangah MLA hlunpawlcu himi rualin an can a cemcih, Himi hi MLA thar pawlin Mizoram State Assembly vawi 6 nak an dinthei nakding asi…

**** Tuittum Delhi Assembly hrilawk nakah Chief Minister pi Sheila Dikshit ih kaihhruai Congress cu an caksal lala ruangah Pi Sheila Dikshit cu India ramih khawpi bik Delhi ih a vawithum nak Chief Minister asi sal lala ding, Tunai India ram State panga ih hrilawk nakah hin Congress hruaitu dangpawlkhal Pi Sheila Dikshit vekhi zohman an umlo, a mahhi kum 71 mi asiih Delhi ih Jesus and Mary School leh Miranda House ihsin zirsuakmi history ih MA degree neimi asi, A pasal hi Vinod Dikshit asiih IAS Officer asi, A pasal ihpa hi Union Minister leh Governor khal rakttuanzotu Uma Shankar Dikshit asi, Pi Sheila Dikshit hi pasal a neihhnu lawngah politics ih lutmi asi….

**** Tuinai India ram State panga Assembly hrilawk nakih cozahthar Chief Minister dingih ruahmi pawlcu,

Delhi——- ——— — Pi Sheila Dikshit.
Madhya Pradesh—– —- Shivraj Singh Chouhan.
Chhattigarh- ——— — Raman Singh.
Rajasthan— ——— — Ashok Gehlot.
Mizoram—– ——— — Pu Lal Than Hawla.

Hipawl hi Chief Minister dingih ruahmi ansi.

***** Tuizingah khan Delhi cu meirozam a tamtuk ruangah Vanzam zuangsuak ding 10 cu tikhawtlai ansi, himim ruangah Mumbai, Khajuraho, Patna,leh Agartala panih zuangding vanzam pawlkhal tikhawtlai thluh ansi…

****** Uttar Pradesh ih Firozabad ah bus pakhat a kangih minung 63 an kangthat ih minung 20 hrawngin hriamhma antuar, Dist, SP Navneet Kumar Rana in asimnakah hi Bus ahhin minung 80 hrawng anto ih Bus hi cakzetih a tlanlaiah a ke a puakih meisa kanghi a suak asi ati,Hi mithi pawlhi U,P State cozah cun Rs 100,000 tingkhat cio in tuarpi nak an pekdingthu khal a puangzoih hriamhma nadeuh tuarpawlhi Rs 5,000 cioih an tanpi dingthu khal ansim…..

****** Iraq ramih um British ralkappawl cu kumthar 2009 March thla ihsin hnuhkirsal ansiding tithu an ram Defence hotu pawlcun BBC ansim, Iraq ramih British ralkappawl umthei dingzat UN in a relcat nakah cun tuikum cemzawnghi asive nan thlathum hrawng umkhawtlai danding hi an tawlrel rerolaiih, Iraq ram ahhin British ralkap hi 4,100 hrawng an umlai, kumthar 2009 January thlah khin Iraq ramhi hrilawknak tuahding ansiih cumi tluangtei an tuahthei asilen March thla ihsin British ralkap pawlhi kawhtlungsal thawk ansi ding, Asi nan Iraq ralkap raldodan zirhtu Training petu ziangmawzat cu an tanhrih zum asi, Iraq ih British ralkap pawlhi Basra khawpi ah anumih Defence thupunagtu cun Basra khawpi boruak umdan khalin thatlam a pan vivo tiah a sim….

***** Britain ramih India mi sumdawng milianzet Lord Swraj Paul cu British rorelnak inn pakhat sawn British House of Lords Dy, Speaker ah ret asi, Amah hi Asia milakih himi dinhmun thleng hmaisa bik asi, British cozah ahhin Asia mipawl India sinak neipawlhi Minister raksizo khal an umhnuaihnizo, asinan Parliament kaihruaitu tiang thleng hicu an rak umdahlo, tui a sumdawnnak Company Caparo dintu leh neitu asiih 1996 ahkhan Lord sinak pek asiih 1983 ahkhan Padma Bhushan rakpek asi….

Khuang Lian Sum.

Comments

comments

Comments

%d bloggers like this: