Sunitha Khrishnan: Minung Zuarleinak ih Nuaisiat Tuartu le Dotu

sunitha-krishnan2

Thuanthu roling ahcun Phoenic (Finix) vate cu kum 500 sung a nundam hnu ah, vutcam ah cang thluh ko in a urkang aw ih, cumi vutcam lak ihsin a hung keuhsuak sal. Cuti’n kum 500 dang a nung lala ti a si. Cuvek thawn a bang aw deuh mi nun cu Sunitha Khrishnan ih nun ahhin hmuh a theih.

Amah Sunitha Khrishnan lala hi mi bur ih sualpi a rak tuartu a si. Asinan vutcam ih a cang zo mi a nun ihsin a hung dingsuak sal ih, minung zuarleinak dotu ah cang in, minung tampi runsuaktu ah a cang.

A liang par ih tthum aw mi hnattuan hi a khungkhai zet. A dinsuah mi pawlkom Prajawala cu zuar le hmuhsuam a tong mi nunau le nauhak thawng tampi runsuaktu le tundinsalnak tuahsaktu a si. Amah in “Sunitha Khrishnan: Anti-Trafficking Crusader” (Minung Zuarlei Donak Norsuaktu) timi hmin thawn blog a nei. A blog ahhin mi an runsuah dan thuhla pawl a tarlang hai.

Taktak ahcun a blog hi siar a ol lo. Ziangahtile nunau nauhak tete (kum li lawng si lai tiang in) an pa, paseu, unau, unau-seu le venghnen tivek pawl ih an sualpi thu tivek cu siarsuah a har zet mi an si hrimhrim. A blog ih a tarlang mi thuhla pawl vun siar tikah, daitei’ kan rak um men hi ningzakza a si thu mi a theihsuahter. A mal bik in minung zuarleinak ih rapthlakzia tal hi mipi hnenih theihternak tuah ding kan si.

India ahhin minung zuarleinak le nun siatsuahawknak hi a luar sinsin. Tthimnak ah, Nepal ram ih nunau pawl India ah hruai lut in an zuar. A buaithlak hleicenak cu zuar a tongtu pawl hi anmah rori ih an rinsan mi minung in an zuar ttheu mi hi a si. Zuar a tongtu pawl ih dinhmun hi sal dinhmun hnakin a bese sawn! Nupasinak lam ih a sualral bikbik thawn hmuhsuam an tuar ih, vei tampi cu nasa zet ih kutthlaknak khal a tel cih fawn. Curuangah thinlunglam le taksalam ih siatsuahnak nasa zet an tuar ttheu. Mi tampi in duhduh ih an soisat ttheu ruangah a netnak ahcun HIV/AIDS an ngah. Cutik ahcun hman an tlak nawn lo ti in an hnong ih, cawmhlawmtu nei nawn lo ah an cang ringring fawn.

Sunitha ih din mi “Prajawala” pawlkom cun zuartuartu pawl kha an runsuah hnu ah an nun tundinsalnak an tuah. Beunak inn an sak ih pumcawmnak hrangih an ttul mi thiamnak pawl zirnak ding hmun khal an sak. An innsang thawn tong aw thei ding khal in an tawlrel. A cancan ahcun nunau tampi cu phunhnam nunphung ih mualpho zo an si ruangah an innsang in an cohlang sal nawn lo. Cuvek can ah Prajawala cun an nun pumhlum hrangah ttuanvo a la ttheu. Nunau tthenkhat cu, misenpi lakih an kirsal theinak ding ah, Prajawala ih hnattuantu mipa tthenkhat in nupi ah an tthi. An runsuah mi lak ihsin natnak ruangih mithi an um can khal ah ruak vuinak hrangah ttuanvo an la. Hivek an ttuannak ah Prajawala hin dodalnak nasa zet a tong. Ziangahtile Indian nunphung thawn a kalh mi a um ttheu ruangah a si. Asinan Prajawala cun palik le dan kilhimtu pawlkom dangdang thawn ttang tlang in, sumhawlnak ih nupasinak hman hi cawl lo bang lo in a do.

Prajawala le Sunitha hin an tuahttuannak ruangah sunlawihnak tampi an ngah zo. Minung zuarleinak dotu le runsuaktu phunphun in an ngaihven mi an si. Cozah tiang khal in Prajwala le Sunitha ih ttong hi a ngai.

Sunitha ih blog cu http://sunithakrishnan.blogspot.in/ a si ih, va leng in a thuhla va siar ve awla na nun ah danglamnak pakhatkhat cu a um ko ding.

-Sianglianuk Kianghrol

(Visited 139 times, 1 visits today)

Comments

comments

Comments

%d bloggers like this: