Suahkeh Covo

August 8
Tlawngkai Nithum

Suahkeh Covo

Bible Siar Ding: John 1:6-13

Pathian ih faate an cannak cu leilung daan, minung ih thii le sa ih hrilnak in a si lo; Pathian Amah rori kha an Pa a si.
– John 1:13

Leilungpi cun ol-aizet in kannih cu Pathian ih fahniang pawl kan si, ti’n a sim thei men. Sihmansehla, cumi vek cu Pathian ih in sim daan cu a si lo. Pathian Ttongkam ih in simmi cu: Amah thawn Pa le fa karlak ih pehtlaih awknak naihzet an neihmi vek neih khi a si ih cumi cu hih kan leitlun milai tisa daan ih titheih rual a si lo. Sita bang sehla cu hih leitlun kan nunnak suahkeh tisa nunnak kha sualnak in borhhlawh bang sehla Amah thawn kan pehzom awknak a dawnkham ding a si.

Dungthluntu Johan in Thuthangtha Cabu a ngan tikah lei le van seemsuahtu a nung Pa Pathian thawn pehtlaih awknak kan neih theimi cu A Fapa Jesuh Khrih kan zumnak thawngin Pathian ih in pekmi a si. Bible in, “Mi tthen cun an cosang ih an zum; curuangah Pathian ih faate si theinak thu a pek” a ti (John 1:12).

Jesuh Khrih cu Pathian Fapa a si, ih rundamnak kan co theinak dingah lamzin pakhatte umsun a si. Cule sualnak ruangih a siatbal thluh zomi Pa Pathian thawn kan pehtlaih awknak kha a remttha saal theitu umsun khal a si.

Mi zo cio khal in hih thuhrisahcatnak cu an tuah hrimhrim a ttul. Kannih hi zumtu innsang Christian nu le pa ihsin suakmi tla kan si thei men, asinan zohman zumtu Christian si cia ih suak kan um lo. Kan nu le kan pa hnenih kan suah thlakin automatic in Christian kan si cia lo.

Zumtu in rundamnak thuthangtha hi mikip hnenih kan sim le kan zirh lo asile leitlun minung zohman in anmahte cun vancung Pathian ih fahniang ka si ti cosang thei dingin anmahte cun an zir thei dah lo ding.

Vancung ih a um kan Pa, Na Fapa neihsun Jesuh Khrih ka zumnak thawngin
Na fahniang ih i cosaan ruangah ka lungawi.

Khrih sungih hrin tharnak ka comi hi
tuni ah zo hnenahso ka hlawm thei ve pei?

@ Ava Pennington

(Visited 16 times, 1 visits today)

Comments

comments

Comments

%d bloggers like this: