Steve Jobs

- Asiangte, Champhai

Leitlun thuthang dangdang in Steve Job-ih a thih hnu khalah an cahmai pawl ah miropi a sizia thu hin hmun a luah nasa. Apple computer leh Apple company ihsin thil tuahsuah mi iPod, iPad, iTunes, Macintosh Computer tvp. pawl hi a mankhung ruangah kan Chin mi ṭhenkhat ramleng ih um tihlo cun kan hmeltheih tuk lo a bang.

Steve Job hi February 24, 1955 ah San Francisco, California, USA ah Speech Therapist, Joanne Simpson leh Political Science Lecturer Abdulfattah ‘John’ Jandali tei fa si dingin a rak piang. Sawnfa a si ruangah a pian hnu zarhkhat hrawngah farah cawmnak inn ah ret a si. Paul Job leh Clara Job te nupa in an fa ding an adopt ih, a hminah ‘Steven Job’ tin an phuah.  Duat takin leh duhdaw takin Paul leh Clara te nupa hin an kilkhawi i, amah hringtu nu leh pa ngaingai hi Steve Job kum 27 mi a si hnu lawngah a thei suak  hai a si.

A pa (a adopt tu) Paul hi mechanic a siihkj, Steve hi electronic thilri sia tuah dan le hman dan dangdang cu an garage(thilri leh motor retnak inn) sungah a zirh ṭheu, hi ruangah hin Steve-ih nun khalah nuam tihnak leh paihnak nasa tak a pe, electronic lam thil tuah ah a hrangah lamzin tamtak a awn awk phah a si. Cazir lampang cu a paih tuk lo, phun 4 a kai laiih sin ca zir dingih fial leh tur rero ṭul mi a si, asinan ca lamih a thinlung a pek ah cun thiam thei tak a si.

Steve Job hi Cupertino, California-ih tlawng kai ṭheu a si. Tlawng a kai lai ah hin Palo Alto hmunih Hewlett Packard hmunpi cu an ca zir mi bawm ding outing class nakah an va pal ṭheu. Hi ruangah hin computer lamah phurnak a nei so vivo ih, Apple company ih a rualpi Apple company dintu leh sulsutu lakih tel ve Steve Wozniak thawn hi hmunah hin sar aw in an ṭuan tlang ringring ta.

I think we’re having fun. I think our customers really like our products. And we’re always trying to do better. Steve Jobs

High School a ṭheh hnuah Reed College, Portland-ah kai zawmin, asinan rei hman a kai hlanah sum le pai neih loh ruangah kum 2 hnuah ah a ca zir cu bansan in college cu a suahsan. Himi hnu ah hin a rualpa Steve Wozniak thawn Homebrew Computer Club ah telve in Computer game tuahtu Atari Company hnuaiah video game design in hna an ṭuan.

Hi mi hnuah Steve job hi biaknak leh sakhuanakin a nun a luah nasat tuk ruangah a hna ṭuan hlawh tete khawlin, Biaknak dik hawl dingin a rualpi pawl thawn India ram lamah an tlawngih India ramah cun Buddhist biaknak thlunin a um.

A rualpa Wozniak thawn an ṭuannak Atari company hnuaiih ṭuan phahin an zir aw vivoih, Kum 1976 kumah Steven Wozniak cun amah tei a duan suah mi computer design cu Steve Job hnenah hmuhin Computer circuit board tuahnak company dinpi dingah a sawm riai. Cutin, April 1, 1976 ah Steve Job- tei Garage sungah Apple Computer Company dinin computer part dangdang remkhawm cawp cu an tuah suak, hi laiah hin thilri lei nak ding sumpai an nei lo tuk ruangah Steve Job hin a Volkswagen Bus leh a calculator pawl khal a zuar. Computer tuah cu an tui sawn ruangah circuit board tuah an tum mi cu ṭhulhin computer tuah lamah an her aw.

Himi tumih an computer tuah suah mi hi Apple I tin a hmin an bun ih, computer set khat hi dollar $ 666 in an zuar. Apple I cu Dollar 774,000 man lai an khawng suak thei. A hna kum ah Apple II cu hlawhtling zetin an tuah suak leh ih hi khal hi  Dollar $ Million 139 man lai an khawng suak lala. Cutin May, 1980 ah Apple III computer cu an tuahsuak lala ih asinan hi ṭumah hi cun an tum vekin an hlawhtling in an khawng ṭha lo, hlawhtling tuk lo hman sehla stock market-ih an company hming cuangih an pho lan awk nak hmaisa bik a si, sum le pai an lakluh leh tham mi khal dollar $ Billion a si thlang ih an zuamin hma khal an la nasa thlang.

Kum 1983 ah Steve Job cun cold drink Pepsi-Cola company dintu John Sculley cu an company, Apple ih CEO hna tuan dingin a sawm. John Sculley hin CEO hna a tuan hnuah hin  hlawhtling takin kum 1984 ah Macintosh computer cu an tuah suak, Mac an tuah hi a hlawh tlin tuk ruangah a hlanih an rak buaipi ṭheu Apple I,II,III etc cu an tuah nawn lo.

Hi ti tluang takih an feh rero laiah computer design leh duhzawng bang awk loh ruangah Steve Job cu Apple Board of Directors pawlin a sinak hrek khat an lak sak, hi company-ah Chairman si khal sehla a company share neih pawl cu a zuar thluh deuh thaw. A leh hnuah Apple cu suahsanin company dang NeXT Computers cu dinin hi company khal hi a lar nasa, asinan an thil tuah pawl a khun deuh ruang an khawng thei lo. Kum 1993 ah tla cun set 50,000 hrawng lawng an khawng thei. Hi vek a si ruangah hin Next Computers cun Computer lam cawlh sanin software lamah hma an la tan ih, internet hman zikih World Wide Web 1.0 (www) ngannak hmanrua Interface Builder cu tuah suakin a hnuah Unix Operating System an tuah suak leh ih hi tla hi cu Apple Computer Company in an operating system dingah an hmang ta.

Cun kum 1986 ah Stevein Film Director lar George Lucas-ih company Lucas films hnuaiih computer graphic division(cartoon tuahnak) cu lei sakin a cei mawiih, a hminah Pixar tiah a vuah . Pixar hin film tuahtu company Walt Disney thawn animated movie (cartoon) tuah dingin remawk nak (contract) an sign tlang. Steve Job-ih company Pixar leh Walt Disney tei tuan tlannak hnuaiah hin film hlawhtling tak tak Toy Story (1995), A Bug’s Life (1998), Toy Story 2 (1999), Monster Inc (2001), Finding Nemo (2003) leh The Incredibles (2004) tih pawl an tuah suak, asinan an company pahnih contract thuhla ah buai nak an neih ruangah kum 2005 ah Walt Disney cun Pixar cu a zaten $7.4 billion in a lei sak thluh, Steve Job cu hi company ih shareholder tum bik a si ruangah Walt Disney hnuaiih Pixar-ah cun Board of Directors lakah a tel tho tho a si.

Hitiih Pixar in hlawhtlin nak a ngah rero hmang an tih laiah sum le pai lamah buai nak a um ruangah a company pi bik NeXT.Inc cu zuar a si ih, Kum 1996 ah Apple Company cun NeXT.Inc cu $402 million in an lei. Hi ruangah hin Steve Job khalin a suahsan zo mi Apple company-ah cun a luh leh sal a ṭul nak a si.

Hi tiih Apple company-ih a luh leh hnu rei lo te ah Steve Job hi kum 1997 ihsin Chief Executive Officer (CEO) hna cu an kaih ter sal. A hnuai ihsin hin project dangdang buaipiin hlawknak tampi Apple company hin a ngah nasa. Dan leh dun pawl feh dan ding pawl thleng thluh in a mah Steve Job, CEO rori hmanin kum khat sungah Dollar malte lawng a hlawh a si. Next software tam sawn cu Apple than soh nakah hmangin operating sysytem dingin NEXTSTEP an hmang leh i, hi hi Mac OS X operating system rak suah nak a si. Apple company cu Steve Job-ih kutih a um hnuin hlawknak hlirin an khat. Computer tha tak iMac Computer leh mp3 player music ngainak iPod leh music software iTunes an tuah suah hnu tla ah cun Apple Company cun hlawknak nasa zet an ngah.

Cutin lamzin dangdang in hma an vun la vivo ih June 29, 2007 ah khan Apple cun mobile phones cangkang zet leh tha zet tuah suakin iPhone hi an run tlangzarh . Cun Steve Job-ih hmalaknak zarah Apple company cun computer vek cangkang tak, laptop tiat hrawng, bil leh thleh tul lo, touch screen thluh iPad cu an tuah suak lala si kha. iPad khal hi an zuar khawng nasa.

Steve Job hin kum 1991 ah Laurene Powell chu nupi ah neiin, Laurene thawn hin fapa pakhat leh fanu pahnih an neiih, culo fanu pakhat kum 1978 ih a sawn thlak mi Lisa Brennan Jobs khal a nei. Hivek ihbuai tak leh hlawhtling takih hna a tuan laiah kum 2003 ah khan pancreatic cancer a nei tih hmuh suah a si, asinan Apples Board of Directors pawl cun hivekih Apple company lu bik leh thluak bikin hi vek natnak men men lo a tuar tih an theih cun company a tluksiat pang an phan ruangah puangzar lovin an thup ih, asinan kum 2004 ah a pancrease cu hlawhtling zetih zai a si.

Sii dangdangih tuam hlawh phah cing khalin a hna cu a tuan tho tho ih, asinan CEO sinak cu kai thei ding dinhmun ah ding lovi a theih awk ruangah Aug 24, 2011 ah khan Steve Job cun Apple CEO asinnak cu ban a dil ih, Apple Directors pawl khalin remti in a aiawh dingah Tim Cook cu ret a si. Cutin a natnak cun zual lam a pan vivo ih October 5, 2011 ah  leitlun mifim, mithiam leh thluak tha Computer pa tih hmanih an kawh rero mi cun leitlun a suahsan.

Source- Crunch base, Gilbert

Comments

comments

Powered by Facebook Comments