Soul Image Band In New Delhi Harsa-rethei bawmnak Ding Ah Gospel Live Concert Nei Ding

New Delhi, Soul Image Band Pawl

New Delhi harsatnak le vahvaihnak ram ih nonawn thla sakthiam le awnmawi lam’h leitlun khual rak tlawng rero tupawl cun Delhi ih mirethei-harsa zual pawl bawmnak ding ah  Gospel Live Concert kan hmai zarh 13 Sunday sun khawm tiak India nazi 2:00PM ih tuah an tum thu New Delhi ih kan CT palai hnen ah hmaitawn in an sim.  Hlasaktu ding le awnmawi hlertu ding pawl hi nauhakte lai ihsi awnmawi leh hlasaknak ih rak thanglian tu pawl an si thu khal an sim tel bet.

Hla timlamnak hmun luhnak inn hmai

New Delhi ih Chin Gospel Live Concert a veikhatnak ding a si thu khal hlasaktu ding pawl le an lakih awnmawi buaipitupawl in an sim tel bet. Hi, nonawn pawlkom hi “Soul Image” tiah hmin an sak. Tui tum ih hlasaktu ding lakah Hakha ih hlasakthiam hminthang album avei hnihnak tuah rero lai Mai Hniang Cung Sin (HniangHniang) a tel ding ih hleiah awnmawi tumtu ding pawl khal Chin ram khua thenkhat concert tuah ih awnmawi rak tum theutu pawl an si.

New Delhi sumpai harsatnak ram ih hivek Gospel Live Concert an tuah tum thu mipi pawl in an theih tikah an thatho lungawi umngaihnak thei lo in an um. Nu le pa le upapawl cun hivek ih nonawn Pathian sunlawihnak ding ih tumtahnak an neihmipawl an hmuh tikah an sim suahmi cu “sumpai zawng in kan lo bawm thei fawnlo, kan theitawk thlacamnak thawn kan lo bawm ding” tiah an ti thu Salai Van Bawi Thawng in a sim.

Kan Seal

Hlasaktu ding fala le tlangval mi (25) lenglo an si ih kan dung May thla thok ihsi an timlamawk thok thu kan palai hnen ah an sim bet. Tuini tiang an buatsaihawknak ih an sumpai sensohmi zaten Rs-16,000 lenglo a lan zo thu khal kan palai hnen ah an sim tel bet.

“Kan concert tuahnak ding hmun Hall sanman Rs- 15,000 a si ih awnmawi san man le a tulmipawl tawlrelnak ah Sumpai tampi a cem lai ding a sinan a tu ah kan kut ah Rs-3000/- vial a um” tiah Salai Van Ram Eng in a sim bet. Asim vivonak ahcun “Pathian in, in bawm dingih mirethei-harsa bawmnak ding ah sumpai malte tal kan hmu ko ding” tiah a sim bet. Delhi ih raltlan mitamsawn cun hivekih reithei-harsapawl bawmnak dingih tumtahnak an neih ruangah fak le upat an hlawh zet tiah kan palai cun a sim tel bet.

Awnmawi tuanvoneitupawl le Tinkim tawlreltupawl

  1. Salai Van Ram Eng (Paate)    | Drummer |
  2. Gabriel Van Thawng Luai | Bass |
  3. Salai Za Biak Hup (C. Modernhoe)    | Lead guitarist |
  4. Salai James Lal Biak San  | Singer |
  5. Salai Lal Nei Mang (Mang Mang) | Rhythm |
  6. Salai S. Lal Hu Lian (Hute) | Vocalist |
  7. Salai Van Bawi Thawng (Piangte) | Keyboard |

Adviser :

1. Peter Zar Zo Sang (Canada)

2. Lal Duh Awm (Australia)

Siartu zaten a hnuai ih tikcu caan le hmun ah lungawi soparten’ kan lo tawng duh:-

Pasangipur MCD Hall

New Delhi

Time: 2:00 PM

PS: Sumpai thawn Delhi ih mirethei-harsapawl a bawm duhtu hrangah lungawi soparten’ kan lo hmuak a si.


Comments

comments

Comments

%d bloggers like this: