Sopaw & Ka Pa In In Rak Sim Dah

pa
“T’ang aw, tlaan aw, tlaan aw….,”
Tlawngta pawl tlaanzuamawknak ih thapek thawm a si. Tu ah cun a hmun an thleng zik te thlang.

Hmaisabik ih tlaan tu cu mi pahnih lawng. Pakhat sawn cu tlawng ih cathiam hminthang. Saya/mah pawl khal ih ngaihsak hlawh zet tu Thangte. A kiang ih tlaan tu cu tlawnginn ih “Sopaw” ti ih kawh mi Josep a si.

Josep cu cathiam tuk lo a si ih thu a rel le upa tak vek in thu a rel t’heu. A danglamnak pakhat cu a hnino (smile) thei ringring. A hmin le a mah khi an kaih tuk lo.  Mi in an mitkem ih saya/mah pawl khal in an kawk ringring. Ngo tuk lo, hmai pheng nawn. Asinan a rualpi pawl cun an duh thei zet. An tlawng ah cun josep ti’n ko lo in “Sopaw” ti’n a rualpi pawl tiang in an ko thluh.

Thapetu pawl ih hmin saltambik mi cu Thangte, t’angaw ti kha a si. Mi hrek in “sopaw, sopaw..,” an au an kio.

Vansiatthlak zet in Thangte cu a bah ih vei li, nga lai a ril. Pakhatnak ngah tu ding cu sopaw a si thlang.  Asinan Sopaw cun Thangte cu a va pom ih a va tho. Mipi pawl cun mangbang tak in an zoh vialvial. Thinphangbik tu cu an sayamah Myit myit(အတန္းပိုင္) a si.

Tlawnginn ih rampi thantar hnuai ih tlakrawh dawl mi par ah to in a bangreh nak dingah tidai a in rero tu cu Sopaw. Mithmai siatnak le t’hatnak khal nei cuang lo in a mah umkel te’n a um.

“Hei, Sopaw”
“Awww, ra uh,  nan ni teh Thangte siizungah nan thlun ve lo maw?”
“Thihnak tlak asilo kha heeeee,
E,….sopaw, ziangah na tlaan peh lo.  Tu cu kan khaan ih miniam pa te in pakhatnk a ngah. Nangmah in pakhatnak ngah in zal thar te laksawng ngah ka duh na ti ih”
A rualpi pawl cun lungkim lo tak in an sut rero na’n zianghman a sawn ve lo.

“Josep”
“Awi, saya” an saya Thawng Za Luai a rat ruangah an zate’n an ding thluh.

“Sopaw, nangmah vek in hi vek thinlung na nei ding cu kan zum lo kan zate’n kanmang a bang t’heh thei si.
E, ziangah tlaan lan lo in Thangte kha na vun tho”

“Ziangah hman si lo saya. Ka pa in in rak sim dah, ‘Nehnak ti mi cu kan zuam ah cun ol te’n ngah a theih asinan sunnak ti mi cu olte’n cohlan theih asilo’ in ti. A hmun kan thlen zik le nuam te’n ka tlaan dingih thangte kha nehnak ka co ter ding ti’n ka rak tum cia si. Thangte cu kan khaan ah cathiam le cangan zuamawk khal ah laksawng ngah t’heu tu a si. Amah vek hrangah sunnak ti mi cu ol te’n a cohlan thei ka zum lo”.

“Cu hei ah keimah vek ih nehnak vun co ding khal a t’ha lo.  Thangte thapetu pawl, nehnak a co ding rak hngakhlap tu pawl thin a naa ding si. Ka pa in in rak sim dah ‘midang pawl lungkim ter le an nomnak tuah sak cu thil t’ha a si cucu mi zapi in an tuah thei lo t’heu ‘ t’n in rak sim dah.
Thungai te’n kei cu a sung tu ka si ringring. Saya, mi dang pawl ih thinlungah keimah ka sun cu an lungawi tak in an nuamawk tak tla a si thei si. Cu mi pawl cu ka hrangah nehnak an rak si ve”.

A hmai ih luu kuun phah in a feh liam tu nauhak phun 8 mi ih dunglam cu zoh phah in “Midang pawl teh va sim seh la an zum pei maw?ti’n mangbang tak in Saya Thawng Za Luai cu ruahnak sungah a rung tang.

Thangte khal tlawng a kai thei sal zo. Tlaanzuamawknak ih pakhatnak ngahtu mi niam pa te Piter khal zal thar te thawn tlawng a ra kai. Cui’ caan cu Sayamah Myit Myit caan a si.

“Thangte na dam deuh maw? A naa tak lai maw? Nuam te te’n feh aw la kaibak t’um le kai kha ralring tak aw maw!…” cathaim thangte cu duat tak in le ngaihsak tak in an sayamah cun a rak ti derdo rero.

“Sayamah, vuan-khuan-pyoh-ba(ဝင္ခြင့္ျပဳပါ) ” Sayamah le tlawngta pawl cun aw a rak nak lam an zoh thluarthlo. Saangkaa in lut a ra dil tu cu Sopaw ti ih kawh mi Josep.

“Hmmm, Nang t’heu le tui’zing khal na tlai lala maw. Na luarkai thei tuk. Thusim le ngai lo. Nang vek hi cu tlawngkai man khal um hlah. Kha…kha… va to zang”.

Manmawh zet in a to nak ah cun a va to. A thlan pawl cu a angki le a lung-zi in a hnul phah rero.

“Ziang ruangah tlawng na tlaai?”
“Ummm, Sayamah. …..”

Cu mi lai ah tlawngkiltu Pa Hnin cun saangkaa in
“Sayamah, mi tu te ah nan inn a kang an ti”
“Ziang….ziang….um,  thilri teh a kang tam maw?”
A to nak in mangbang le aanhai thinphang zet ih a ding vukvi tu an sayamah cu an zoh dede.

“Ziang hman thinphan ding a um lo. Ziang hman a kangral lo. Tlawngta pakhat in a hmu ih nasa tak in meisa a mit ih zianghman kangral lo te’n a ziam sal ti’n mi tu te ah na tunu te in in ra sim”.

Tlawnginn kil tu Pa Hnin a feh hnu Sayamah Myit Myit khal a thinnuam sal in cazirh a thok sal.
“Kha mizaan ih catuah ding ka lo pek mi in rak hmuh uh. A tuah lo pawl cu mah te thei aw in hmailam ah ding in kut ra thlir uh”.

Hmaisabik ih suak tu cu Sopaw. Sayamah in sopaw a hmuh ve te’n a thinheng mithmai thawn.
“Josep,  ca na tuah lo lala maw si?”
“Sayamah, tu veikhat te cu ka tuah ve na’n ka ca-uk khui ah ka taan ti ka thei nawn lo ruangah ka ra suak”
”  keimah tiangin in bum tum maw si” ti’n thawi cu a vun tum.

“Saya….. sayamah malte’n.  Thawi cu in thawi ko aw. Asinan ka lo bum lo. Ca cu ka tuah taktak. Cun ka ca-uk khal ka hawl hmu nawn lo ngaingai. Ka pa in in rak sim dah ‘mai’ sualman cu tuar ngam ding a si. Asinan kan sual man tuar mi deem (zia) deuh dingah mi bum lo ding ‘ in ti”.

Hi pa hi cu aww……pawk…phawk……,...,

Veinga vuak a tuar ruangah kut thlir lo in a to nak ah a to ngah sal. A danglamnak pakhat cu cu vek in an thawi khal ah a hni siamsi thei thotho.

Zaanlam tlawng t’um a si thlang. Sayamah Myit Myit cu a thinthi thei lo in zamrang an inn ah a tlung. Tohkham par ih a to tu a nu cu thuhla um daan a sut lohli.

Sayamah tei’ inn cu tlawngfehnak ziinkiang a si. Thil um daan cu a nu in a sim .

“Hnipuan ka rawt lai ah cokaa(rawlsuannak) ah ka feh, ka mangngaih lo ih rei deuh ka um.  Cu sungah puan a kang. Keimah mawh rori a si.
Cu mi lai ah tlawngta nauhak pakhat a ra ih a zal thawn meisa a ra thawi ciamco. A mit thei lo ih a kiang ih tidai thawn a toih lawngah a mit thei.  Kei le ka lungaa thluh ih ziang hman bawm thei lo in ka zoh cuahci. A mah ra lo seh la kan iin cu a kang thluh ding.

Cui’ nauhak cu meisa a mit ve te’n tlawng ka tlaai ding a ti ih zamrang te’n a tlaan cih.  Cabuai tangah a cauk pakhat a tla ngah pang mi cabuai par ah ka ret” a ti ih ca uk cu a fanu hnen ah a pek.

Caphaw par ih ngan mi a vun hmuh cu a lung puakkuai thluh vek in a thei awk. A mithmai ah sirawknak in a khat. Caphaw par ih ngan mi cu

Salai Josep Za Piang
Room – C
Grade – 9

Ca uk cu a vun kau vivo ih a mitthli cu an rung luang rero phah. Neta bik cangan mi cu mizaan ih Eassy a ngan ter mi fiang tak le fel tak ih ngan mi a si.

Zuknung sungih hmuh vek in a dunglam nai te thil thleng a vun hmu sal. Thungai thu a rak sim nan a rak zum lo. Thinhengnak ruang ih a rak vuak mi a vun ruah sal tik ah thinlung kuai tak in a mittlang in mitthli cu an luang suk rero.

Tlawng a kai sung hmuahhmuah ah mithmait’ha ih a rak biak dah lo mi. Kawk le awka hro in a rak biak t’heu mi nauhak, upa vek ih a t’ong t’heu kha mitkem zet ih a rak zoh mi tlawngta nauhak, hnisiamsi ih a um t’heu kha a mi ti hrim ti’n a rak ruat ih nautat t’heu mi nauhak tlawngta pa te.

A thaizing zinglam tlawnginn darkhing an tum. Sayamah Myit Myit cu zing te’n tlawng a feh ih khaan khal tuan te’n a lut. A thin a phu dukdo ih a manmawh zelzel. Tlawngta pakhat hmuh duh zet mi a nei ih tlawngta pawl cu tu le tu a zoh leuhleuh.

Tlawnglut dar an tum a hawl mi a hmu lo. Rampi hla an sak t’heh a hawl mi nauhak cu a hmu cuang lo, khaan sungah a lut asinan a hmuh duh zet mi nauhak pa te cu a hmu cuang lo. A mah a hngah nak ah ca khal a zirh thok hrih lo.

Ke feh awn a thei, Tlaan awn thawm a si ti a theihtheih ” Sayamah, vuan-khuan-pyoh-ba” saangkaa in lut a dil tu cu a hai zoh. A to nak in a ding vukvi ih thinphan hmel zet in saang kaa lam ah a feh cih.

” Josep, ziang na cang, hmatuamnak thawn na luu le na tuam, ” aw t’hia durdo’n a va biak. Ngaihsak zet ih a biak veikhatnak a si. Asinan mangbangnak ziang khal nei cuang loin sopaw cun hnino phah in

“Ziang hman cang lo. Ka luu fate a kuai ih cu nah si sayamah. Tui’ zing ka nui’ thil zuar ka bawm ih lungto in in deng ngah. Khui lam in a ra ti khal ka thei lo. A hma tla fete tak lawng a si “.
“Aw…., nangmah vek thinlung t’ha tla lungto ih lo deng duh tu an um maw si…..”

Sayamah”
“Ziang si Thang te”
Thangte ih sayamah a kawh ruangah thangte cu an khaan za ten an zoh.  Mithmai nau tak in thangte cun
“Sayamah, Josep luu kha kei mah in kuahli in ka sai kuai mi a si”

An zaten mangbang tak in an zoh dede. Cu lai ah sopaw cun

“Karual, ziang hman a si lo kha. Na sim lo tla le ka thei thotho si. Um ko seh.  Kei cu zo hman mawh ka phurh lo.  Tuar thei ding awmang cu tuar theinak thazang ka nei so khaw. Nangmah thawn ziang hman tuar nak ka nei cuang lo ” mithmai pan te’n a hai sawn.

“Thangte” Sayamah ih kawh aw ruangah a khir dukdi ih a to nak in a ding. “Ziang ruangah Josep lu cu na sai kuai?”

“Keimah mawh si sayamah. Tlanzuamawknak ih ka bah kha a mah ruangah ti’n rualpi hrekkhat in in ti ih cu nah ”

” A mit tla ngah pang aw la ziang ti’n na tuah ding. Thinlung sia nei seh la kha mi lai ah a lo bawm ding maw na ruat. …”

Dungtabik ih t’ong a theih ruangah Sayamah Myit Myit a t’ong a cawl dukdi.
“Sayamah , thangte kha mawhthluk rero hlah. Mawh sawn tu cu keimah ka si. Ka pa in in rak sim dah ‘mah hua tu hi awkam in va sim man a um lo.  A tik cu caan te ih tuahnak thawn lang ter lawngah a fiang’ in ti. Cu ruangah ziang hman ka rak sim lo kha keimah mawh a si”

“Cun, thubuai pakhat ti fel hnu ah cui’ thubuai ti fel nak par ih mithmait’ha va ngah tum lo ding. Mai’ t’hat’nak mah in va sim ih mithmait’ha va co tum dah hlah ti’n ka pa in in rak sim dah.
Kei cun a zate’n ka ngaithiam thluh vek in a za ten ka theithiam thluh sokhaw.”

#ThanThaih (sweyeik) ih ngan mi a remcang daan in ngan sin mi a si. Hmin pawl khal lai hmin a remcaan daan in run ret mi a si.

Salai Phenthlam

Comments

comments

Comments

%d bloggers like this: