Song Il-gook ; South Korea Milar Pawlih Thuanthu Tawi (3)

il-kukSong Il-gook hi Kawlram mipi pawl cun ‘Jumong’ tiin kan neel cio ding a zum um. Jumong drama ih Jumong kha a si ko. 2007-2008 hrawnghrang kha kan Chinmi tampi khalin himi Jumong drama kan rak atcilh cio. Himi Jumong drama ih a lemcan thiamnak ruangah Kazakhstan ram president thawn rawl ei tlang dingah Blue House  (Republic of Korea president umnak inn) ah sawm hlawhtu a si fawn!

Song Il-gook hi kum 1971 October 1 ah South Korea ah a suak. Amah hi 1900s hrawnghrang Siangpahrang thuneih san ka ti men ding, (Anarchis) le Korean independence movement general Kim Jwa-jin ih tu sin (great grandson) a si. A nu khal zuknung cuang lemcang a si hlei ah congresswoman a si bet. Thiamzung khawvel ih a luh thok, a tuan thoknak cu 1988 in a si ih tutiang a tuan lai. Amah hi 6 ft 1 inch a sang.

Song in a thiam hleice mi cu sword-fighting, martial arts le horsemanship ti pawl hi an si. Curuangah  thuanthu cawn drama zuknung a cuanmi khalah historical drama Jumong le Emperor of the Sea ihsin a lar nasa cuang. Amah hi Cheongju University  ihsin Performing Arts major thawn tlawng a theh. A thiamnak taktak hi Emperor of the Sea le The Kingdom of The Winds an zaih lai ah a lang nasa ti a si.

Model lam khalah a hlawhtling zetih award khal tampi a ngah ve. 2010  April thla ah Korea President umnak inn Blue House  ah  Kazakhstan  president thawn rawl ei thlang dingin sawm a rak dong. Hihi  Kazakhstan ramah Jumong drama in popularity a ngah ruangah ti a si.

Song Il-gook cu kum 2008 March 15 ah ‘Jung’ ti ih kawh a si mi Busan High Court Judge thawn media le mipi theih lo’n Seoul khawpi ih um Sheraton Walkerhill Hotel ah a thupten anmah traditional Korean wedding in an nei aw. Mipi le media pawl in a nupi ih hmel khal fiangten an hmu ngah dah loih a hmin pumhlum khal an thei fawn lo.

Cutin kum 2012, March 16 zingah Seoul Hospital ah fapa thumphir (triplet) an nei ih cumi zato innpi an luh lawngin a nupi hmin hi “Jung Seung Yeon” tiin theihfiang a si. An fapa thumphir pawlih hmin tla cu Dae Han, Min Guk le Man Se tiin an sak. De Han hi suak hmaisabik, Min Kuk hi lailak, Man Se hi suak netabik an si. Hi an fale ih hmin an sakmi cu a komkhawm in duhsan pakhat lawng nei a si ih a tican cu “Long Live the Republic of Korea” tinak a si. Tufang ah Song Il-gook cu a fale pathum thawn variety show a simi Superman is Back ah an tel. KBS2 ah hmuh theih in an lang ringring.

2014 KBS Entertainment Awards peknak ah a fale pathum in Children popularity award khal an ngah ih amah in Special PD Award a ngah. Tufang cu  thuanthu cawn drama ah a tel lem lo. Movie lawnglawng ah a cuang.
il kuk

#Hminsin; Ca a sau tuk titu an tam tuk ruangah awards an ngahmi, an ngahnak pawl cu ka ngan nawn lo ding.

A tang zukih nauhak pawl pathum a pom, a pawkmi hi a fale phirthum an si ih himi zuk hi 2015 Calender hrang ih 2014 November thla ih an zukmi a si. Tu ahcun an thang zet zo men thei.

(Visited 658 times, 2 visits today)

Comments

comments

Comments

%d bloggers like this: