Somalia Ram Bomb Puak

Somalia Ram Bomb Puak
 
Mizansunih Somalia ram khawpi Mogadishu ih thihcilh Bomb puakah minung 22 an thi. Hi Bomb tipuak tuhi  Somalia ram Cozah cun  an ram sungih Al-Sahabab Tapung pawl an puhih,  Asinan Al-Sahabab Tapung pawlcun hi Bomb tipuak tu an silo thu an puangve.
 
Hi Bomb hi Shamo Hotel kiangih puak a siih, mithi pawl lakah Minister 3 an thitel. Al-Sahabab Tapung leh Tapung dang pawlin an khawpi Mogadishu leh an ram hmun kaupi ziangmawzat cu an thu neihnak hnuai ah an retih an duh tiktik ah buainak an tuah suak ttheu.
 
Al-Sahabab Tapung hotu Sheikh Ali Mohamud Rage cun  Bomb tipuak tuhi Cozah lam minung an si a zum thu a sim veih, mi huatthu rello mipi vangtlang harsat nak tuahcu an pawl thiltum mi a silo ruangah hi Bomb puakah hin ziangti zawng hmanin an hnamhnawih awklo thu a sim.
 
Tapung hotu Mohamud Rage cun hi Bomb puah hlante ah  Bomb puahnak hmun Hotel ihsin Cozah lam mi pawimawh hrekkhat ansuak ih cu ruangah an mah Cozah hotu pawl karlakih ngaih awklo nak ruangih phiar thup awknak ih an puahmi a si ticu fiangzetin a lang a si  a ti. Mizansunih Bomb puahnak hmunhu hi  Banadir University ihsi  camibuai ong minung 43 pawl  Graduattion Day an hmannak hmun a siih,  hi tlawngta pawl Certificate an pek laiah Bomb hi a puak a si.
 
 
Information Minister, Dahir Mohamud Gelle in a sim nakah mi pakhat nunau vekih thuam aw in  Bomb hi a tipuak tiah a sim. Hi Bomb puakih mithi lakah Health Minister, Qamar Aden Ali, Education Minister, Ahmed Abdulahiwaayell leh Higher Education Minister, Ibrahim Hassan Addow khal an thi telih Sports MInister, Saleban Olad Roble khal nazetin hriamhma a tuar.
 
Somalia ram President, Sheikh Sharif Ahmed cun hi bomb puakcu an ramih siatnak nasazet thlentu a si a ti. Somalia ram hi kum 20 lenglo Cozah mumal umlo in Tapung pawlin an ti buai ringring.
 
Syria Ram Khawpi Ah Bomb A Puak
 
Iran News Network Correspondent in a sim nakah Mizansunah Syria ram khawpi Damuscus ah Cozah thu pawimawh ih khualtlawng pawl to mi Bus sungah Bomb a puakih minung 6 an thi ih midang ziangmaw zatin hriamhma an tuar tiah a sim.
 
Hi Bomb puahnak hmunhi Shia Muslim  hmun thianghlim Zeinab Shrine kiangte ih  Petrol pump ah a siih Petrol an thunlai fangih puak a si, Bomb puakhi a cahtuk ruangah minung taksa parh nawi leh thisen pawlcu a parh nelnel ih Bus khal a siat nasazet tiah an sim.
 
Palik pawlcun himi Bomb puahnak sanhi an zingzoi rero laiih, Bus sungih to tu minung in palang sungah Petrol maw Gas maw a thunih cumi cu a puakter pang a si ding tiah zumnak tumpi an nei tiah BBC cun a sim. Syria ramhi buainak suaktuk dahlo ralmuangzet a siih, Asinan nikum September thla ah khan  Sunni Muslim Tapung Fatah Al-Islam pawlin  Damascus khawpi ah Bomb an puah ih Minung 17 an rakthi zo. tu ah cun Cozah lamkhal an ralring zet thlang.
 
US In Iran Thu A Pe
 
US White House thupuangtu Robert Gibbs cun  Iran in hremnak pek a tuar duhlo a si ah cun a Nuclear tuahnak thilri thuhla ah ram paruk US, UK, France, Germany, Russia leh China duhdan a pawmding a si a ti. Robert Gibbs cun Iran in ram paruk duhdan cu a lungduhlo ih a pahbal sinsin ih cu ruangah Iran parih zawi awi theinak tikcu caan khal a liam cak vivo ih Iran hin tuikum sung lawng tikcu caan a nei thlang a si a ti. cu ruangah a Nuclear thuhla ah hin ram patuk ih duhdan thlun lohli dingih thu kanpe a si a ti. ram paruk duhdan  a thlunlo a si ah cun hremnak pek a si ding tiah  Robert Gibbs cun a sim.
 
Hi ram paruk pawlhin UN Security Council fehdan ding khal an rel dingih  Iran hin a Nuclear thilri Ralthuam tuahnak ih hmanglo ih a mai ramsung Electrict Power tuahnak dingih a hmang taktak ding a si khal len a mai ramsungah tuahlo in Russia ramah a kuat ding a si tiah hi ram 6 pawlcun thu an pe.
 
Himi laiah Iran cun  himi thu a pawmlo thu a puangih hlei ah  an ram President, Mahmoud Ahmadinejad cun tuikar tlawngkai nithum ah khan tuihlan hnakih Nuclear tuahnak thilri an neih tambet tumthu a paungih, Mizansun khalah Iran Parliament cun International Atomic Energy Agency (IAEA) ih  Iran ram duhzawng kalhih  thil titu cu ziangvek ram an si khal len Iran thawi an peh tlaih awknak leh an laicin awknak thuhla zohfel sal a si ding tiah Parliament cu an Pass.
 
Iran lamih ttang ringring tu Russia khalin  tui Nuclear thuhla ah cun a ttan nawnlo ih, Asinan Russia  Prime Minister Vladimer Putin cun Iran cu hremnak pek a si khallen a  nem theibik ih pek siseh la tiah mizan sunah a puang sal lala ih, China leh Russia hi Iran parah an thinlung ngaingai theih thei an silo.

(Visited 49 times, 1 visits today)

Comments

comments

Comments

%d bloggers like this: