Solomon Menrihai In Ziangvek Hla Pawl A Sak Duh Ding?

-Uk Lian

Falam Ruun Inn Tlun Kum Puai hrang Rajiv ih phuahmi “Ruun Inn Nuam” timi Solomon Menrihai ih a sak mi na rak ngai maw?

Rajiv in thungaithlak ih a ngan mi hla, Solomon Menrihai in lung kekkuai ih a sak mi hnakih hla ngai nuam dang teh, a tam pei maw!

Rajiv in hla a phuah ding ih, Solomon in a sak ding tivek phun in awnmawi ah an rak milaw ngelcel.

A hnuai ah “Ruun Inn Nuam” timi hla ngai phah aw….

Solomon ih aw rori hi cu, bawmtu a nei, petu a nei. Hriakculhtu a nei hrimhrim ko. Minung aw tlun ah aw dang mawi zet a tuah thei ringring. Fiang lemlo ih a sak khal le, aw thaamte cem theilomi a nei. Fiang zetih a sak khalle a fiang daan a fiang mawi fawn. Solomon ih a aw-rawl hleiceenak hi, a awnmawi lawngin a simfiang thei ding.

A pianthar tikah Pathian thangthatnak hla lawng a sak ding timi thulenglawng ka rak thei, ka ui vek si, Pathian lam thil le a si fawn si. Tingaihnak ka theilo ih, love song cu a sak nawn lo ding ti’n, ka thinlung thlanmual ah ka rak phuum. Ui cu ka ui a si. Love song saknak dingah a aw khi, midang seuh le a theih fawnlo.

Cuti asile, Solomon in luangkuai hla pawl a sak nawnlo asile, ram hla tivek pawl teh a sak duh pei maw ti’n ka thinlung thlanmual ih ka vui liam hnu khalah ka seherh thotho. Thil dang siloin, Solomon ih aw vek khi cu a mankhung tuk ee! Falam ngaainak zaihla thawn a run sak sal tikah a ngaitu pawl thinlung a zun duh zet sal ding ka zum.

Tui tum Falam Ruun Inn Tlun Kum Puai ah Solomon Menrihai in hla a sak ve ding. Solomon in ziang vek hla a sak ding ti hnakin, a kiang naite ih a aw rak thei ngahtu pawl kha, dawt um za cu nan si. Solomon Menrihai cu a sunglam Pathian in a thleng danglam zo ti’n kan thei nan, Laimi hrangah a aw mawi daan te khi cu, kan thinlung sungah a riak camcin hrih ko ding!

(Visited 701 times, 1 visits today)

Comments

comments

Comments

%d bloggers like this: