Solomon Khrih Menrihai Pathian Hnen Ah Lungawi

-Uk Lian

Solomon Menrihai a piangthar ih love song pawl mipi hmai ah a sak nawnlo an ti ruangah cuvek cu ziangvek piantharnak a si pei ti’n Solomon rori biak le ton ka duh zet.

Solomon love song a sak nawnlo ih pawi ka tinak, a liam cia ah ka rak ngan zo.

Solomon ih aw thatzia, a hlasak uar thiam daanzia le mipi hmai ih a cangvaih a mawi thei daanzia pawl cu mikip theih a si ko.

Ruahlopin, Australia ah a ra thleng. A kut ka rak kaai ngah ve. A hlasak le a testimony sim ding ka hngak thei lo.

“Solomon Menrihai hrang ahcun music a ngainaa tivek men cu a nep tuk” tiin a thusim a thok. “Pathian hmin thangthat in um seh”, ti lawng a sim thei.

A tong tum rero nan, a lungzur in a neh. A mithli a hnul phah thul. Keyboard mawi-te a awn phah thawn, boruak le zaan thianghlim in a dinnak hmun pawl an tuam.

Pathian thu cu tongkam thiam lawng siloin in nunnak thawn sim ding timi tla i ruat ter.
……………………..

A testimony, ka mang daan ten….

– Ka beidong tuk lai caan a si fawn camping in sawm.

– Lakphak zemtu dingah ka va lut. Asinan, zan tinten Pathian thu ka ngai phah ko.

– Zaan khat cu, ka thinlungah Pathian tongkam a thleng.

– Fapa na zum asile, kumkhua nunnak na ngah ding.

– Zo si, kumkhua nunnak rori i pek thei ding timi ka ruat. Kei le ka beidong thawn.

– Fapa in petu Pathian, cule cumi thu ka zum asile kumkhua rori ka nung ding timi ka ruat.

– Cule, thuthangtha simtu Saya Zaw Win khawm tiak ah ka sim.

– Inn hnuai ah kanmah pahnih ten kan biak aw ih zarh khat sung Bible siar aw in ti.

– Cumi hnu khalah zuu cu ka in lai ko, Pathian cun I seherh, ka hrang dung a tolh dahlo.

– Cutin, ka lungsungah Bawipa lawnglawng a lal.

– Cule, love-song sak ka nuamawk nawnlo. Pathian in, in duhdawt ngaingai timi ka thei.

– Pathian thangthatnak hla thawn Pathian thangthat rero lawng ka duh thlang.

– Ka nunnak hi a thlengaw. Ka sungah thangthat hla lawng a um ko ee!

– USA ah ka feh ih, love song sak ding ka si. Asinan, love song sak hi hiarnak ka nei nawnlo.

– Pathian lawnglawng ka thangthat duh. USA ih I theitu rualpipawl cun in mangbang.

– Na um daan a danglam in ti rero. Keimah duhdan tla cun concert hman cancel thluh ka duh.

– A cang thei silo, harsa zetin ka um. Love song a sual ka ti dah lo, asinan kei ka sungah cun Pathian thangthat ding lawng a um curuangah asi love song ka sak nawnlo.

——————

Solomon in testimony a sim hlan ah Hallelujah timi hla kha a sak. Himi a sak lai ah, Solomon ih nunnak ah danglamnak ka hmu zo.

Tong theiloin, reipi a tap. Lungawinak le thinpemnak thawn a khat timi a nunnak ah ka hmu fiang ve.

Thlarau minung pawl cun an thlarau pi pawl an theihfiangnak an nei. Bawipa in ka tuu pawl cun ka aw an thei ti bangin Solomon ih testimony cu mithli thawn ka rak ngai ve.

A love song sak lai ih pangpar petu pawl khui nan hlo thluh, ziangah Pathian hmai ah a ding ih Pathian a duhdawtnak thu a sim ruangah maw nan pangpar nan thup theh ding, nan pangpar mawi te rak keng uh, khui ah si, nan rose par mawi?

Aw, ka sungah Bawipa a cangvai, thangthatnak hla lawnglawng sak ka duh tiin a sim ih, mic a keng phah, a mithli hnul phah ih a sim lai khi, ziangtluk zoh na mawi! Van ihsin Vancung mipaziat in Solomon Menrihai khi an zoh ding. Bawipa khal lungawi lo in a um thei ding maw!

Comments

comments

Comments

%d bloggers like this: