Sirawk A Tthathnem Lai ah

Mahonys October 2011

Khami ni kha Mawite le Thangpi ih neihawknak kumcam (anniversary) a si. A neihawknak kum malte a rei hnu cun thil umdan an thleng aw vivo. Vei khat lai can ih, pakhat le pakhat tthentthek aw thei lo, pakhat um lo can ih a dang pakhat um thiam lo veve kha, tu ahcun an to aw deuh ringring.

Thil tenau tete khal ah an to aw. An nupa nun ih thil rung thleng mi cu an duh lo veve. Asinan an danglamter thei fawn lo.

Mawite cun a pasal Thangpi in tuini hi an neihawknak kumcam a si ti a mang lai pei maw tiah a rak hngak.

Sangka ih keleng a on vete’n sangka lam ah a va tlan. Cu thluh ah hni siamsi phah in an pa cu pangpar tom khat thawn a rak hmuak. An pahnih in an hlim zet. To aw nawn lo ding in thu an botcat. Cu thluh ah laamnak hmun lam ih va nuam aw ve ding in tim an tuah.

An tim an tuah lai ahcun an ihkhun ih phone a rung on. Mawite in phone cu a va kai. Cutikah khatlam ihsin mipa pakhat in, “Hello, palik zung ihsin ka si. Himi hi Tluang Van Thang tei’ inn phone a si maw?” tiah a run sut.

Mawite cun, “Aw, si e,” tiah a sawn.

Mipa cun, “Poi ka ti zet. Mawttaw cangsualnak a um ih pacang pakhat a thi. Himi number hi a paisabawm sung ihta kan ngah mi a si. Zangfahte’n hitawk ah ra in amah a si le si lo in ra simfiang thei pei maw?” a run ti.

Mawite cun thinthir zet in, “Asinan ka pasal cu ka hnenah a um si!” tiah a sawn sal.

Asinan mipa cun, “Poi ka ti zet. Asinan buss ihsi a ttum zawng ah mawttaw in a pah ngah mi a si,” a ti thotho.

Mawite cu a thinlung a buai thluh zik. “Ziangtin hivek a cang thei?” tiah a ruat.

Thih hnu ah an duhdawt mi pawl an thlarau ih va tong ttheutu pawl ih thuanthu a rak siar dah ttheu. Cutikah a thin a phang sinsin. Ningttih thlaphang zet in an inn pindan dangdang ah a pasal cu a va hawl. Asinan a hmu lo.

Cutikah amahte’n, “A rak dik a si hi! Kumkhua in i tansan zo. Maw Pathian, kan tawhawknak pawl lakih pakhat te phiat hlo sal thei ding in thih hman ka ngam. Tu ahcun kumkhua in ka hlawhsam lanta thlang,” ti phah in a thin a nat tuk ruangah zial ah a tlu.

Vei le khat ah bual-inn sung ihsin thawmvang a um ruihro ih sangka a ra ong aw. Cu thluh ah Thangpi a ra suak ih, “Duat, tuini ah ka paisabawm ka thlau ti ka lo sim hngilh,” a run ti.

Hram: http://moralstories26.com/husband-wife-emotional-story-mus…/

-Sianglianuk Kianghrol

(Visited 30 times, 1 visits today)

Comments

comments

Comments

%d bloggers like this: