Singapore Lai Falapawl Ka Hmuhdan

unnamed (1)
SINGAPORE LAI FALAPAWL KA HMUHDAN

By/ Salai Chin

Acozah ruangah: Kan ram a siat le hnattuan ding a um lo tuk ruangah Chinmi telin Kawlram mipawl cu leitlun hmun kipah kan vakvai thluh ti hi rel sal rero ttul loih kan theih thluh mi a si. Chinmipawl khal a nu a pa, a tar a ttawtin mai vahsuah theinaknak ah kan vaksuak cio. Hnattuan pawimawh le rawngbawl a ttul ruangah le dinhmun ih a zir lo tuk ruangih vaksuak thei lopawl cu ram sungah cobarawh umin kan um cuahco men a si hi.

Cutin kan Chin falapawl khal mai remcannak cio ah vahsuah ve a si ih a tambik cu Singapore ah mi hnenum (House Maid) dinhmun ih hnattuan a si. Hi hi Singapore dinhmun ah cun hnattuan sang si lo khal sehla thla khatah Singapore Dollar 400-500 hrawng an rak hlawh ve cun Kawlram ih Acozah hnattuan hlawh sangbik Director General pawl hlawh ai hmanin a sang sawn lai ruangah le hasi, sahbawn, ei-in tivek a hrante ih lei a ttul lo ruangah Kawlram mipawl hrangah cun ti tlak a rak si ve mai.

Singapore Ram: Singapore cu ram fate khaw pakhat ram pakhat a si ruangah a felfai ngaingai. Inn le lo khal Housing Board in ruahmannak fel tak thawn a sak mi lawng luah le hman an si. Acozah lam khalah hlawh sang tak an peaw ih eithupnak le nawhthuhnak tivek a um lo. Leiltun Corruption malnak bik ram pakhat a si. China, Malay le Vai miphun tivek an um nan miphun thliarnak pakhat hman um lo dingin acozah in ruahmannak fel tak a nei. Cuvek thothoin Christian 18% an um ih Buddhist, Hindu, Muslim, Shikh, Pupa dan tivek khal an um nan sakhaw thil rengrengah khal thleidanawknak le nautatawknak pakhat hman a um lo. Cule hnattuanakah ramdang mi an si ruangih nautatnak pakhat hman a um lo thu company ih hnattuanpawlin an rel ttheu.

An Nunphung: Singapore nun cu kannih Chinmi vek an si lo, an nelaw lem lo. Kannih vekin capoh rel ih hnih rero khal an nei lo. An privacy ngaingai. An nun a khawhar a si bik mai. Culawng si loin an nun a hmanhmawh ngaingai ih ziangkim zamrang tei tuah thluh a si. Bus le rawldawr tivek khalah Conductor le Waiter tivek an um lem lo. Mahte tuah thluh a si ko. Hnattuanak ah buai thluh a si ruangah khawlaiah mi hmuh ding an mal. Cun sakhua tivek khal an ngaihsak lo tlangpi. Zohman hmuahsuamawk le nautatawk khal a um lo. Mai umumih um thluh a si.

Singapore Chinmi: Singapore ah hin Chinmi ziangzat ciah ha um timi hi theih a har ngaingai.  Falam Christian Fellowship ah hin mi 600 zik an um, Mizo Christian Fellowship a 350 lenglo an um, Hakha 200 zikte an um, Tedim lam hi kawhhran hmun thumah a din ruangah an funaw thei lo ih Inkuan ah mi 40 hrawng fang an um ih an zate cun 500 an um ve men thei. Culoah Asho le Mara hi malai an um ve. A dang cu rel tlak ngai an um lo.

Falammi lakah hin mi pahra leng cu mai hnattuan thawn um an si. Pu Van Thawng Lian te hi singpore mi sinak nei an si ih City Hall lamah tla rawl dawr an nei. A hrek cu Pernement Resident le S-Pass an ti ih Special Passport ih um an  si. Culo hmuah cu mi innsang ih hnattuan (House Maid) an si.

FCFS: Falam Chin Christian Fellowship ah hin mi 600 zikte an tel nan Off-day le Out-pass harsat ruangah mi 200 hrawng lawng zarhtin an khawmaw thei. Member zat  dik tak theih a har nasa. A san cu an um hmang ti laiah an rak tlung man tivek, an ra thleng nan an ra khawm thei lo tivek a si ruangah a zat ciah theih a ngah lo. Cun zarhpi khawm tinten member thar hmuahnak tuah a si ih mi 4-10 karlak hrawn an si rinring. A hrek cu Singapore an umnak kum 2, kum 3 tla an rak si. An suah thei lo ruangah le an suah sun hnih khatah thil dang tuah a ttul ruangih vei khat ra telnak tivek an si.

FCFS hruaitupawl hi an taima zet. Khawmnak ih ra tel hrih lo, member khalih tel thei lo khal an sungkhat unau thih hloh an tawn thu an theih cun Bulletin ah an telh ih thlacamsaknak an nei. Cun mai tithei tawk ralnak tla an pe. Hlasak khalah Music Instrument kim thawn sak a si ih a nuam ngaingai. Cun Usher khal felfai takin an nei. Projector thawn hla tla na kap ih awl-aiten a hmuh theih. CunSermon khal Video record tuah a si ih Youtube vakah thlah ttheu a si. Khawmban ah thlakhat sung suahcam neipawl in rawnhru lole rawl an do theu.

FCFS Usher hrekkhat laam lai

FCFS Usher hrekkhat laam lai

FCFS Pastor: FCFS hi fellowship a si ruang lawngah si loin Singapore ih um theitu Pastor hun neih hi thil awl a si lo ruangah Parmanet Pastor an nei thei lo. Thla hnih hrang Kawlram ihsin Pastor an sawm ttheu. Cuih pastor cun siat le harsat tawng an um khal le Telephone thawn thla a camsak. Nilai zan le Nilaithawhtan zan cu Telephone Cell group neih a si ih Telephone ihsin thusimnak a nei ttheu. Hi hi Sigaporean-pawl khal in an theithiam thei lo. Mak an ti ve nasa. Zirtawp le Inrin zan cu Home Cell le Thlacam khawm a si ih a suak theipawl an pawk ttheu. Hitawkah intek te in rawl an dar phah ttheu.

FCFS Missions: FCFS hin Missionary 9 hlawh pe in an cawm. Shanram, Maguage, Yangon, Mon, etc..ah an missionary-pawl an um. Thla an camsak ttheu. Culawng si loin cawlhni zingah City Hall lamah Laimi biakinn hlteng lo hawl hnattuan cu tu hi an thawk rero zo. Pathian in hitawk ih an um hi anmah hmangin tumtah a nei timi cu a fiang a si. Pathian ram hrangih mitangkai an si.

FCFS Media: FCFS hin Media Committee an nei ih cutin an cangvai. Vapual Tlangau timi hi thla khat vei khat an suah. Mekazin hi kum khat vawi khat an suah thei. Cun khat tawkin Calai Seminar an tuah thei. Khawm Bulletin ah article lole thuttha an telh phah ttheu. Cule web site an nei ih a address cu fcfsingapore.org a si. Hinah Pastor pawl ih sermon le cangvaihnak tete ret a si. Cun calai ttha khal ret a si. Hi tluk ih media lam cangvaihnak nei ttha thei pawlkawm hi an mal nasa ding. A rah khal bawr ttha tak a si.

FCFS le Chin Internet Khawvel: Hiti Media lamih an cangvaihnak hin rah a suah tamzia hi kan zoh ding. Laimi ih kan web site tumbik le Facebook group tumbik Chinland Today tihningtu khal Singapore pawl an si. Nikum lam khalah CT post tambik fala 5 tarlang zo an si. Tulai khalah CT in ttuanvo tumpi kaitu cu Mai Daidim a si. Cun Lai Mino Vangro le Biazai Runinn tivek page tla ih ca tthattha le bezai tthattha ngantu cu anmah thotho an si. Chin Youth Counselling khalah a thawhhlawkbik Singapore falapawl an si. Cun RFA lam khalah Singapore falapawl an cang ttha thotho. Cule Henry Vante in Vapual Forum timi a tuah ih ngaidan le hmuhdan relkhawm theinak forum ttha tak asi. Curuangah Singapore hi kan ro hlu ret khawmnak ti sehla a sual lo ding.

unnamed (3)

Internet khawvel ih Chin media palai FCFS sungtel pawl

Facebook Zuk: Thla khat vawi khat hrawng lawng suak thei pawl hrangah cun Fb zuk post cu an umhar phen a si ve lo ding maw. Nang le kei in le an umhar kan hnem ban si lo. Asinan zuk mawi lo le luan tuk an post mi kei cun ka hmu hrih lo. An thuamhnaw hruk hi anmah Singaporean falapawl fashion tluk hman a si hrih lo. Bawngbi tawi hi cu mitlangpi hruk a si ih hmun hla ihsi sawisel ci khalin a lang lo. Rome khawpi ih um cun Rommi vekih nun a ttulanak lai tla a um ttheu si lo maw. Cuhleiah Singapore ih umih kan ruah mi hrekkhat kha Singapore Laimi tla an rak si lo thei.

Mi Duhduh ih Rawt an Si Maw?: Hiti vekih ruat tla kan um men thei. Minung timi cu tthat thluh a theih lo ih sual thluh khal a theih fawn lo. FCF lawng hmanah mi 600 zikte an si ah cun minung sinak khalah miler deuh le ei awl deuh tla cu an rak um ve dingah ruat sehla. Hi hi Singapore lawngah si loin leitlun dan a si. Intek tlangval mipa tthalo tawng ngah khal an um ve ko ding. Cun man canih tlangval thawn nuam rak centu khal an um mahna leitlun timi cu…Asinan a tlangpi thu ih thlir tikah cuvek si ding cu thil awl lo tak a si.

Ziangahtile..? Singapore nunphungah hin tlangval lole fala ngaizawng an neih ahcun anmai ihnak room ah an hruailut ih nupa um mai a si. Hi hi mi tamsawn tidan a si. Curuangah leng lamih hnamaw lole Park velih totlang tivek hmuh ding a um lo. Culakah kannih mikhual zianghmanih an ruah lo tivek ah thinlung an pe zik lo. Nangmah khal vun ruat awla na thinlungih na ngaisan lo tuk lamah nupa sinak khal hman ding hman na ruat lo ding. Singapore fala tuak taktak, zalen taktak an tam laiah an hnenum Lai fala tikerkipawl kha khadi fawr thluahthloin an zoh zik lo. (thinheng lo ah aw..nan hmelsia tinak si loin). Cun duhduh ih fawr ding ti le thla khatah vawi khat suak thei, cuhmanah nazi  12 ih suak nazi 5 ih inn thlen tengteng tivek tla a si ih khawmaw ding hman mansahlap ih tlan a ttul can a tam. Culai lakah tlangval thawi fawr cu thinlung hmanah a um man zik lo.

Mitthatthum: Singapore ih mi mithmai zoh ih kum 3/4 um zo pawl tla hi cu mitthatthum ah an suak thluh ding ti hman a zumum. Ziangahtile minung hi nawmnak le dawngdahnak in in tuahttha lo ih harsatnak le ttuanrimnak in in tuahttha sawn ttheu. Singapore ih umpawl hin cuih camibuai cu an tuah zo ih tthazetin an awng zo kan ti thei ding. Curuangah nupi tthatthum hman an si sawn lam ding tiah ka ruat.

Chance Tamsawn: Anmah Singaporean hnakin Laimipawl zarhpi ni khawm fashion khal a mawi sawn. Khuk langih khawmaw hman an um lo. An ra suah tawkah saya rawldo le ziangziang simaw a cuhin an cuhaw. An hlasak le an Pathian thu ngai hman rilrawng zet mi naute rawl pek vek an si. A hrawpin an hrawp. Singapore ih ler le zuva ding hnak cun Tahan le mai khua lamah ler le zuvanak chance a tam sawn nasa ti hi a takih ka hmuh mi a si. Culaiah ral hla ihsi ngaidan base um lo ral ttha takih au rero tawk tla kan rak um hi cu a pawi ngaingai. Rel ttheu vekin Facts le pratical thil parah tthumaw in thu hi rel in ca hi ngan ttheu sehla kan tisual mal deuh ding.

Tlangkawmnak: Khipawl khi cangantui hmuhdan a si. A tthazawngin thu na thlir tuk (optimist) tla in ti men thei. Singapore ah thla khat ka um ih ka hmuh mi a si. A um lo hnak cun ka thei sawn ding. Cun kei hnakih um rei kum 4-5 um pawl tla cun an thei sin ding. Laimi lakih um reibik pawl hi kum 16 lai um zo tla an um. Cu pawl si sieh, kum 7 hrang um pawl siseh, kum 4 hrawng umpawl khal siseh ka suh mi ihsin thu tampi ka theih tikah cuih facts parah tthumaw in ngaidan ka tuah sawn a si.

 

 

Comments

comments

2 Comments

  1. Cungsan Peklawm says:

    hi ca te cu lung i kuai nasa.

  2. A dik tuk , patian in kan thin lung cio ah hna tjan hram seh ?

Comments

%d bloggers like this: