Siatsuah

Siar: Matthai 1:18-25

Amah in fapa a hring dingih a hmin ah Jesuh tiah na sak pei, ziangahtile a minung pawl kha an sualnak ihsin a ruun suak ding a si, tiah a ti. – Matthai 1:21

Kumkhat Sung Baibal: – Mikah 1-3    Thufim 24:23-34

Paris khua ih zuri panga in Orsay museum sungih Clude Monet ih suaimi zuk an siatsuah. Nunphunglam vuanzi Christine Albanel in cuih zuk cu suai saal a theih ko nain cuti’n an siatsuahmi in a thin a buaiter thu a sim.

Thuthannak ah, “Monet kutzung thiamnak tthabik cu siatsuah a si zo,” tiin an ngan. Cuih thil um daan cun sualnak in kan nunnak ah hmual a neihzia a langter. Kan bulpak duhhrilnak ih a suahpimi cu Pathian theih lo le dodal hi a si.

Khristmas a nai tikah Jesuh Khrih hi ziangruangah a suak ti hi ruah dingmi a si. Pathian Fapa cu amah bul innsang nomnak le lennak dinsuah dingah a ra lo. Vancungmi in Joseph hnenah, “Mary in fapa a nei dingih a hmin ah Jesuh tiah na sak ding. Ziangahtile a minung pawl an sualnak ihsin a ruun suak ding a si,” tiah a ti (Matt. 1:21).

Khrismas cu sualnak ih a siatsuahmi leilung kha Pathian in a Fapa laksawng ih a pekmi in hram a thok. Sualman cu thihnak a si, Pathian ih laksawng cu Khrih Jesuh thawngin kumkhua nunnak a si (Rom 6:23).

Pathian in kutzung mawizet in minung a sersiammi cu minung in amah dungtun tahrat in kan siatsuah nain kan thinlung zaten Khrih kan pek ahcun remtthat saal thei kan si.

Hih leitlun ah naute in a ra,

Amah ih sersiammi hih leitlun ah;

Pa ih duhnak tuah dingin a ra,

Kalvary tlang ih thimnak a neh zo.

Kan nun sualnak remttha saal dingah Jesuh Khrih leitlun ah a ra.

Comments

comments

Comments

%d bloggers like this: