Sersiam Thar ih Huham

March 9
Tlawngkai Ninga

Sersiam Thar ih Huham

Zozo khal Khrih thawn an pehzom awk tik ahcun mi thar a si; a nun hlun cu a cem ih nun thar a thok zo.
– 2 Korin 5:17

Bible Siar Ding: Rom 8:1-39

Mi tampi Pathian sunlawinak a thlennak mipi biakkhawmnak hmun ah an tel. Pathian kutcak in ziangtinkim a tonghtham, ih taksalam raal kham sak in an um. A thai zing ahcun Satan huham in a do hngai. Ziangah cumi a cang si pei? Thlarau nun, Mi Fapa sunlawinak, sersiam thar ih sunlawinak cu a thi theimi kan nunnak sungah a um zo. Asinan kan taksa ruangpum cu kan raalpa hrangah raaldonak hmun le hniksaknak hmun a si. Sikhalsehla Pathian ih tuahmi cu a thi theimi taksapum hnakin a nasa sawn, ziangahtile Pathian fa a simi mi pakhat ih a sunglawimi zalennak cu a maksak sawn. Ziangti’nso cumi cu a ralai dingmi thawn cu kan tahtthim thei ding?

Jesuh in, “Nunnak taktak a petu cu Thlarau a si; milai ih taksa cu san a tlai lo. Nan hnen ih ka simmi ttongkam hi nunnak a si” a ti (John 6:63). Job in, “Natnak in ka vun cu ei ttheh hmansehla, hiti ih ka tisa thawn Pathian cu ka hmu ding,” a ti (Job 19:26). Hih lei hringnun hnakih nasa sawn neitu kan si. Pathian lawng a zoh ringringtu, le A famkimnak a hmu ih A sunlawinak a kaifektu pawl cu Amah bang dingin an thlengh aw ding. Pathian umpinak thawngin sersiam thar pawl cu Amah bang dingin in thuam ding. Cumi thu thei cingin Satan cu hmun ka pe thei ding maw? Ka phurnak hmuah cu Pathian Thu nuncihnak thawn ka thlengh ding. Ka ttihnak cu ka rinsan nawn ding mawsi? Rinsan lamlam hlah. Lei tisa ah tthatnak famkim a um lo (Rom 7:18), asinan Pathian in nun thar sungah kan um ih A hrangah kumkhua hrangih timtuah fel kan silai hlan lo A Thlaru in nunnak in pek a si.

Pathian hnattuantu pakhat in, “daan thawn a mil aw lomi midang duhdawtnak ka nei,” in ti dah. Kei in, “Cumi cu nun hlun maw nun thar so a si?” ka ti. A thinlung a kekkhuai. “Cumi cu nun hlun a si ti’n a sim. “Minung hlun cu a thiltuahmi pawl hmuahhmuah thawn hlitphuak thluh mai aw,” (Kolose 3:9).

Na taksa pum hi Pathian ih thamdai theih dingin siang hram aw. Amah in na thlarau nun a nungter zo. Amah hi na nunram uktu bawi siter aw, ziangahtile Amah in a tthabik in a uk ding a si. Amah cu na nunnak ih siangpahrang a si ding, na duhdawtnak, na duhhiarnak, na khuakhan lairelnak pawl a zate’n ukter aw. Cuti’n Amah in a lo uk ding, na sungah um in na nunnak ah nunsimnak in famkimnak a umter ding.

Pathian in A thluasuah in mi a ttawnttem dah lo.

@ Smith Wigglesworth

(Visited 26 times, 1 visits today)

Comments

comments

Comments

%d bloggers like this: