Senpi Rorel Dan

Senpi Rorel Dan

By- Jeremiah 

2/3 Vote hmuh lawngih thu titluk theih mi pawl                   

 “Senpi Rorel Dan” hi thupi pahnih in kan zir khawm zo ih, tui tumah leitlun hmun kipih Cozah , Kohhran, Pawlkom le ziang vek Meeting nak hmun khalih theih mi le theih ding “2/3 Vote” hmuh tul mi thu pawl zir tlang le uh si. Cu mi hlanah “Vote” ci thum hi kan theih fiang ta a duh um zet.

Remtih tlan (General Consent) :Meeting kai member za te ih lungkim tlan mi thu a si. Member pakhat lawng khal in rem a ti lo cun General Consent ah pawm theih a si lo ih Vote lak a tul. Remti lo zo hman an um lo cun Vote lak a tul lo.

Vote tam sawn (Majority Vote) : Vote petu ngah tam sawn a si lo le Vote a hrek hnakih  tam ngah mi cu Majority Vote a si. Thu titluknak dingih hman bik mi a si.

2/3 Vote : Vote pek mi lakin hmun thum thenih hmun hnih Vote relnak a si. (Thimnakah; minung 15 Vote petu um mi thu ah 2/3 Vote cu ziangzat a si ti le 2/3 = 0.7 a si ruangah 0.7 x 15 = 10.5 a si vekin 2/3 Vote zat cu 10 a si ding. Cu vekin, minung 16 x 0.7 = 11 vote, minung 17 x 0.7 = 12 vote.

1) Dan hrampi remthat/ti danglam/Suspend ( Amend/Annul/ Rescind/Repeal/ Suspend )

Dam hrampi (Constitution) le Kaihhruaiawk Dan (By-laws) ti danglam duh le remthat tul can a ra thleng tikah 2/3 Vote hmuh tengteng a tul a si.

2) Thurel tluk zo mi ruatkhawmkir rawtnak

Ziangruangah si maw thurel tluk zo mi ruatkhawmkir tul / duh can a um a si le 2/3 vote hmuh a tul. Thu ti tluk a si lai ih remti lam lawngin ruatkhawmkir rawtnak a nei thei a si. Voi khat ruatkhawmkir a si zo hnu cun voi hnihnak ruatkhawmkir rawt theih a si nawn lo.

3) Thurel tluk zo mi thiat rawtnak

A parih thu thawn a bangaw ciah. A si nan, thil ti danglam theih nawn lo mi pawl cu ruatkhawm   le thiat dingih rawtnak a um a si khal le a tling lo. Thimnakah: in / ei zo hnu ih in / ei le lo dingih rawt, feh zo hnu feh le lo dingih rawt, lei zo hnu lei le lo dingih rawt.

4) Ruatkhawm lo / rel lo dingih rawtnak

Ziang thu khal ruat / rel khawm lo dingin rawt theih a si ih, a si nan 2/3 vote a hmuh a tul. Zo hmanih rel khawm hlanah zamrang te dingih rawt ding a si. Mi pa khatkhatin an rel zo hnu cun rawt theih a si nawn lo.

5) Agenda lo vekih feh

Thurel lai ah agenda rel hrih lo relkhawm tul can a um theu. A si lo le, agenda pakhat ih thu le relkhawm le ding mi agenda pehtlaihawknak an neih tikah agenda lo vekih feh duh can a um theu. Cu ti ih agenda lo vekih feh ding a si lo le a ra lai ding mi agenda hlan deuh ciahih rel dingih ret lawk (Order of the day) dingih rawtnak pawl cu 2/3 vote hmuh ta a tul a si.

6) Relkhawm titawpih vote lak rawtnak

Thu pakhat relkhawm a si zo mi cu Chairman khalin amai thu in a khar thei nawn lo, member lungkim tlannak lo cun. Relkhawm can a rei deuh tlang titu cun relkhawm titawp ih vote lak rawt ding a si ih 2/3 vote a hmuh a tul thung.

7) Relkhawm can ding bikiah (Limit of Debate)

Relkhawm can bikiah neih hi ti dan ding tha zet pakhat a si. Member in “Hi thu hi minute 15 sung vial relkhawm dingin ka rawt a si” a ti thei. A si lo le “Hi thu hi mi 4 in an relkhawm thluh ih relkhawm titawp dingin ka rawt a si”  a ti a si cun Chariman in 2/3 vote ih thu titluknak tuah mei ding a si.

8) Nomination khar / Limit tuah

Hrilawknak a um tikah mi paziat lawng nominate theih tin maw, a si lo le nominationa khar thlang dingin rawt theih a si ih 2/3 vote cu a hmuh a tul.

9) Can dangih ruatkhawm le / Committee hnenih pek rawtnak

Thu rel mi cu meeting le tikih relkhawm le siseh ti si maw, committee pa khatkhat kutih ret duhnak a um a si le 2/3 vote in thu rel tluk ding a si. Committee hnenih pek a si tikah ziangvek cin tiang an rel thei a si ti hi minute tel zel ding a si.

Hi mi lo thu dangdang 2/3 vote hmuh tul mi pawl a um lai nan a tlangpi thu in tu ih kan zir khawm mi thu pawl hi cu ziangvek meeting nak hmun khal ih tlun ding mi Senpi Rorel Dan a si. Hmai zarh ah reorelnakih that tul mi tha zetzet lawrkhawm mi kan zirkhawm tlang le ding.

(Visited 50 times, 1 visits today)

Comments

comments

Comments

%d bloggers like this: