Senpi Rorel Daan

Senpi Rorel Daan

(Parliamentary Procedure)

U.S. Army Major Henry Martyn Robert (1837–1923) ih ngan mi Robert’s Rules of Order

tih mi rorel dan hi lei tlun ih Pawl kom, Kawhhran le Ram cozah tin ih zirhawk bik mi le thlun mi a si. Ahnuai ih ca ngantu run ngan mi dan pawl tla hi cu mi Dan bu sirhsan ih ngan khawm mi a si. Kan rak hman palh le theih sual mi rorel dan a um a si le tu ihsin tidik tum cio uh si. Hi mi rorel dan a thei ih a thluntu cu khui vek rorelnak hmun khalah tel hman sehla a mualpho dah lo dingih mi upat a hlawhtu a si hrimhrim ding. Hi thupi ngan mi hi  zarh tin peh vivo thei dingih beisei a si. 

1. Chairman

Rorelnak hruaitu hi Chairman a si lo le President ti ih kawh a si ih, Sakhua thil thu ah cun Moderator ti ih kawh a si. A hna pawl cu:- a tikcu ih rorel thok, thurel ding puan, member thurel duh rak sian, ngennak le suhnak rak sawn, mi suaksual le luhlu pawl lak ihin rorelnak fel ten kilkhawi, hruaiawk dan dikzat le felzet ih rorel hruai, rawtnak rak dawnsawn, rawtnak pawl simfiang ih puan, vote fel zetih lak le thu thluk puan. Kang mei le buainak dangdang, Dan vekih rorel fel theih lo si maw rel thluh can a um lo can ah si maw amai thu in rorelnak cu a colhter thei ih remcang hmaisa bikih tongaw khawm le dingin thu a rel ding a si. 

Chairman in Dan vekih rorel dingin rorelnak a kilkhawi ding. Member pawl thurel lai ah  din a cuh ve ringring ding a si lo ih zah um zetin thu a ngai dingih simfiang tul le khaikhawm a tul tikah lawng a ding pei ih Chairman a din tik cun zo hmanih tibuai ding a si hrimhrim lo. Vote a pek ruangah thu titluk theih a si ding fang ti can lawngah vote a pe ve ding a si. Amai duh dan tilang lu tuk zawngin thu a rel ding a si lo ih, a duh dan vekih thu rel tlu dingin ro a rel ding khal a si lo. Cu vekin rorel a hruai a si le Chair dinhmun a ti zah um lo mei ding. KA ti’n thu a rel lo pei ih Chairman ngaih dan in ti’n a ti sawn pei.  

Rorelnak ah Chairman a feh man lo a si cun a aiawhtu  ding a ruat thei lo ih Vice Chairman khal a um lo a si cun Secretary hohanakin rorel an thok hnu ah cu mi thum hrang Chairman ding an hril ding a si. Rawtnak a nei ding a si lo ih member dang bangih thurel le rawtnak nei a duh a si le Chairman sinak midang a ap ta pei ih thu a rel ih rawtnak a nei thei. Cu mi thu reltluk  a si hnu

hlan loh Chair dinhmun a lakir thei lo. Chairman cun Senpi Rorel Dan hi a thiam hle a tul a si. 

2. Secretary

Rorel thu titluk zo mi pawl dik zetih rak hminsin ih ngantu cu Secretary a si. Thu reltluk mi pawl tuansuak dingih hohatu bik khal a si. Meeting ding thu theihter, rorelnakih member feh zat, feh thei lo tu pawl hminsin, thurel mi rak nganih theihter tul mi theihter, member list le ca pawimawh pawl, Dan bu le Kaihhruaiawknak dan pawl kilkhawi le meeting ih ken, Chairman hman ding Agenda fel zet a timtuahsak dingih amai duh dan menin thurel mi pawl a rak ngan ding a si lo. Meeting canah Chairman kiangah a to ding a si. Meeting theh ah Chairman thawn Minutes hnuai ah hmin an sign tlang ding a si.        

3. Meeting ko theitu

 Regular meeting  pawl cu a tikcu ruat cia ding a si. Regular meeting cu a tikcu a thlen tikah  Chairman thawn rawnaw in Secretary in a ko ding. Regular meeting si lo Special/Emergency Meeting kawh a tul a si le Chairman le Secretary remti tlannak in an ko thei a si. Chairman le Secretary in suahsual nak pakhatkhat ruangah Meeting an ko duh lo thu a fiang a si cun  Meeting member tam sawn lungkim tlannakin Meeting an ko thei a si. 

4. Quorum

Rorel thei cin member zat relnak a si. Dan bu ah member zat rel cia a um lo a si le member a hrek an kim cun rorel theih a si. Quorum kim loh cun rorel ding a si lo ih tikcu dang ruatih bang mei ding a si. A voi hnihnak khal ah quorum a kim cuang lo a si le cu member um zatzatin rorel theih a si. Meeting kawhnak um lo pi’n khui ah si maw member tam sawn um khawm hman sehla Quorum kan kim ti ih rorel tum mei hi dan a si lo. 

5.  Order of business (Agenda)

Agenda ding cu rorel thok hlanah tuah thluh ding a si ih rorel hnu ah agenda thar neih ding a si lo. Chairman le Secretary rawnaw in Agenda ding cu felfai ten an tuah cia ding. A tlangpi in:

 1)      Agenda ding puan, bet le pawmnak

2)      Cakuat siar le theihter tul mi theihterawk

3)      Report dawn (Treasurer hmaisa theu sehla, cun Secretary)

4)      Minutes hlun ih thu hnuthlurh tul mi relkhawm

5)      Agenda pawl relkhawmnak  pawl tla hi a tel ding a si. 

6. Minutes

Meeting ih thurel mi kimcang zetih ngan mi cu Minutes a si. Minutes ah cun a hnuai lam mi pawl hi kim ten ngan tengteng ding a si. 

a)      Ziang meeting ti le, Regular maw, special/emergency meeting

b)      Meeting nak hmun le a tikcu

c)      Member kai le member kai lo (Chairman a um lo a si le a ai hril mi )

d)     Minutes hlun siar suak le cu mi ihsin tuansuah zo mi pawl puan

e)      Treasurer le Secretary report

f)       Agenda relkhawm mi le relcat dan

g)      Meeting theh dan le ttheh caan 

Meeting theh hlanah Secretary/Minutes recorder in minutes siarsuaknak a nei kei remtul mi rem ding a si. Chairman le Secretary in Minutes hnuai ah an hmin an sign ding  a si. Hmin sign tikah pen ti tum hman ding a si.

Comments

comments

Comments

%d bloggers like this: