Sayamah Dorcas Lal Biak Eng le chinlandtoday.info

CT : Na hmin pum, nu le pa u nau ziangzat na nei, a tu khui tawk ah na um?

DLBE : Ka hmin pum hi Lal Biak Eng a si ih Bible tlawng ka kai hnu ah ka saya pawl in Bible hmin Dorcas in pe ih cutin Dorcas Lal Biak Eng tin in ko. Ka pa cu Ngun Hlei Sum a si ih ka nu cu Hai Men Kim. U nau pa (8) kan si. A tufang Delhi ah rawngbawl in ka um.

CT : Chinmi tam sawn ih kan lo theih daan tlangpi cu nauhak Evangelist tuan hmaisabik tiin kan lo thei ih a dik ko maw?

DLBE : Thusuttu na thusuhmi hi ka lungawi. Keimah ka theih ban tawk ten lo sang sehla, kan Chinmi lakah Pathian zangfahnak in nunau/mipa Pathian hna tuan tampi kan rak nei ko nan, nauhak (child evangelist) ti hmin pek ih kawhhran ih fulltime hna tuan ih hman mi ka rak thei dah ngelcel lo. Kei hi 1987 kum in Revival Baptist Church of Myanmar hmang in child evangelist tiih hmin pek ka rak si, a hmaisabik tla ka si men ding ka zum.

CT : Ziangtik kum ah rundamnak na co?

DLBE : 1983 kum ah a si.

CT : Ziang tik kum in nauhak hrangah na pum na rak pe aw thawk?

DLBE : Ka piangthar kum 1983 ihsin.

CT : Nauhak pawl hnen ih na duhsaknak le na lainat zia na sim fiang thei maw?

DLBE :Thusuttu, ka tongkam cun nauhak ka duhdawt le duhsaknak hi ka lo sim fiang thei theh lo ding nan ka sim thei tawk, ka lo sim ding. Nauhak pawl Pathian thuthennak an tawng ve lai ding. Piangthar lo ih hremhmun an thleng ding hi ka ngaingamlo. Cun nauhak te lai ih sin piangthar le Pathian tih cun an nun caan saupi Pathian ram hrang ah hmang thei lai a si.

CT : Nauhak zirh ah kum (10) leng na caan na hmang zo ih nauhak zirhnak ah ziangmi har na tibik?

DLBE : Nauhak ka zirhnak ih har ka ti theubik cu, keimah bulpak nun ah leh ka va tuah nak kawhhran khua ah thlacamnak a um lo tuk caan hi a si in ka thei.

CT : Pathian in a lo hmang zet ih na thusimnak ruangah nauhak ziangzat tluk Pathian lam ah na hruai in na thei?

DLBE : Ah!!! Thusuttu, ka rawngbawlnak ah nauhak ziangzat Pathian hnen ah hruai an si ti ka lo sim fiang thei lo. Asinan mi ziangmaw zat te cu Pathian hnen ah hruai an si ti cu ka fiang zet.

CT : Khawi tawk khua ih nauhak na zirh ah ha nuam na tibik le nauhak an tambik ttum?

DLBE : Hmun Lai, Hai Khawl le Minhlah khua pawl hi an si.

CT : Nauhak hi ziang tluk an thupi timi in sim thei pei maw?

DLBE : Nauhak thupit zia hi:-

1. Bible ah kan hmu, NT khalah Jesuh rori in a sunlawih in a thupitter theu.

2. A tui caan ih nauhak nun hin a ra lai dingmi san hnen ah thu an sim.

3. Nauhak an tet lai ih zin dik nun dik ih Pathian thu thawn kan hruai ahcun an pitling cun kawhhran, khaw tlang, miphun, ram pi ah hruaitu tha kan nei ding a si.

CT : Hlasak khal na thiam ih na hlasak hmaisabik thu in sim thei kem? Hlasak thiam in laksang tivek na rak dawng dah maw?

DLBE : Hi tivekih hlasaktu pawl lakih pakhat ka hung si ve theinak hi a pakhatnak ah Pathian ruangah a si. Cun a hleice in mirang missionary an rak rat tum ih hlasak ih rak thlun hmaisabik ka pi le ka nu ih kaihhruainak ruang rori ah a si. Cun, Pathian zangfahnak in ka beisei banlo in 2004 ah khan Lailun Foundation pawl in hlasakthiambik tin Pu Za Nei Sum award in rak pe.

CT : Hla na phuahmi pawl hi nangmah ih na tuarnak ruangah maw, asilole Pathian indirect in a lo pe? A hleice in ramhla pawl na phuah daan malten in sim aw?

DLBE : A si, a then cu direct in Pathian ih in pek mi an um, a then cu tuarnak sungih sintla an si. Cun ram hla pawl hi, kan Chinmi phun le ram ka thlir ban tawk te ka thlir ve nak le kan Chinmi ka duhawtnak, kan Chin miphun, Pakthian ih in thlawsuah hleice zia phuanglang le, kan Chin nun ze mawi, khua hmun le ram khal kengkawh vivo in in cawisang tu Pathian hngilhlo ding ah ti hi a si.

CT : Tuikum kha Bangalore ah MRE na theh ih ziang na zir bet ding…kawlram ah ziang na tuah ding?

DLBE : Hmailam ah Pathian in zianvekin in hruai ding ti ka thei hrihlo ih tu cu kawhhran ah fulltime rawngbawl tu cia ka sivek in Pathian a kawhhran hmang ih in pek mi hna tuan in tui kum in Falam (office) ah ka to ding.

CT : Kan Chinmi hlasak thiam ah zo na duhbik? Kan Chinmi sung ih hlaphuah thiam ah zo na duhbik, ziang ruangah?

DLBE : Hlask thiam ahcun a nun thuanthu te ka theih fiang ruangah a si ding Saya Lal Eng Lian hi ka duh bik. Cun hlaphuah thiam ahcun Saya Tha Nei Fai hi a hla quality a nei in a nung zet in ka hmu ih ka duh zet.

CT : Kan ram hrangah thinlung kekkuai in veiziat thla na cam?

DLBE : Vei ziangzat ka cam ti ka thei lo, nan caan tampi cu thinlung kekkuai rori in ka cam.

CT : Ziang ruangah tuini tiang pasal na nei hrihlo….na hua pang pei maw hi mi suhnak?

DLBE : Hi..hi..,himi hi mi tampi in, in sut cio ho khaw! Ziangkim Pathian lairelnak sung ah kan um ih thlawsuah pakhat vekih ka siar ve mi cu ka pianthar pek te in ka vang lai cahnak hi Pathian hrangah cem phawt sehla, ka upat lam caan hrang cu a mah in lairel seh tihi ka thlacamnak pakhat a si. Cun, zumtu u nau tampi in pasal in neihsan hram hlah in ti ruang ah maw…rawngbawl ih ka vah tam tuk nak ah maw, mi hin no contact number…no address…inti ih cuvek ruangah teh a si pei maw ti…he..he..he..

CT : Chinmi hi hla ah kan thanso in na thei maw….No nawn pawl hla phuah ih hla tampi sak ding na duhsak ko maw?

DLBE : A si, kan Chinmi hla ah kan thangso zet tin ka hmu, ka lungawi zet. Nonawn pawl hla thatha Pathian dil ih ngan suak in, sak sinsin sehla ti hi ka thu duhsam a si ve.

CT : Pathian hla na phuahmi zaten kan thei duh, a kum pawl khal?

DLBE : Pathian ih in pek mi zate hin fing (100) tha cu a si ko. In ngaithiam aw, a kum ka lo sim thei lo ding. Ziangahtile Pathian in hla in pe vivo ding ti hi ka rak ruat ban lo ih hminsin (record) thatte, rak tuah nak cang ka thiam lo.

CT : Ram hla na phuahmi pawl tla Chin ram ah an uar zet ti kan thei, na phuahmi pawl in sim aw la kan lungawi zet ding?

DLBE : Ka nganmi ram hla hi a mal zet. Ram hla taktak cu Mai Lal Pek Cuai ih sahmi “Pathian dawtmi semnak lairam” timi hi 1995 ah Tidim Bible tlawng ah ka rak phuah. Cun, Saya Henry Lal Hma Ngaih ih sahmi “Lairam nuamte” le “Iang Nei Lairam” pawl hi 2006 kum ih ka rak phuahmi cu an si.

CT : A hleice in “Iang Nei Lairam” timi le “Lairam nuam/Kan Lairam Nuamte” timi lak ih “Ram ti mawitu thingtin kim an cuai timi kha mi tampi in na duhsan an thei thiam lo ih malten in simfiang thei pei maw?

DLBE : Ramti mawi tu thingtin par mawi tin an cuai ka ti duh mi cu…kan Chinmi phun mawi tertu le cawisangtu mifim mithiam mi tha tampi in thihnak thlanmual in liamsan, cun a then cu nung cing in kan hloh. Chinmi phun in par a tlan ban nawnlo, cui pawl cu ram ti mawi tu thingtin par an cuai ka ti duhsan a si. Cun Thingkung le pangpar tla an hlo an ral vivo ko lo maw?

CT : Ziangmi kawkhran ah na um?

DLBE : Atu hi, Revival Baptist Church ah ka um.

CT : Nauhak na zirhmi minung ngaizet mi paziat lai an um ding na zum?

DLBE : A zat ciah cu ka thei lo asinan sukso ka vah nah ah Pathian rawnbawl in mifel zetzet an um timi cu ka hmu.

CT :Na nauhak zirhmi pawl na thei ttheh lo ding ih ‘sayamah nangmah in, in rak zirh zo’ tivek ih na hnen ra ih na rak zirhmi an si thu an ra lo sim tikah ziang tin na thinlung a um?

DLBE : Ka lungawi tuk ih Pathian hnen ah lungawi thu sim in ka mitthli a luang theu. An hrang ah cat bang lo in thla ka cam.

CT : Na Hla phuahmi na duh bik mi in sim thei pei maw?

DLBE : “Ka Bawipai Duhdawtnak” Pari ih sahmi, “Caan Khatkhat Tahnak Hmun Ah”, Ramte ih sahmi, “In Then lo Ding” Mai Zite le Henry ih sahmi pawl hi an si.

CT : Chinmi kan lungrual na ti ko maw?

DLBE : Thil tampi le zin tampi ah kan lungrual ko nan hmailam ke kar bet ding tampi kan nei lai in ka thei.

CT : Chinlandtoday website thlirtu pawl hnen ah ziangmi thu na cah duh?

DLBE : Wesite thlirtu u nau zaten hnenah kan Chinmi pi hrangah thansohnak ding in fimnak thatha, hawl suak dingah mit kau sin ih meng in le zemsuak sin ding le kan Chinmi lakah, sunlawih cawisan awk nak, duhsaknak hlan aw tawn in, hmailam ah ke kar vivo ding hi a si.

CT : Na caan sunglawi in pek ih kan lungawi tuk maw…

DBLE : Hi….aw, kei tla ka lungawi tuk.

Comments

comments

One Comment

  1. Van Lal Thlan says:

    Syamah Nu Eng hi Pathian in a hmang tak tak a si, kan ram thangphawk nak ding-ih thawh hlawk bik pawl a si, Pathian in pasal thate a pek leh ding ti-ah ka zum,,,

Comments

%d bloggers like this: