Saudi Arabia Ah Sri Lanka Hnenum Naute That Ruangah Lu Tan

1098853867RIYADH : Saudi Arabia ram ih hnenum va tuan, Sri Lanka mi nunau cu, a umnak inn ih naute thattu ti ih puhnak thawn a lu tansak asi ti in Saudi Arabia ram ih Interior Ministry cun an sim. Rizana Rafeek cu a umnak ih naute nu thawn naute thihnak thu ah an elaw nasa ih, court ah an thu thlen asi. Rafeek cun, an naute cu a thah asi lo thu le, palang sung ih thilti pakhat a in ngah ruang ih thi asi ti in asim.

A pi nu cun, naute cu a mai ummi asi ih, hiti ih damlonak dang nei cuanglo ih a thihnak hi a mah ih thah hrimmi a si ti in a puh ve. Cutin court ah an thu relsak asi ih, ramdang mi hnenum ih hnatuan Rafeek cu a mawh asi ti in an theihsuah ruangah Saudi Arabia ramsung, Dawadmi ramthen sungah a lu an tansak asi. Human Rights Watch ( HRW ) pawl cun, Saudi siangpahrang hnen ah hi an thil tuahmi hi a diklomi asi ti in an demnak thu an sim.

Hi naute thihnak hi 2005 kum ah khan asi ih, cutawk lai ah Rafeek hi kum 17 mi lawng a rak si lai. Tuikum thar sungah mi 2 Saudi cozah hin thihnak dan a tat zo. Hi hnenum Rafeek le rittheihthil zuartu ti ih an puhmi pa pawl an si. Nikum sungah khan, HRW pawl le mi dangdang ih an zohfiahnak ah, Saudi ram hin mi 76 pawl hnen ah thihnak dan an tat ti asi. Curuangah, Saudi cozah hin thu thaten a ruah a tul ih, thihnak dan hi olai tei pek a thatlo thu le, thu thatei ruatta lo cun mi tha taktak khal thihnak dantat a olte asi ti in HRW cun a sim.

Comments

comments

Comments

%d bloggers like this: