Sang Sawn Duhdawtnak

Šianglianuk Ķianghrol

Fala thawn kan tthenawk hmaisabik ttum kha ka mang lai. Culai ahcun suakthuan ka si. Suakthuan duhdawtnak ih a ken tel mi ruangah ka rak nuam aw zet. Van khal khi a tleu cuang. Khawdur khal an var cuang. Atthlak zet ih hni siamsiam mithmai thawn ni tampi ka rak hmang. Ka nui’ phone hmang in nazi tampi sung ka fala ka bia.

Tawkfang ah, i hmuh a duh nawn lo thu i sim thutthi. Ka kekkuai. Ka thinlung cu kham zim ihsi tla thla vekin ka thei. A niam timi ih hnuaiah ka tla thla. Ni a tleu bik mi van hman a thim ih a rong a uk riamriam in ka thei. Lungngai riahsia in nittung ka rau ttheu. Phone thawn zohman ka biak paih nawn lo ruangah ka nu in a phone khal a lak sal. Tthianrual ah ka uico lawng hruai in hramlak ah hlapi tiang ka vaktawi. Ka ai a puang sal thei pei maw timi khal ka fiang nawn lo.

Asinan, can tawkfang a rei cun ka thinlung hriamhma a dam ih, ka ai a puang thei sal. Himi vandumkulh ahhin no lai ih duhdawtnak, sungtuah khawvel duhdawtnak, hi duhdawtnak tifinriat ih tidai for khat men a si thu khal ka zir ngah. A lehhnu kum ra feh vivo ahcun, fapa pakhat dinhmun ih duhdawtnak, neihawknak ih um mi duhdawtnak, pa dinhmun ih duhdawtnak, rannung zohkhennak ih a um mi duhdawtnak, rualpiawknak ih um mi duhdawtnak pawl ka zir ngah vivo. Leitlun duhdawt dan khal ka zir ngah. Hringnun duhdawt dan khal ka zir ngah.

Duhdawtnak sangbik a si mi, Vancung ih kan Pa in kan parih a neih mi Duhdawtnak khal ka zir ngah vivo. Cui’ Duhdawtnak cu duhdawtnak hmuahhmuah an luansuah thoknak a si. Cui’ Duhdawtnak ihsin sersiam mi kan si. Kir sal kan tumnak khal cui’ Duhdawtnak ahcun a si. Ni tinte’n ka thinlung ah rung leng ding ih ka sawm mi le leitlun hnenih hlawm ka tum mi khal cui’ Duhdawtnak cu a si.

Duhdawt na si timi hi thei ringring aw! Hi leilung ih na um sungah na theihthiam cawk lo ding mi Sang Sawn Duhdawtnak thawn duhdawt na si. Pathian ih Duhdawtnak thawn tuini, thaisun, a kumkhua in duhdawt na si. Himi duhdawtnak hrangah na thinlung sangka ong aw. Lo duhdawt thei ding in Pathian kha cohlang aw. Lo kaihruai ding in Pathian kha cohlang aw. Leitlun hi ttha sawn, mawi sawn, le hmun duhnung sawn ih na tuah theinak ding ah, nangmah ih a um mi duhdawtnak kha cakter sinsin ding in Pathian kha tuahter siang aw. Cumi na tuah ahcun lungawinak cu na ta a si ding ih, lungawinak centu le midang hlawmtu na si ding.

Hram: Joseph J. Mazzella ih “A Higher Love.”

Comments

comments

Comments

%d bloggers like this: