Sang Hnakih Thupi Sawn

November 12

TlawngKai Ninga

Sang Hnakih Thupi Sawn

Siar:

Johan 6:25-36

Jesuh in, “Thungai in ka lo sim: in ra hawl hi hmuhsaknak ka tuahmi nan theihthiam ruangah a si lo, sang khopzet ih nan ei ruangah a si,” a ti.   – Johan 6:26

Kumkhat Sung Baibal:

–   Jeremiah 51-52

–   Hebru 9

Kum zabu 17 lai ih Quaker kawhhran cangvainak hotu Issac Pennington in, “Bawipa in Amah parah nung dingin i zirh. A hnen ihsin kan ngahmi parah si loin, Amah sungah um dingin,” a ti. Johan 6 sungih tarlangmi minung pawl khal Jesuh ben in nun an duh. An hrangah rintlak a si ruangah si loin rawl a pek hngai hlei ah Rom acozah kut tang in a luatter hngai thei tiah an ruah ruangah a si.

Jesuh ih sang le nga in rawl a donak cu anmai’ ruahnak ahcun an hrangah thil a ti thei zia hngetternak ah a si. Mipi ih an pan sannak an beiseimi cu siangpahrang danglam a si timi thu a theih ruangah Jesuh in a tlansan hngai (John 6:14-15). A thaisun ah an hawl ih an hmu, an hawl hlawhtling dingah an ruat (cc. 22, 25-26). Curuangah an thlun, an ruahmi pe thei dingah an zum. Asinan Jesuh cu cabuai pawl a namtluk ih Amah cu “Nunnak Sang” a si thu a theihter hngai (cc. 32-33). Annih cu Jesuh hnen ihsin nun khawsak daan ttha deuh an duh, asinain Jesuh cun “kumkhua nunnak pe dingah ka ra,” tiah a ti (c. 40). Jesuh a zumtu lawng in nun famkimnak ngaingai cu atu le kumkhua in an hmu ding.

Jesuh thlun aw, ei ding rawl, sang a lo pek ruangah si loin na nunnak ih a haalbikmi, sang hnakih thupisawn nun hnangamnak pe theitu a si ruangah. Amah thawn kumkhua pawlkom dingin Jesuh thlun aw.    – Marvin Williams

Jesuh hnen ka ra ih ka in,

Nunnak cerhti thiangte;

Ka ti haalnak a riam, ka thlarau a tthangphawk,

Atu Amah sungah ka nung. – Bonar

Na nun cu Khrih in a khat tikah

a famkimmi tlamtlinnak na tep ngah ding.

Comments

comments

Comments

%d bloggers like this: