Same Sex Marriage Dodal Ding Maw?

Mipa le mipa siseh, nunau le nunau siseh, Dan vekih an neih awk siannak hi biaknak (religion) ihsin kan thlir ahcun a cang thei hrimhrim lo. Asinan America ram Dan vek a si ahcun ‘minung covo’ thlei dan awknak um lomi ruangah kawhhran tampi khalin an siannak a si thei.

Europe ram khalah ‘Minung covo bangrep’ timi acozah in a hmannak ram ahcun ‘Same Sex marriage’ timi hi hman a si. Khatlam zawngih kan ruah ahcun ‘Democracy’ ram sungih ‘Human Right’ thuneihnak le zalennak in ‘Socialist’ le ‘Communist’ pawl relsiat a hlawhnakbik khal a si. Mipi duh dan si loin, hruaitu duh dan vialih ram uk awknak duhtu pawl cun hibangtuk mawhnak hi rel nuam an ti zet ding.

Hitler in Judah miphun lawng si loin ‘mi bang lo (thluak kim lo) le Gay (lesbo telin) khal ‘Concentration Camp’ ah a rak ret ve ih, mi tampi an thi. Piang sual kan sinak hi ‘Kut le ke’, mithmai le lenglam zohnak ihsin ‘kim lonak’ lawng hi a tahnak a si kem? Thinlunglam kan zoh a tul ve lo ding maw? Mipa sisi nunau thinlung nei, nunau si cingin mipa thinlung neitu pawl hi zomtaih ding maw zangfah ding timi hi Khrihfa pawlin kan ruah cu a tul.

Asinan, kan Pathian cun ziangtikah hman ‘Same sex marriage’ timi hi a siang lo ti cu kan fiang cio. Rom cakuat ngantu cun, “Hih minung pawl in Pathian theihnak cu an thinlung sungah caamter an duh lo ruangah thinlung borhhlawhnak thlun awlaw dingin Pathian in a hnon ta hai. Curuangah tuah lo ding thil pawl kha an tuah..” ti’n ‘Same sex marriage’ thluntu pawl thuhla ah napi’n a ngan (Rome 1:24-28). Tulai dinhmun ahcun milem biaknak phun hi a si rori.

Gay le Lesbo pawl hi thinlung lam piangsual an si maw? Piangsual si loin mai’ hiarnak danglamter sawn ha an si?
Mipa hmuihmel nei cingin nunau thinlung neih hi a cang thei ngai maw? Atlun ih suhnak pawimawh zet pathum khi ‘Aw’ ti ding an si thluh. Minung taksa thanlen dan ahhin kan theih ban lomi tampi a um. Nunau khahmul nei, mipa pawhte tum an si ahcun piangsual kan ti thei. Asinan, nauhak lai ihsin zohkil awkdan dik lo, forhfialnak le hiarnak pakhatkhat ruang ahcun ‘hiarnak danglam’ ti’n ruah sak thei an si ke. Scientist pawl cun mipa pawl DNA ih chromosome khalah ‘nu’ sinak tam sawn an hmuh can a um lala! Cuih ruangih thinlunglam piangsual pawl teh ziangtin kan ruat ding? Thlahtu pawlih sualnak ruangah maw, anmai’ sualnak? Zangfah ding maw, zomtaih ding?

Bawi Jesuh ih tahthimnak kha kan zoh sal a tul. “Mi pakhat in a lo sungah thlaici tha a vorh. Zan khatah mi hmuahhmuah an ihthah sungah a ralpa a ra ih rawl ci lak ahcun hrampi ci a  vorhta ih a tlan hlo. Thlai kho cu an hnung thang ih an vuih tikah hrampi khal cu an lang ve. Cule an hnen-um pawl a hnenah an ra ih, ‘Bawipa, na lo sungih na vorh mi cu thlaici tha an si lo maw? Khuiin so hrampi hi an rat?” tiah an sut. Anih in, “Himi a tuahtu cu kan ralpa a si” tiah a sawn. Annih cuh, “Hrampi cu kan va bawt pei maw?” tiah an sut sal. Cutikah anih in, “Bawt hlah uh, ziangahtile hrampi nan bawt zawngah rawl kung
tla nan bawt cih pang ding. Rawl laak a cut hlan lo rawl kung le hrampi cu thang tlang ko hai seh….” ti kan hmu. (Matt. 13:24-30).

Zumtu ti awtu (rawl kung) lak ahhin zum lotu (hram kung) hi hmuh thei rori in an um. Lo neitu ‘Pathian’ lawng si loin Lo hnatuantu (dungthluntu) pawl khalin an hmu, an thei. Asinan, rawl khawm tikcu a thlen hlan ahcun ‘Bawt’ ding an si lo. Hi thu hin ‘Kawhhran sungih same-sex-marriage siseh, borhhlawh a phunphun thup aw khal’ Amah Bawipa a rat hlan ahcun ‘thlei dan ciamco’ a tul lo ti a rel fiang. Ziangahtile Pathian thu kan thei cingin kan sual, kan buai, kan hlo, kan huatsuak in kan thu kan duh sal lala theu. Hmuh thei ih sualnak le ‘a thup ih sualnak’ hi a danglam tuk lo.

Anetabik ahcun, Pathian ih hnon zo mi pawl ti’n zohman kan hnong ve thei lo ding. Ziangahtile ‘Annih pawl cu kan lakih umter sian an si ding ih, cu pawl cu run suak dingin tuanvo kan nei lo ke maw? Kan run suak thei lo a si hmanah kan sim cu an tul. Evangelist le thusimtu tam sawn in ‘a thei hrih lo pawl hnenih Pathian thu sim hnakin’, a thei zo, a fim kerker zo na’n um tha duh lo, thei nacing ih sual hrim pawl kan veh ih, cun, a thei cia zo pawl kan sim awk rinringnak ah kan can a cem rinring sawn a bang. Kan ram kawhhran tumtum khalin ‘Mission’ hnatuannak ngaingai hnakin a um cia kilkhawinak kan buaipi sawn a si ahcun ‘Sam sex marriage’ timi ‘rawl kung lakih hram kung cu nitin a thang deuhdeuh ve ding’ ti a phan um nasa.

(Visited 434 times, 1 visits today)

Comments

comments

5 Comments

  1. zumtu karlak ih hivek thu um ve theu hi thin a na ngaingai,christian kn si kn ti konan zum lo tu hnak in kn luarsawn theu fon siih a poi ngaingai.Thlacamnak in khal bawm cio uh si.

  2. Ram thangso pawl ih ‘Same sex marriage’ an buaipi thok ihsin thuthang tetepawl ka rak zohhliah ve ih a rei hlanah khap theiloin ‘Same sex marriage’ an siang hrimhrim ding tiah zumnak ka rak nei cia. Ka zumnak hnakin thuhla a zamrang deuh. Tu ahcun leitlun ram tam sawn ah thehdarh a si zo. CT cangantu ih ngan bangin zumtupawl ih Cathianghlim Baibal thawn cun a kaih aw lo cu a si.

    Tui cangantu ih ngan bangin gay pawl ih khawsak daan tla theihthiampi in zawnruahnak kan neih thei ahcun kan thuruah a nuam deuh ding ka zum. Tawngpa kalh ih kalh siloin a thoknak san le a feh vivo daan ding theihfel a tul ngaingai.

    Cangantu hin a ngankimzet. Gay ih canglo dingah nulepa khalin tampi an kham thei bet. Mipa pakhat cu nunau si a duhzet. Culai ah fala pakhat in nunau mawizet na bang tiah a rak ti ngelcel cumi ihsin fala vek in a thuam aw ih fala vek thinlung a keng cih. Cuvekih um tla an um thei lala.

    Apemorej ca run ngan theu awla.

  3. stephen san says:

    Same sex marriage thu thawn pehpar in mal ten rel duh ka nei.Zumtu Khrihfa pawl cun Same Sex Marriage hi thil rapthlak leh sual bikah ti seh la ka sual lem lo ding.Cun church ti vek ah cun Same sex marriage hi sian ding a si lo hrim hrim a si ih zum tu pawl ih hna tuan ding mi khal a si.Asi nan ram constitution or policy, law ti vek ah cun kan do thei tak tak pei maw? Ziangah ti len Kan chin ram hi 70 lo len 80 % hrawnglawn hi Christian mi kan si ih a dang pawl cu sakhua dang zum tu kan si hlei ah Gay leh Lesbian ti vek kan mah sung ah a ra tam vivo ah cun Politician pawl in vote ngah nak ding hrang ah Same Sex Marriage hi a lung kim pi ve ding, Cu lawng si lovin Democracy dan (policy) hmangin Kan ram dan sung ah legal takin same sex marriage a um thei nak ding ah in ra nawr ring ring ding a si.Ziangah tilen Democracy ih tumtah bik mi cu mipi zalen nak leh mipi duh dan ih feh hi a si bik.Hlan lai ah cun Nunau (woman) pawl in tu vekin right an nei lo ih Zum tu hmaisa pawl khal in Nunau bulpit tlun kai ih thu sim tivek pawl hi kan Christian dan a silo , a si nan tu cu Nunau (women) rights nei lo nak ram hi Muslim ram then khat ah lawng kan hmu thei ti cu zo zo khal in kan thei, cu ti vek tho tho in caan a rawn rei vivo ih kan cang kang vivo ah cun Same Sex marriage hi sual ah kan hmu ding ka zum lo Christian dik tak kan si ring ring lo ah cun!Kan ram dan hram pi (constitutions) ah siang hman seh la Kohhran (church) tivek ah cun thih tiang khalin kan do kei uh ti hi ka lo sawm a si.Gay leh Lesbian pawl ih an mah feeling an rel mi leh mi ih tih duhdah an tuar ve dan hi rak ngai ve ah cun zangfah an um zet, an mai duh mi leh hril mi a si hrim hrim lo an sual ruangah khal a si lo, curuangah kan chin ram sung ah Gay leh Lesbian timal (reduce) leh tihlo nak ding kan tuah thei mi tha bik cu, thla cam sak a si bik ko, thawi ,vuak, that, leh constitution ah sianglo ruangah Gay leh lesbian a cem in a reh dah lo ding!
    Salai Stephen San

    Ottawa

  4. Sahri Vaithuan says:

    A thupi mi cu pumpak in Pathian tihzahnak neih ding hi a si.
    Biaknak lam kan hruaitu pawlin an fingkhawi mi tuurual pawl kha an ciahneh a tul rori. Asinan cuvek pastor teh kan nei maw cu!!

  5. Kan doreh thei ding mi cu a si in ka thei lo. thu pakhat.. Rit theih nak thil
    tla hi , Cozah, khawtlang, Kawhhran .etc. kham theh a si nan ti reh thei a si cuanglocu vek tho a si in ka thei. .A sinan kan do neh cuang lo ding ti ruangah, lungkim pi nak cu nei lo seh la. Kristian kan si vekin mah le Inn sungsang le Kawhhran ciau vah tan lain, kan Pathian thu thawi a rem awk lo dan rel uar sehla. U S A President tuanlai Obama vek cun lungkimpi nak phuanglo sehla,ti hi si ka ruah ve dan…..

Comments

%d bloggers like this: