Salai Thawm Hlei Mang ( Pathawm ) thawn hmaitawn thusuhnak

Malaysia ah Laimi pawl an anhai ti thei ruangah Salai Thawm Hlei Mang (Pathawm ) cu kan hnen ah a rak thleng. Veikhat hmuh veten nel um zet
le mit hmai pan zet siamsi ten a um ih kawm a nuam nasa. Cuticun a riahnak
Imperialhotel ah lentlang cun va lengin hmaitawn thusuhnak a nei.

Lentlang : Na pa le na khua, tui na um nak khua pawl in sim thei pei maw?

Pa Thawm : Ka pa cu Rev. Hrang Kap Hnin a si.
Falam ih pitling ka si. Unau mipa 2 le nunau 3 kan umih, keihi upa bik ka si.
Tui ka um nak hi Basel, Switzerland ah ka um.

Lentlang :Ziangmi hna na tuan ti in sim thei kem?
Pathawm : City mission kuthnuai ah tuan in ka tuanvo
cu “Counsellor (kan tong cun Seelsorger anti) for Gastronomie workers in Basel”
(Laitong cun Restaurants le Hotel hnatuan tu pawl hrang ih Pastor/Counselor
phun kanti pei cu).mipum 70-100 karlak an si ih leitlun miphunkip biaknak pawlkawm an si.

Lentlang : Kawlram na um lai ah ziangtluk kanmiphun hrangah na rak pumpe aw?
Pa Thawm : Mandalay university ah kum thum nak ka kai lai ah 1988 buainak a rak suak. Cutik ah mah le um nak ciau Laitlang ah kan rak tlungih Falam peng tlawngta pawlkawm President ah in hril. CNF ah 1989-1992 tiang Finance Secretary ka tuan. CNF sungah then awknak a thlen hnu Delhi kan thlen hnu ah biaknak lam cangvaihnak le pawlkawm ah hotu lamah ka cangvai vivo.

Lentlang : Biaknak lam ah ziangmi degree na ngah?
Pathawm New Delhi ah BD ka theh, Switzeland ka thlen hnu ah biaknak lam ih hnatuan nak thawn pehpar in kumkhat ka kai bet.

Lentlang : Ziangtik kum ihsin Switzeland na thleng ?

Pa Thawm : 1995 Geneva meeting ka kai hnu tlung nawn lo in pian tawk pian ti in ka um lanta.

Lentlang :CNF ih nunnak tiang thap in hna na rak tuan lai ah na tuah ngah lo mi ti ih na seherh zet mi a um pang maw?
Pathawm:Ka tuan mi ah phur zet le huam zet in ka tuan ih, ka lung kim zet ko.

Lentlang : CNF le CNA ih danglam nak?
Pathawm CNF cu party lamzawng in sim nak a si ih, CNA cu ralkap an si.

Lentlang : Kan mipi in tuini tiang felfai zet in kan theihthei lo mi CNF sungih thenthek awknak a thleng mi hi in sim thei pei maw?
Pa Thawm : Dung lam thu cu a liam zo mi a si ih keimai duhdan cun sim rero ka duh lo nan,, thudik le thu fiang nan theih ding cu a tul ruangah a tawi zawng in ka lo sim ding. Kan CNF hotu bik parah pengdang kan unau pawl ih zum lo nak an nei, cucu nunau lam ah a si. Cumi thu cu thu dik a si le silo
hawlsuak tu (inquiry) committee khal a rang thei bik in kan tuah. Cutivek in thuhla thaten le felfai ten hnatuan a si rero lai ah Pengdang kan unau (Hakha) pawl in keimah thleng in kai (kidnap) in tuah.

Cumi thuhla pawl pakhat hnu pakhat felfai ten le rualrem ten rel kan tum rero nan, kan duh vek in thil pakhat hman feh nawn lo in an mah ( pengdang ) pawl duhdan lawnglawng in feh an tum. Cutikah thu tha rel a theih lo ih kan tuan tlang thei lo. Curuangah kan mah le kan mah karlak ih thisen a luan hnak in kan nih cun thinna mitthli tlak cingin dung kan sip san. Keimah pakhat ruahnak ahcun kha mi kan lungrualnak a cem ni, kan miphun hrangih teima zet le kan miphun hrang beisei nak nei zet ih hna kan rak tuan mi cem ni cu tui ni tiang ih ka thin nat bik can a si tin ka ruat. Cutin ka lo sim tikah zohman thinnat ding a si lo ih, an mah khal huat ding a si cuang lo. Kan tuan pi lo a si khal le kan va do ding a si lo.

Lentlang : Tui na dinhmun ah kan miphun hrangah na tuan thei mi le na tuan rero laimi theih kan duh nan?
Pa Thawm : A tui ka um nak ah Association for Children Project in Burma timi pawlkawm ka din, an mah Swiss mi pawl thawn kan tuan tlang. Cumi pawlkawm cun Falam le Kalaymyo ih Hngaktah pawl ih an tulmi 80% kan zoh thei.

Cun ram leng um kan milesa pawl in Lailun Foundation kan din ih cumi ahcun tuini tiang Secretary ka tuan. Hi Lailun Foundation hi a tu kan tawn cuahco rero mi kan miphun hrangah hna tampi tuan thei mi le tuan lai mi kan nei. Kan hnatuan mi pawl cu

(1)Kan Laimi san thuanthu ngan ding
(2)Kan calai thanso nak
(3) Kan miphun in harsatnak kan tawn tikah a cang thei tawk in a tul
dandan in bawm ding. Kan tuan thei mi umsun le kan tuan ding
hrimhrim a simi pawl kan tuan nak ah sumsaw le ruahnak thatha in rak pek ih in
bawm dingin le tuan khawm dingah ka lo sawm.

Lentlang : Kan miphun in seherh nak ruangah in rak tlawngih lamzin fehnak man teh zo in, ziangmi pawlkawm in an lo bawm? Zianghmuah a cem?

Pa Thawm : Pathian in thlawsuah tampi in pek ih ka ratnak man cu keimah ten ka tum awk theh. Malaysia paisa Ringgit RM 9,000(Kyat ting kul hluannga ) hrawng a cem.

Lentlang : Malaysia na rat nak ihsin kan miphun hrang thathnemnak ziangmi a um ding tin na ruat?
Pa Thawm : Keimah pupak hrangah ka miphun le ka rualpi hlun pawl tla ka hmuh sal tik ah tampi ka lungawi. Cuihleiah Refugee thuhla thawn pehpar aw in CARC hotu le CRC hnatuan tu pawl siseh thu tampi kan rel khawm thei ih tampi thathnemnak a un mko ding ka zum. Nan umtu khawsak dan ngaingai khal ka lo hmuh tik ah ka diriam zet.

Lentlang : “Kan miphun hrang hna a tuan nak ah nupi neih a hngilh zo” an lo ti ih thungai a si maw? Cun Lai fala pawl in lawnglai a simaw tin in sut tu an tam hnuaihni ih ziangtinha?
Pa Thawm : Fala (rualpi ) cu ka nei ko.Pathian in rem a ti sile a rei hlan ah a mah Pathian in pumkhat ah in kawm ko ding tin ka ruat. ( A fala thlalak cu KLIA airport ihsin a pawksuak zik lawngah in hmuh, kan khawpawl ti dan cun ” mifa maifa fala hmeltha a si ” Amah lawngte Laifala a sile silo cu kan sut theihhngilh riai.)

Lentlang : Malaysia um kan Laimi pawl hnenah thucah na duh mi?

Pathawm : Kan mino pawl in mahte kan kilkhawi awk thim nak le kan tuanvo( Self control & Responsibility) thei le tuan dingah cah ka lo duh. LCF nan cangvaihnak hi faktlak nak tampi ka hmu. Mino pawl in mahte kan kil khawi awk thiamnak kan si ti thei in midang Organazation pawl thawn pawlkawmnak nei thei uhla duh thusam a kim bet dingih Pathian hrang hnatuan nak ah a hnget khauh vivo ding,

Lentlang : Hitivek in bangzet le ithmu khawp lo cingten na can tampi in pek mi parah le kan miphun parah duhsaknak thu tampi in sim ruangah kan lungawi.

Pa Thawm : Kei khal ka lungawi.

 

Comments

comments

Comments

%d bloggers like this: