Salai M An Duai Pang Maw

mqdefault

Salai M An Duai Pang Maw

Awttha hrilnak ih pakhatnak ngah ringring cu ka si dahlo. Nawmnak hmunih hlasak dingih zangfah dilih sawmmi khal cu ka si dah cuanglo. Biak inn ah ka hlasak ngai duh ruangah mi khawm an phurphah ciamco ding zumnak thawn hlasak ding an thiah mi khal ka si dah kello. Hlasak lam ih pumcawm ding ka silo cu ka fiang zet. Cuvek cingte cun hlasaktu pawl ziangtin an raak kio, an aw a tha maw, an hlasakmi ah ziangtluk an um, tivek pawl cu keimah le thiam tawk te in ka rak zohhliah theu. Leitlun zaitha zuamawknak The Voice, X Factor, ….Got Talent tipawl le…. Zaithiam pawl ih an relmi pawl zohih zingzoi ruangah hlasak a tul lem sawm!!! tiin hivek pawl TV ih an suah cam pohpoh ah hrelh loten ka rak zoh ve theu.

Cuvek tthiamtthiam in, kan Falam hla suakthar pawl khal hrelhlo in ka ngai thei cinmi pawl le ka lei theimi pawl cu leiin ziangtin ansak? Zo pawlin an sak? Ziangvek lam hoiin hlabuk (Album) an tuah tipawl cu keimah le theitawkten ka ngaihven ve theu.

Falam pawl thuanthu ngantu pakhat kan pa le san laiih hlabuk rak suah hmaisa le Falam Awnmawi mit rak ongtu hmaisa, Salai M pawl in hla an thunsal ding tiih an tiven ziangvek pawl an rak suahsal pei tiin ngai ding hngakhlap in ka rak cuan ve zet. Asaktu pawl hmin an tarlangih ka thinah hniarte pakhat a um cih!! Asinan an hlasak thar sal mi pawl cu ngai ka cak lawlaw. An hlabuk sung ihsin ka rak duhbik theumi pawl tla an saksal ti ka theih tlacu ngai ding ka hiar lawlaw.

An hlathar Fahning Zuun cu a hawng suak ngaingai. Van Arsi thep eng bangin kan Chin; Falam pawlcun kan thlir cio ding tiah ka zum. Ziangah tile Salai M cu Falam tong ausuah pitu mi hmaisa ansiih kan hrang ahcun Zinglam Deirel Arsi an rak si si.

Fahniang Zuun, Salai M hlabuk a pakhatnak ihsin a nettiang ka ngai. Ka Nunak Par Mawite ih an rak sak dan thaw cun danglamnak tampi an nei. Kan santiluan thansohnak ruangah tla tampi a si ko ding.

Salai M pawl ih hlapawl ka hawn ngai veten an san laiih an nunphung le an um dan pawl tampi a tarlang cih thei tisehla a sual tamding ka zumlo. Fahniang Zuun ih an saksalmi in zohsehla; A hmaisabik ih an sakmi Inn Sangpa ti ihsin anetnak Zureu Langkhat tiang an hlapawl ih an khih duhmi cu khalai sanih an nawmnak le an vantlang nun pawl an langter in keicun ka thei.

Khaivang lai ahcun fala khal zuri in an lengtheu, Inn sangpa khal an ler in fala an leng theu ti pawl an rak ausuah pi.. Phunsang le milian pawl cun an duhmi fala an nei thei tipawl, cuvek khal duhdawt taktak ahcun zianghman a poi lo ti pawl khal, an sanlai ih zirin; Tui Sanah Cuvek A Umlo Duhawknak A Thupi Bik ti khal an sak hngehnge… Khalaiih um mawi lole le nunphugn tha lo pawl ningzah tlak a si zia khal an rak tilang ih kan nungphung mawilo pawl remnak ding khalah tampi an rak zuam ticu hmuh a theih. Cui rualrual in Zu ri an rak uarzia kha Zureu langkhat, fang nga’in ka lei ti rori kha an rak uar bik pakhat cu a si ve mai cu a si kha…

Lairawn, Tahan Maw Laitlang Falam

An hlasakmi pawl ah hin hlanlai ihsin tui a tharbik khalah Lairawn khua hi nasazetin an rak telh. Tui hlathar ah Tahan Khua titla a tel hngehnge ih..cutin Lairawn ti pawl an hla thu ah hmuhding an tam zet. Keimah ten ka rak ruah micu ziangruangah Salai M pawlhin Falam khua le Laitlang hi rak telh loin Lairawn tihi an rak telh lar ciamco sipei tiin ka ruat. Kan Khawpi Tahan Khua titla in an au kio…

Falam mi pawl ih kan uar zetmi le kan thinlung nehbik zaihlasak thiam pawlin kan Falam khawpi uarnak an sak lo hi ka mang a bang zet. Solomon Menrihai in Hakha Khawpi titla a au kio ih, BJ khalcun Tahan Fala tiin….. Falam khua mawinak hi simding a um lo sipei maw? Salai M pawl khalcun Falam ticu simhlah Laitlang tihman sallo in Lairawn tikha an rak uar bik mi cu a si. Kan Falam Arsi pakhat Salai Sun Ceu khalcun A Mawi Sin Sin Ding Lairawn a ti ta riai mai. A va mak em! Kan Falam khawpiin mawinak a neilo maw hawn ti dingcun Salai Tuan Ling Thang cun Falam Khua, Na Hmin Thang Sin Seh Law San Deng Tiangin a rak ti ngam ve thotho. AW! Miphun le hnam duhdawt ti ah a hmun le a ram khal duhdawt a tul an rak timi hi kan zaihlasak pawl in an rak hngilhhrim the a sisawn pei maw!!!!!!!

Mai Dawt Hlei Hniang Lo Teh An Um Maw

Fahniang Zuun a suak hnu reilo ah ka rak ngai ngah ve. Mai Dawt Hlei Hniang ih a sakmi Fahniang Zuun tile Liam Ko Law (Liam Ko Law timihi a CD ahcun Susan tin an ngan nan!) timi ka ngai.. Salai M in hla an suahsal ding an tilai ihsin ka thinphang bikmi cu a rak si cia ko. Ka hnak i do tuk…. Ziang ruangah Mai Dawt Hlei Hniang kherkher hi an sak ter sipei tiin keimah ten ka sut aw!!!! (Mai Dawt Hlei Hniang hi ka mimal cun ka hua lo, ka rualpa ih nupi a si) Falam mi hlasakthiam an um lo si pei maw? Kan Falam hlasakthiam pawl saklo dingin le a mah kherkher sak dingin a phuahtu in a phutmi a si pei maw? Amah ih a sak le unau Hakha pawl in an lei duh ding tiih an ruah ruangah an sak ter si pei maw? Ziangruangah sipei? Chin mi lakih hlasak thiam milar a si ruangah a si pei maw? Ka ruat nasa…  Ka thin i do ringring thotho….

Falam pawlin kan hla pawl hnam dang mi sak terin, in leisak ve pangah ti ruahsannak thawn, kan tuahmi tla cu a va si men thei! Asinan keimai ka hmuh ban cin tawk le ka suh mi pawl cun hitin in sim; USA, Denmark, Norway, Canada pawl ah Hla hi kan leisak aw menmen lo. Hakha pawl in Falam hla an lei duh lamlam lo tiin in sim tambik. Ka suhmi pawl hi hnam duhdawtluar pawl tla an rak si ngelcel men thei! Ramleng ka thlennak hi kum 18 a kim ve zo ih ka umnak hmun ih ka hmuh ban tawk cin khalah Unau hnamdang pawl in kan hla hi a lei cu sim hlah, a ngai hman an duhlo. An hla, an nunphung, an calai pawl thansohnak ding pakhat lawng an ruat. Salai M, khua hlan Falam tong hmang ngam ding roriih Tahan ih FALAM hmin ti dingsuak tu pakhat, Falam miphun ARSI pakhat in kan hla sunglawi kan thangthar mino hlirhsuahnak ih kan sak terlo mi hi cu; Kei Falam Pa rori hrang ahcun ruahthiam a har ih simfiangnak ka tul nasa……!!!! Ka hla duhbik pakhat Fahniang Zuun kha cu ka hrang ah cun ka ngai tinte a mawinak lam ruat nawn lo in thin dohtu nei le hlingvekin i suntu ah a cang ta…!!

Mai Makim Le Salai Raltha

Tui Fahniang Zuun ih ngaikhawp theilo le ka lung i labiktu cu ‘Salai Raltha’ ti Ma Kim ih a sak mi kha a si. ‘Salai Raltha’ ti fiang riangro ten Makim ih a sakmi ka ngai tinte in a hlaphuahtu ih tuarnak cu ka tuarpi ve theu vekin ka um. A hla thu ah keimah khal ka leng ngah cih ringring. Mawi ka tituk ih, ngai khawp theilo in vei thawngza ka nawlh sal theu. A hla san a that ruangih ka uar cu ret that, awnmawi tumtu ih an rak cawihmawinak khal tanta hrih in; Makim ih awsuak rori ah ka rak luangliam. Ma Kim, Falam Fahniang na men lo!!

Riahsiatnak, tuarnak, uinak pawl a hla fang tin ah a tel. A dang tlun kaa men ih sakmi a silo, a lungril ih tuarpinak thawn a sak mi a si tiin kei cun ka rak thei.

‘Salai Raltha’ Amahten Aw! Aw! A thumal  hrimhrimin hin mi a neh. Huham nei cafang a si.

Salai Raltha Thinak narak lan thei lo maw!
Pialral ritlang na rak liam…
Luanglo dairial na can mai hi kan sianglo..

Hi hlafang pawlhi kan hla ah um hnenhnen theu hman hai khalsehla Salai M pawlih rak nganmi le sakmi hin umzia a neice ih nun muril a tham. Tulai santhar hla kan phuah mi pawlah biazai deuhvek, tong upa telh vek, bazar tong deuhvek, calai tong deuhvek a tam hniaihniai. Hi pawl hi kan upa pawlih an rak hman theumi kan thlunlo ruangah maw, in zirhtawk lo ruangah maw? kan mah te ih ruahnak rasuak mi pawl kan rinsanawk ngam tawk ruangah khal a si men thei!

Salai Raltha ti hla thluk ah lunglen lam hoimi, tuarnak phorhsuahnak lam awihnak thawn a thluk an bun.. Awnmawi zianghman ti ruri umlo, fiangfai zet ih hawn sak thok dukdi cih mi asinak khal hin san a timan in a ti danglam ter. A hla zuun tuar na hleice cuang dingin Salai MawMaw, Falam Salai Raltha ih pialral ri sang in kaisan ah hi hla hmangin Youtube ah a mah theihhngilhlonak an rak tuah sak. Ka ngai tinte in Salai Raltha ;– Nang le Kei hiteh Salai Raltha; Liam hrihhlah ka lo siang hrihlo in ti ve pei maw? Ziangha kan ralthanak a si pei ti in ka sut nawn aw sal camci theu?

Salai M hladang tla a suaksal ko ding, Hladang hlabuk dangdang khal kan suah vivo lai ding. Falam thangthar nonawn hlasak thiam pawl cawisan ding hi an phutuk ve lo maw! Lairawn khawpi Tahan khua a thangso vivo ding, Laitlang khal a thangso ve ding, Falam khua khal cawimawi a phu ve lo maw! Kan hlasaktu pawl hin kan thinlung ramah nitin thu an rel ti theiin Falam Fahniang Zuun ah uai ve thiam uh si.

Keicu hlasak thiam ka silo, Hla phuahthiam milar khal ka silo, Awnmawi tum thiam khal ka silo. Keicu Falam pa, Falam Calai duhpa, Falam ngaina pa, Falam Hla duhtuk pa pakhat ka si.

(Visited 449 times, 1 visits today)

Comments

comments

52 Comments

  1. CT nan ti tha tuk aw.

    Salai M.
    Duai aw hlah.

    Tha ka lo pe ringring.

  2. Fakselnak chu siar a nawm pam. Pakhat te hun saih ve se la. Salai Sun Ceu in a mawi sin sin ding lairawn” a ti mi hi, Kawlrawn (tu hnu hi kan tih Lairawn ciam co hi) hi a ti duhsan a si hrim hrim lo ke.

    Eg. Aizawl tla hi a rawn lem lo nan, Hla thu ahcun kan Zawlkhawpui an ti vek deuhvin, Salai SUn Ceu hin Chinhills hi tlangpar ih um si hman se la, a thinlung muril lamah a RAWN sawn a sinak a lanter mi a si, ding.

    Falam khawpi mawinak pawl zaithiam/hlaphuah thiam pawlin an lanter lo ti hi a dik zet ngai. Hla saktu si lon, hla phuahtu kan la neih lo ruangah ruat se la, tu hnuah cun a run um vi vo ko ding e. Mah khua din khal si lo, vaih khawmnak khua menih mawinak sak kungko cu, ti duhhrangah cun a si ve tuk panteh.

    Keikha, tubaihte khan salai M hla pawl thunsaknak CD cu ka rak ngai ve na sa, a ropi law law.

  3. Laimi kan ruangpum a fatet hman ah kan ruahnak a fatet ve ding si lo naan….Leilung pom planet fate pa 1 ah kan um ti hi kan hngilh lole kan thangso ding! Lungawi,…:)

  4. Hivekin ca ngan thiam kan chin mi an an um vivo hi ka uar awknak a si.
    Ca ngan dan siar a nuam tuk.

  5. Lairawm timi thawn pehpar in
    Nonawn Calai Titi (NCT) Facebook Groups ah Lairawn miti tawite ka rak ngan dah.
    Ka rak hliakhlaivenak ah, kan pipupawl in hla an rak seh mi le Salai Sun Ceu in hla a rak phuah mi ah Lairawn timi hi tlaitlang lawng a rak si lo. Chin mi khau, Chin mipawl in an khua rak toh mi Chin mi tthangliannak khua, Chin khua hmuahhmuah hi Lairawn an rak ti. Khatlam zawngah cun Chinland (Lairam) le Lairawn timi bangaw tluk in an rak hmang. Pipu Hla taktak ahcun Lairam ti ding ah Lairawn tin hla ah an rak hmang.
    Tuhnu ah Kalay sehvel khi Lairawn ti lawng in kan hmang lala.

  6. Lairawm timi thawn pehpar in
    Nonawn Calai Titi (NCT) Facebook Groups ah Lairawn timi tawite ka rak ngan dah.
    Ka rak hliakhlaivenak ah, kan pipupawl in hla an rak seh mi le Salai Sun Ceu in hla a rak phuah mi ah Lairawn timi hi Laitlang lawng a rak si lo. Chin mi khau, Chin mipawl in an khua rak toh mi Chin mi tthangliannak khua, Chin khua hmuahhmuah hi Lairawn an rak ti. Khatlam zawngah cun Chinland (Lairam) le Lairawn timi bangaw tluk in an rak hmang. Pipu Hla taktak ahcun Lairam ti ding ah Lairawn tin hla ah an rak hmang.
    Tuhnu ah Kalay sehvel khi Lairawn ti lawng in kan hmang lala.

  7. Faksel cu na thiam nasa, Falam Hla cu Falam ta lawng maw a si???
    cu ti a si le Falam Tong(Lai Tong — Laizo Tong) teh Falam ta lawng a si pei cu?
    Zg ah Chin mi ta a ti awk ciam co nak lem??

    Curuangah Mai Dawt Hlei Hniang hi Chin mi a si ih, Chin Hla a sak cu a pawi maw si??? Zg ah na sawisel ??? cu ti a si le Falam tong, thil ri pawl hi Falam mi a si lo mi cun tham le hman na siang lo tinak si pei cu???

    Salai Sun Ceu pawl ih Kawl hla an sak mi teh na sawisel nawn lo ding maw??

    Hi ti cun Mi Thin lung fate tuk na si ding
    Na Thin Lung ti kau tir aw, na hrang na miphun hrangah thil tha sawn a si

  8. Cangantu ih ruahnak a suahpi mi upat ding a si. Malte ka rak ngan ve ding..

    1) Salai Sun Ceu ih ‘Lairawn” a timi kha “Laitlang” a ti duhnak a si tin ka pom. Hrekkhat in “Lailungrawn” tin tla an ti.
    2) Solomon le BJ hla ah Lairam hla an sak/phuahmi a um hnuaihni. Tthimnak ah “Maw Lairam na dam maw?” “Vapual” leh ‘R.A.M” tvp. A dang khal an umlai.
    3) Dawt Hlei Hniang ih “Fahniang zunn” a sakmi cu a fuh tuk. Himi kan rualpi rual kan ngai veten, vawi thum/li lai kan rewind sal. A thiam tuk lawlaw. Kan Falam fala ah a sakthiam an um lo ti sawn si loin, Falam hla in sunlawihsak tin ruat sehla, a ttha bik. Amah tluk ih mawi le nonal ih sak thei an um lo men ding:))
    4) “Hakha pawl in Falam hla in lei duh lamlam lo” na timi cu, a dik ttheh lo ding. Kan um nak Indianapolis ah tla cu Hakha tleirawl tampi ih an mawtaw ih an ngai bikmi hla cu, Solomon le BJ hla an si. An uar tuk, an ngai duh tuk. Ttawngkam kan ralring a ttha. Utube tete tivek ih an hla comment tla nan zoh le Hakha ttawng hmanmi pawl in an uarzia tampi an ngai. Falam hla hi hnamdang khalin an ngai tuk ko ka ti duh nak a si. Hla le aw quality a um hnuhnu cun, thanthar in an ngai paih ttheh.
    5) Hrekkhat an sak salmi tete tla cu, fuhlo mi a um hnuaihni. Ziang khal lole, nauhak lai ih hla pawl santhar ah kan ngai thei sal ih, a suahtu Pi Sapte te sungkua parah lungawi nak tampi a um.
    6) Kan ttong, kan calai, kan nunphung le kan awnmawi pawl hi thanso sinsin dingin, thazang pe in ttuantlang vivo cio uh si.

  9. Salai M New version CD ka rak lei ve ih kan ngai khawo thei hrih lo.Salamon ih No.4 timi hla kha lawng te ka ngai rero nan a san ka thei thei hrih lo.

    Falam Khua timi hla Salai Tuan Ling Thang ih sakmi tla nan thei dah lo maw si ?Falam khal vaihkawmnak khua thotho.

    Tahan khal Laimi pawlih kan khawpi thotho a si . Au vakvak ding. Lusei pawlih mai ta neih ih neih an tum ringring tla nang thei thiam lo maw si. nan ruahnak a puanlang tuk aw. Tahan hrawngah cun Laimi pawlin Tahan khawpi timi hla kha an uar nasa. Ziang ruangah himi hla SalaiM upa pawlin an sak ter a si ding timi na von ruah ban tik le aw a si ngai na ti leh ding.

    Ziangruangah Dawt hlei hniang nan sak ter? Timi ah Salamon MRH kha Hakah pawlin ram dangdang ah an sawm an hla khal an sak ter.. Ziang ruangah Salamon Hakha hla nan sak ter an ti dah maw ? Far Men Par khal Hakha hla rorin Album pakhat an thun sak.An mah hlasak thiam tampi an nei ve si khawh.Cu ti e kha ti e an ti maw?

    Mi na faksel hlanah nangmah le nang mah kha check aw hmaisa ta aw .
    cangan cu na thiam .

  10. Salai M New version CD ka rak lei ve ih kan ngai khawo thei hrih lo.Salamon ih No.4 timi hla kha lawng te ka ngai rero nan a san ka thei thei hrih lo.

    Falam Khua timi hla Salai Tuan Ling Thang ih sakmi tla nan thei dah lo maw si ?Falam khal vaihkawmnak khua thotho.

    Tahan khal Laimi pawlih kan khawpi thotho a si . Au vakvak ding. Lusei pawlih mai ta neih ih neih an tum ringring tla nang thei thiam lo maw si. nan ruahnak a puanlang tuk aw. Tahan hrawngah cun Laimi pawlin Tahan khawpi timi hla kha an uar nasa. Ziang ruangah himi hla SalaiM upa pawlin an sak ter a si ding timi na von ruah ban tik le aw a si ngai na ti leh ding.

    Ziangruangah Dawt hlei hniang nan sak ter? Timi ah Salamon MRH kha Hakah pawlin ram dangdang ah an sawm an hla khal an sak ter.. Ziang ruangah Salamon Hakha hla nan sak ter an ti dah maw ? Far Men Par khal Hakha hla rorin Album pakhat an thun sak.An mah hlasak thiam tampi an nei ve si khawh.Cu ti e kha ti e an ti maw?

    Mi na faksel hlanah nangmah le nang mah kha check aw hmaisa ta aw .
    cangan cu na thiam nan na theory a niam deuh a bang.
    Salai M an duai pang lo ! An cak sinsin ding .

  11. Z.Lian Hre,
    Salai M pawli hla pawl chu ngai a nuam ko. Asinan, Tahan (Falam Khawpi) si ter tum kan tam hnuaihni hi a tha lo…. Lusei Lusei, tih rero hi a tha ko maw? Tha te kan ruat tik le, tu isin kum 10 maw 20 hnuah chun Lusei Lusei kan ti rero pawlin Autonomous District tla an nei thlang ding tih theih a tul…. Keini Falam pawl chun Kalay-Kabaw Valley hi kan ram tiin kan sim theu nan, cozah theihpi inchun Chin State lawng hi kan ram a si. Churuang ah tha ten ruatin comment thlang aw!

  12. Kei cu Salai M pawl hla ka nauhak lai ah ka pu le pawl in inrak ngai pi ttheu ih.. tuitum ih an sak mi nih mal te feeling i auk ter ka ti.. a sak tu tampi hi an mode a tel lo vek abang.. angai tu hrangah a lak lawh nasa… tahthimnak ah Solomon ih Zureu langkhat tla cu original a siat ter thluh rori ka ti. Santhar new style in a tum ih an sak ih an tumta mi cu attha ko nan.. phyit tha lo an sak men ih a poi ka ti nasa.. ttha ten nan ngai sinsin ah cun nan thei ko ding ka zum.. Azaten ka ti nak cu si lo sokhaw.. Makim ih Salai Ralttha tla a tthazet ko. Dawt Hlei Hniang tla attha zet ko..MaRuat tla a titheitawk in asak ti cu alang zet. Ka nauhak te lai ih ka rak ngai mi vek asike maw ka ti ih ka lei ih ka ngai cu a rak si lo nasa…. Ka pam hmai zet…. Tahan Khaupi le adangpawl.. hlah .. hlah … hlah tiding a tam tuk ih ti nawn lo mei kung.. Ka ruahnak ka rak tarlang men mi asi…..

  13. zofanai,

    Lusei ka ti cu na rak tuarna deuh si maw ? Nan nih inti mizo pawl tla in pawiho in ti theu men si. kan duhlo mi cu kan hmang nawn lo veve ding aw.

    Cun Tahan Falam khawpi siter tum kan tam hnuaihni ih a tha lo na ti le nan nih khal Tahan mizo khawpi vekih nan ceibawl ciaoco a tha ve lo tinak si kei ci tiaw !

    Tahan cu Chin / Lai / mizo khawpi a si. Tahan Kawpi hla kha ngai aw la Lairawn Tahan Kawpi ti a si kha. Falam khawipi siter tumnak a um lo.

  14. Salai M hla pawl hi ka rak duh nasa. Tu a ra suak cu ka lungawi tuk. Falam khal kan khawpi, Tahan khal kan khawpi thotho.

  15. Sbawite,

    Laimiphun chung ah Nangmah vek ruahnak ngei mi pazet an um rih pei?

    Ziangah Mai Dawt Hlei Hniang cu an sak ter ti thin bang in na um maw?
    Nang cu Falam tong le Falam thilri pawl midang hmang na siang lo lai ah,
    Midang cu kan tong le kan thilri hi mitampi theiding, hrawmawk thei ding in an tum rero so khaw,

    Kan mah Falam,Hakha Tedim tiin phun hman in si rih lo maw? Lai miphun, Zo miphun ti ih thinlung dang awk mi cu a tawk deuh rih. Myone pakhat kuai ve tein, hi vek in thinlung dang in kan um theo ruangah CHIN mi hi dinhmun kan thleng tiin na ruat lo maw? Mi tampi CHIN mi in that tu Zu an ti. Kei cu Nangmah vek thinlung hi a si ka ti. Racism a si tiin ka hmu.A taktak tuanbia zoh na duh tuk le,
    Falam le Hakha cu phunkhat Laimiphun sokhaw kan si.

    Micaw phuntan vek in tan hi a tha lem lo so khaw.
    Kei ka ruahnak ahcun Salai Mai vialte nih sakthei sinsin sehla ka ti. Nangcu Hakha Mai Dawt Hlei Hniang a sak hman. Na duh lo ti aw.

    Ka Ngansual le in ngai thiam aw..

  16. Salai Ni Peng, na dik tuk fam teh, amah Sbawite vek thinlung nei kan Chin mi lak ih kan tam tuk ruangah lo zia, kan lungrual thei lonak, Amah hi Sunglam ral ti ding khawp a si, WE ARE ONE IN CHIN. Ti mi teh hi a thei lo maw si ke??
    zangfak za a si hi

  17. Ca siartu ih ngan duhnak sullam tla ruat phah uhla.

  18. Hi Cangantu hi ka uar zet.

    Hakha a do ciamco in keicu ka ruat lo. Falam a uar deuh men in ka thei!
    Falam pawl cu ka thinlung a tum awk tertuk ih kan cem ral rero ko.

    Hivek ruahnak a suah pi mi hi kei cu ka uar tuk..

    Well done!

  19. sbawite - CT Admin says:

    ?Salai Ni Peng le Salai tikheng

    Fakselnak le ruahnak a si ruangah cangantu ih hmin cu tilanglo dingin a hmin kan humsak mi a si.

    Nan fakselnak le nan comment pek mi parah kan lungawi.

    CT Admin
    sbawite

  20. Veng Lai a ngan mi cu ruat phah lo ih um a theih lamlam lo a thinlung a lang fiang tuk, Ziangruangah??? ti ih a suh awk le a hngak a doh hrim hrim tla kha zoh hen!!

    A do lo tla a si ko ding, ka do a ti mi cafang cu a um kher lo ee, asinan, Falam a uar awk hi mi’h hrang le Falam hrang ih hlawk nak, lungawinak maw thekdarhtu a si ti tla hi a ruat thiam lo maw si???

    Nan nih teh hnam dang hla nan sak , nan tong ih Mai Chin Tong te hman zahpi zik zuak zo pawl na si lo ti ah teh na ruat aw sawm???

    A Hmin nan ti lawng cu a tul kher lo ee, a pawi lem lo kha lam ah cu,
    A cangan mi hi ziangvek in mi a hngai hnawk ter ti a theih awk le hivek hi Falam at tan ih a tan hi thil thupi si lo,

    Tu tla Mai Far Men Par le PBK Lian Khuma in VCD Chin(Laizo) tong in hla an run tuah leh zik cu mi ah teh , na sawisel leh lo ding maw ti ah ka sut duh???

  21. Ziangthu khal va sisehla, hitivek fakselnak famkim hi siar a man hla hrimhrim….

  22. TT ih nganmi hi a dik zet. Salai M original a rak suah lai kha mi san lai ah a rak mak tuk. Cule Tahan kiangkap ih Laimi pawl hrangah cun Salai M band cu More Than Music Band an si hlei ah, an hla pawl cu More Than A Song an si ko ti ah a rel thei. An rak mak tuk zo cio ih uar mi an rak si ih, Thuanthu Roling vekih rel ringring mi an si.

    Tu new version a ra suah pek ah, upa lam deuh pawl (ka nu le pa telin) an lung a kim lo nasa. Ti celcel in an phun celcel. Asinan rei lo te cun hla dang an ngai thei nawn lo. Salai M new version hin mi tampi ih khua a luah nasa. Reipi tiang rel an hlawh rero lai ding.

    Keimah bulpak ih ka ngai pek ah hla 2 bak lo ngai ding ka thei lo. Asinan tu cu an Creative idea ka uar zet. Hla lan ding ka siang nawn lo. Hla lan ding khal ka thei nawn lo.

    Solomon MRH ih Zureu langkhat khal a tumtu pawlin new version in an tumih, Solomon khalin sak dan dang deuh in a sak ruangah Taste dang in pe in ka thei. A sak ropi ka ti zet. Nauhak pawl kaa sungah a lar le zet ding hla tin ka hmu. MRH ih hla sak dan a thiam zia thu himi hla ah a lang tin ka hmu. A aw a ttha hlei ah, a aw a nehsawh ih hla sak dan a thiam tuk tin ka hmu.

    Ma Kim duat hla Phunsang fa timi hla ih Ma Kim ih a chorus nak te ih a aw a von khiahnak kha cu voi 1000 hrawng ka ngan sal zo. A ttha ka ti tuk. Makim too good.

    Himi fakselnak ngantu pa hi ka uar zet. Ca ngan thiam zet a si. Himi Salai M new version a suahtu, tawlreltu, hla saktu le band pawl par khalah kan zaten kan lungawi thiam zet a ttul tin ka hmu.

    Ca ngantu ih Salai M an duai pang maw? timi subject ih thusuhnak hi Salai M an duai thei lo a si hi a ti duhnak san khal a si ding ti ah ka ruah.

  23. Khaw Vel Thang says:

    Salai M hla pawl cu ka duh zet.ka ngaisang zet fawn.
    Duai hlah seh tihi ka thlaza camnak a si .
    Asinan, Kung Bung Bel an timi pa khi a tel ih ka phurnak le ngai paih nak thinlung ka neih mi khal a hlo thluh.

    Kung Bung Bel in himi Salai M pawl ih hla hi sak ve lo sehla cu DVD 20 ka lei rori ding.

  24. Salai M, thuhla nan rawn nganih ka lung a leng.kan nauhak lai ih Salai M kha ka vun mang ruahro.Kan Falam khaiso tu an si. Salai M thu hi tu lawng ah nan rawn ngan nan Salai M a din thawk ih sin tuni tiang ka thinlung sung ah a caam ringring.Ka duh dawt mi Salai M.

  25. Lairam Deirel Salai M.

    An hlathu a tha ih vun ngai ih hun sak tikah thinlung a fang ruahro.
    Kan nauhak lai ih ka u le pawlin khawlak ah vak ih Ttingtang thawi an rak sak lai,
    Misual pawlin ka u an hruai ih a rualpa in “Salai Raltha” timi khawlak a len phah, zan thlapi vang ih a vun sak lai ka vun ruah tikah ka mitthli a tla theu. Tui can ah Mai Ma Kim ,zaihla lam ih kan Falam ti hmaihngal tu le cawisangtu ih fiang ruahro in a sak mi ka ngaithlak tikah lung a leng sinsin.

    Asinan, cangantui’ ngan vekin (keimah vek hnam feeling nei tuk tu pawl hrangah cun) ruah ding cu a tam nasa in ka thei..
    Mai tawng te cawisan le mai miphun ,thangthar nonawn pawl cawisan thiam hi kan tul nasa in ka hmu.

    Salai M, zuam sinsin aw.
    Lungawinak thawn.

    Michael Van.

  26. Sahrivaithun says:

    Dear Salai Ni Peng,

    Hakha mi na si ding tin ka ruat.
    Ka mangbang mi cu, Hakha pawl tlukih lungrualnak thu rel tam hi miphun dangah an um lo.
    Anmah pawl tlukih mai miphun hrang lawng ruattu khal miphun dangah an um cuang lo!!!
    Meaning, nan tongkam lawngin miphun dang nan duhdawt.
    Nan cafung lawngin lungrualnak thu nan rel.
    A taktakah cun…………………. you/we know the rest///

  27. Dear Piangte,

    Salai Sun Ceu ih “Lairawn” a ti mi kha “Laitlang” tinak a si zik lo.
    Kalay-Kabaw hrut, a sehvel khuapawl khi Lairawn a si.
    Laitlang cu tlang parah a um ih, Lairawn cu hmun rawn ah a um.

  28. Maikhuaitizu says:

    Sirori! Kanmah le kanmah cawisang loin hnamdang kan va cawisang tum le cu zonih in cawisang nawn ding? Hnamdang Ka hnawl si loin ma’i khuate uar in kan cawisang thiam a tul. Na rawn ti tha tuk.

  29. Siangte Senhri says:

    Cangan tu in mipi hnenah ruahnak thar a pe asilo le ruahnak thar a dil a si tin ka hmu.Nan commented pawl siar an nuam ,ca ngan tu a thiam,commented tu pawl nan thiam,Siar an nuam zet.Thuruat ding tampi cu a suak duh nasa

  30. A thu tlangkawmnak cu amak dupdo, ka uar riai.

    “Keicu hlasak thiam ka silo, Hla phuahthiam milar khal ka silo, Awnmawi tum thiam khal ka silo. Keicu Falam pa, Falam Calai duhpa, Falam ngaina pa, Falam Hla duhtuk pa pakhat ka si.” ti rori a si.

  31. SALAI NI PENG says:

    !@Sahrivaithun, Hakha mi tin maw in ruat. Na sualtuk zo. Cun le HAKHA PAWL khal an tongkam lawng le an ca fung lawng in lungrualnak an rel le, rel khal rel lo ii, tiannak sinsin lawng a rel theo tu Falam nak in cu an tawk deuh lai tinak a si cu.

    A tu ka chim duhnak cu ruat cio uh aw la, ” Ziangah Dawt Hlei Hniang cu an fial, Falam mi aw ttha teh an um nawn lo maw? ” timi adang ziang rel duh mi a um kem. Hi mi par te ah ca ngan tu pa hi ka ti duh mi a si.

    Salai M, hla hi a mah lai ahcun a mak tuk ti nan rel cio. Kei cu ka thei lo ii, a tu lanwgsi ka thei. Ka uar zet. ka lungkhal a awi. Asinain, Falam Laizo tong hrawm awk mi lawng nih thei dingah teh a pam nan ti lo maw? CHIN mi za tein thiam ding intuah aw la, nan sung lo ding. Khi mi vek nan thinlung ruangah si ko ding ka ti. A tu lawng ah kei ka thei. Nan rel dan ahcun Hi hla hi a rei pah thlang a bang. Amah Mai Dawt Hlei Hniang hman a ziang hman a poi lo thei men. Dawt Hlei Hniang hrang ah ka thin na si lo in, Maltete Local tuk in thu nan rel theo pang pei ka tinak si. Kei cu CHIN lawng ka hrang ah a thu pi.

    Ka losim rih ding, Kei ka Phun cu CHIN -> Khualsim ka si.
    Cun le CT Admin nih khal ca ngantuk min ka thup sak a ti.
    Thil tha tuahnak par min thupsak le cu a poi lem lo ka ti.
    Cu na min Sahrivaithun maw ? namin tha zet ual. Kei cu min thup ka ngei lo..

  32. Salai Ni Peng
    Salai M thu hi na thei dah lo ngai a si ding. Salai M hi Taungphila S.H.S.(2) kiang inn pa khat ih an din thawk ah nauhak te ka si nan ka rak tel ve. Salai M cu kan uar tuk, an hla khal kan ngaisang in kan duh.
    Faksel tu in ziang ruangah Dawt Hlei Hniang an sakter a ti mi hi ka theihthiam pi nasa. Hla buk dangah cun siseh la cun rel ding a um lo. FA HNIANG ZUUN hla kha a thiam in ngai a nuam nan, a aw ah dang lam nak te a nei. Salai M hi kan Falam mi cu in ciahneh nasa.
    Salai M a thei dah lotu in faksel nak ih nan ca ngan ka siar tikah “Uico Lo feh tel ve” vek si in ka ngai.

  33. SALAI NI PENG says:

    James , Na chim mi a dik na sa.
    Uico Lo feh te ve khal ka bang men thei.
    Ka sim cia vek in A hlacu ka uar zet. A sinain a tuanthu ka thei lo. Khi mi ah ka buai lo.
    Cu mi le hi vek in Public ah post mi a si ih kei mah vek in a thei lo tu an tampi ding ka zum. Kei mah nak in na sawn in a ruat tu an um ko ding. A thei cia na hrangah cu theithiam ko ding. Ka hrangah khal a poi lem lo. Asinain Hakha, Tedim, Thantlang tivek in a siar mi khal a um ve ding ka zum. Tongkam fangkhat a si nain dik lo pin hmailam hrang a siat ter ti ka ruat ruangah ka tel mi si.

    Ka lungawi,

  34. Salai Ni Peng, Falam Peng sung ih a tam sawn cu maw an thinlung a fiak lutuk, an thil le ri pawl zianghman mi dang ih hmuh le tham le thiam le hman le neih ve an phang lutuk, an neih sun le kil him thiam lo, midang hnen ih si le a tha mi cawn le lak lam le thiam cuang lo, an lung le ruh em em, Falam mi hi fim bik le thiam bik le thei bik, le Lal bik ah an ruah awk lai ah Distict tla an buai lala mei kha,
    An mai mi le sa le an co hlang duh lo i Suh Kyi vek men tla hi Falam ah an mai thu ten an can tir tum men, zangfak za an si

  35. Salai M CD, hla thar ngaitlak ding cun Music tumtu Band thleng a tul. Music ngai tlak lo. Musi Orig hman a tluk ual lo.
    Cun Hlasaktupawl rem an tul deuh. Ka duhdan ah tla cun Chin (FALAM) love song saktu hmuahhmuah tel thluh sehla. Hlasak thiam suak thar khal tel thluh sehla lungrualnak hnget sin ding. Salai M Band hi kan miphun mitvangtertu le kilhimtu, kan miphun hruaitu pakhat ih a rak tel ve ruangah Groups tenau tuk vek cun cangvai lo sehla duhthu a sam na sa ding. SALAI M San lai ih Music tumtu dam lai khal an um. Sekan ah tla a dam laimi an um.

  36. Salai A TaK, na rak aa tak2 a c cu!
    Asung lam thu hmu lo.
    Mit nei c khua hmu lo leitlun ah nangmah lawng na c!

  37. Leen Hling Par says:

    Dear Salai Atak,Salai na ti awk cun Falam mi cu na si ve ding nan si khawh aw ka ti.Falam pawl in kanmah thu ten Suh Kyi Falam miphun ah ka rak la lut ti ka thei dah lo e,Pi Suh Kyi Chin mi a si maw timi a si kha,Suh Kyi cu Falam miphun a si ti si lo in Chin a si maw ti sawn a si kha,ca ngan tu ih ngan lo mi kha va bet ciamco hi a ttha ding ka zum lo ee,nan comments kha ralring deuh uh ,

  38. Kei ka hrangah cun Salai M a ‘tha! Zovek in kan hla an sak, an lei,an ngai ti cu hitin a si, a tam le a ‘tha sinsin, nan kan mah Falam pawl hi mai taw hlip vek kan tam thei zet, kan miphun, kan calai, kan ram duhdawtnak ih hna ‘tuantu mualphoh in, in hruaitu pawl in Chinmi bangran ten zoh,thleidang lo ding in in zirh, a ‘tha, nan mi tampi cu mai thu mai hla ngaina,duhdawt,uar sawn lo in mi thu le hla kan uar, ka duh sawn ‘theu cu a poi tuk, nan zum lo le, Falam nu| pa ih thu le hla a neihmi va zoh hnik, an Phone, DVD, ‘tap, tvk in a phuang ding, thuamhnaw ‘tha hruh thei lo khal asi le mai Taw cu hlip lo ding.

  39. Hlawn Dawh Thang says:

    Leen Hling Par
    A hmin hman Aa Tak
    a si cu teh, ngaithiam a tul ko.

  40. Khua pakhat ih fala nu pasal an neih ter zik ih a nulepa in an neihter tum mi pa kha a duh lem lo.asinan, a nulepa cun nu te nei ko aw, na neih asile nan neihawk puai ah Salai M kan lo kawh sak kei Live show kan lo tuah sak ding an ti ih, cuti cun tluangten an nei aw sal an ti.
    Ka rel duhmi cu, Salai M Original kan zohsal tikah, tui a rung suahsal mi thawi khaikhin tikah an tan aw tuk. Tuitum ta hi cu Music tla hi an te nau tuk deuh ngai Salai Feilung na ti dik. “Mi har i dar al” an ti hrawng khi an bang. Hlasaktu pawl cu an tawk pam ko. mi pahnih khat cu ngai tlak lole ziang ti lam hman i ngaidam theih lo an um e..keicu a original te khan ka lung i len bik ko. Ziang khal le tlangval pawl thin nau le riahsia lo ten,,pa le pawl cu nan rak tluk deuh lo ngaingai hokhaw…Salai M ,voikhat in tuahsal sehla ka duh. ropi zet in. tuitum hi “a hmin i suah ve men” in ka thei ” a mi har i dar al ” hrawng an si.

  41. SALAI NI PENG says:

    Leen Hling Par, a tu vek in Falam pawl hi kan tong theo ruangah pan hi na khal ka tel ve nak. Salai AaTak cu ” Salai Na Si ii , Falam cu na si ve ding ti vek”.Salai Aatak kha na aa taktak na ti nain, nangmah nih na lon deuh ual. Salai Le Mai cu Kan mah Falam ta cek lawnglawng ah nan ruat lala. http://zanilian.blogspot.sg/2012/03/chin-minhmaithlak-salai-le-mai.html

    Hina ka tel pang nak khal hi tuanthu ka thei ruangah a si lo. Salai M kong ka thei ruang ah a si lo. Na Na ngan theo le Nan Mah, Kan Mah , Nang, Kei timi Idea hi nan mang theo ruangah Mino pawl hrawngah a tha lo ding ti ka ruat ii ka tel nak si. Ka cawlthlang pei maw ka ti ih. ka poksal lala.

    Kei cu na Aa tuk, ka lo ti lo ding. Na thei lo ruangah ka lo sim ding. Salai , Mai min cu ACHO CHIN pawl hmang mi a si. Salai Ram Ling Hmung hruainak in Kha Sah yah ah CHIN mi kan za teih Min hmai lam ah hmang ding in thu rel cat nak an ngei. Asinain Tedim Mihret khat nih an duh lo ii, Tang le Lia cu an hmang thotho. Salai Le Mai cu Fala le Tlangval tinak si ko. Falam lawng nih salai le Mai an hmang lo.

  42. Leen Hling Par says:

    Hlawn Dawh Thang,na sim dik nasa,
    Salai Ni Peng,na thei zet in I runsim ah ka rak lo ruat.Link tla in run pe nan nangmah in na siar lo a si ding ka zum.Salai ,Mai cu tlangval/fala tinak a si na ti cu na palh nasa,Hnamdang pawl in Kan Hmin hmaiih Salai le Mai ret kha nan ning a zak ttheu si,Kan nih Falam miphun pawl cun kan hmang,Curngah si Salai le Mai cu Falam miphun ta lawng vek ih a cannak cu,eg.Mai Far Men Par hi fala a si lo.Fate nei NU a si ti na theih a ttul.Kha thulu thawn mil aw lo in comments mi a suak thlang,

    CT le casiar tu nanzate parah ngaithiam ka lo dil.Kan thulu le kan commented a pial aw deuh ih si kha.

  43. Kei pakhat hmin Aa Tak ti awk ruangah mi aa ti nak a si lo, Falam pawl nan at lukhing tuk ruangah ka hman sawn mi a si.

    Tedim pawl ih Salai le Mai an hman duh lo ruangah mi tam sawn in nan sawisel,
    tu Salai ka ti awk ruangah Falam mi na si tengteng na ti cu Salai ti mi cu Falam ta lawng ah maw na ruah, Mi Aa Ruh Seh na si awm hi Leen Hling Par,

    SALAI TI MI HI NA PAI PHUAH CAWP LE NA PAI PAWLCAWP IH RA SUAK MI A SI LO, NA TA LAWNG A SI LO, FALAM TA LAWNG A SI LO, CHIN MI PUM IH TA,

  44. SALAI NI PENG says:

    Leen HLing Par,

    Ka lung awi ve. Ka comment a lampial ko nain, Khi mi Article link le Blospot kha kei mah ngan mi a si. Ka thei tawk. Ka bantawk in ka ngan mi a si. Khimi blospot sung hmuahhmuah kha kei ngan mi an si ko.Kei nih cun ka thei pek in Falam ta vek in ka ruat dah lo. A hmang duh lo tu khal um cu an um ko. A tam sawn cu, kan mah lai , zo, pawl nih khal a dang kan ngei ko ti in bi zet a ruat mi an um ve ruangah a si. Cun Pahnihnak Falam za tein si lo nain, nangmah vek minungpawl nih Falam ta lawngvek in an rel theo ii, Tedim , Hakha ,Thantlang kan hmang mi a um ve ko timi ruahnak an ngei ti in ka hmu. Falam ta vek ruat hmanh ah, langsar ciamco a ttul lo ka ti pan teh. Midang a hmang duh lo mi pawl in an hmang duhnak ding tu kha ruatsuak in relsawn ding ka lo duh sak..

    Ka Lungawi,
    Kasualnak aum le in ngai thiam aw,

  45. Hre Aa (Salai Sihni) says:

    Ule Nau Pawl, In ruat thiam hram uh .. Ka thlacammi kim sehlaw thong kan thlak thluh ding ka zum … 😀

    Hitin ka cam cu teh;

    ‘Bawipa, Chinmi hi kanmah ten, uk theihnak kan ngah tikah kan MPs le in hruaitu pawl hi lungrual nak pe hram hi aw-la, Rule of Law a lennak ram in siter hram … IT lam in a thiam zetmi miphun in siter hram aw. Motor lamzing hmanh ka neih hrih lo a si hal khal le .. in siter hram aw …. cu tivek caan lawngah Chinmi in upadi tha zet tangka kan um dingih racism thu a simmi le email in nganmi khal kan kai ter IP thong kan hawi thei hai ding ih thonginn ah kan sanh ttul le sanh, ttul lo le dantat .. cu tikah i rule of law tang ah kan um lawngah … Falam e, Halkha le Tedim e, Zo, Lai, Asho, Khumi timi khal … culture of mutual respect le human rights timi zalennak thawng, kan ram kan mawiter ding, nuamter ding … ‘ Unity in Diversity kan ti rero mi ti thla a ttul nawn lo dingih, kaa tla a bang nawn lo ding …’

    Thlacam in bawm ve uh …..

  46. Hre Aa (Salai Sihni) :D says:

    Ule Nau Pawl, In ruat thiam hram uh .. Ka thlacammi kim sehlaw thong kan thlak thluh ding ka zum …

    Hitin ka cam cu teh;

    ‘Bawipa, Chinmi hi kanmah ten, uk theinak kan ngah tikah kan MPs le in hruaitu pawl hi lungrual nak pe hram hi aw-la, Rule of Law a lennak ram in siter hram … IT lam in a thiam zetmi miphun in siter hram aw. Motor lamzing hmanh ka neih hrih lo a si khal le .. in siter hram aw .. in siter hram aw …. cu tivek caan lawngah Chinmi hi upadi tha zet tangah kan um dingih racism thu a simmi le email in nganmi khal IP thong kan hawi thei hai dingih thonginn ah sanh ttul le sanh, ttul lo le dantat .. cu tik vekin rule of law tangah kan um lawngah … Falam e, Halkha le Tedim e, Zo, Lai, Asho, Khumi timi khal … culture of mutual respect le human rights timi zalennak thawng, kan ram kan mawiter ding, nuamter ding … ‘ Unity in Diversity kan ti rero mi ti thla a ttul nawn lo dingih, kaa tla a bang nawn lo ding …’

    Thlacam in bawm ve uh ….. 😀

  47. Leen Hling Par says:

    Dear Salai Aa Tak le Salai Ni Peng,

    Nan commented ka siar ih kel pa ttan in nan ttang nasa in ka lo hmu ih ka hnih tla a suak men hahahaha

    Salai Aa Tak,na aa tak tak si hi maw,at khat in lo bet sehla cu sentlung pawng na khit ko ding.Na ttong kha a hriam nasa ih a kiak mei ding ti kha hngilh hlah aw,na ti keng ko nasa,hmaton in be aw si sehla cu I keu zo ding ka lo zum,hiti vek ih a thu lawng ih ti kung ko hin ziang saw a tthat hnem pi mi a um cuang?Na diriam ko in ttongvsutso ko aw,kei cu ka zianghman a poi lo ih ka hna hman a thak lo.Nang cun Lung Ruh Seh I ti ahcun nang cu k hnak in na luar kai sawn ding ti khi ka sim ngam rori,ziang khal le nang lo el hi ka hrangah tthat hnemnak a um cuang lo,ca siar tu ca siar nuam lo ter tu ah a cang men,kan nih cu kan aa nan nan nih fim aw ter pawl kha nan fim cuang lo ti kha na theih a tttul,.,

    Salai Ni Peng,na commented ka siar ih nangmah le

  48. Leen Hling Par says:

    Salai Ni Peng,na commented ka siar ih nangmah le nangmah na el-aw rero si lo maw?na ttong in nangmah lala a lo awk ti tla kha na theithiam aw lo maw?zangfah za nan si hi aw

  49. Leen Hling Par, Sentlung pawng cu khit ding um nawn lo ih na khit thluh zo si maw,

    A si, a thu lawng ih ti kung ko nawn hlah, kan nih cu a tak tak si kan rel, ih kan tuan,

    Na at a ruhseh tuk ruangah lo zia na hna hman a thak tham lo, thak ding in lo sim rero kha le na thei thiam cuang si lo, thil hi na thei thei lo tuk, mang na ti bang

    Fim tum awla, na zia um deuh ding si maw

  50. Salai M an sunglawi riai.

  51. Salai Ni Peng says:

    Ai ze….kei mah nih cu fiang zet in ka lo sim ka ti nain, na rak theithiam lo maw? Leen Hling Par/ Kei mah le kei mah cu ka el awknak ka thei aw lo nain, ziang mit in maw, na rak zoh ii ka thei ve lo. Si len in ngaithiam men aw, El awk rero ding ah ka ngan mi a si lo. Thil kan ruat dan tete mal tete kan thleng a ttul ti ka duh san mi si ko. Hi na comment na siarnak thawng in na thinlung na rem deuh le, lungawi mi a si ko…Cun Salai Aa Tak, thawn hi a thei awk rualpi khal in ruat men thei. Kan thei aw dah lo so khaw, a si nain, Salai Aa Tak hi ka hmu dah lo nain, CHIN timi a spirit le a tongkam cung upatnak ka pe si…( Lai to Chin, Zo to Chin, etc..kan ruatnak hun thlengthei seh la) timi ka fehpi dan a si ko. Ka lungawi, ka lo buaiter tuk le in ngai thiam aw,…..

  52. Mai Bingbi Par says:

    Ca siar tu kan za ten ca kan siar tik ah a hmai sa bik ah ca ngan tu ih duh nak fiang tum hmaisa sehla cu hnu lawngah let sehla el awk a mal ding. Tong fangkhat le ca fangkhat in ti duh san tam pi a nei thei ti mi tla kan theih a tha. CHIN thing lung ka nei ti si phun hnam hmin tel le ve te ih ca ngan tu ti duh nak bik thei cuang si lo ih tongpatan ih tang kan tam tuk ih a poi tuk. Thinlung tel lo Kaa lawngih lung rual tum cu hlawh tlin a har awm ee.
    Salai NI PENG blog ih catial te hna cu zo vek nih tla ngan thei si ih maw blog ngan mi dihlak in hman theh ti ding in cu leilung pi tla a phen ah a cang sual lai. Chinworld.info sung ta ca uk pawl na sim le hmaan ah rinsan a tlak sawn ding. kha mi website ah salai le mai a thok nak le an hman nak tha ten siar aw Laimi-Chin kan dih lak na ti mi cu na hmaanbak si.

    Hre Aa na thlacam nak kim hram sehlaw i rule of law maw cu hnak ih khoh sawn tla suak hram seh..

  53. hla lam cu ka ngai sawt sawt ko nan ca siar paih zet mi ka si. na ca ka siar rero tik ah ziang vek mi nung le mi khun ti cu a fiang zet. Article khal na ngan thiam ko. A sinan sam mi cu na nei..

Comments

%d bloggers like this: