Russia In Syria Ram Sungih IS Pawl A Kap US A Lungawi Lo

RUSSIAN-TROOPS-IN-SYRIA

Pu Sum

Theicia zo vekin a liamcia ni 10 ihsin Russia cun Syria ramsungih IS pawlcu raldo nak Vanzam hmangin Bomb phunphun leh Missile hmangin a kap ciamco ih, Russia Defence Ministry in an tarlanng nakah Russia ralkap pawlin Syria ram sungih IS pawl Bomb an thlak nakah IS tapung minung 300 lenglo leh an ralthuam retnak hmunpawimawh hmum 60 lenglo an kahsiat sakthu an tarlangih, Russia ralkap pawlih bomb an thlaknak hmun Raqqa Province ih Liwa al- Haqq ih IS pawl hotu 2 leh himi hmuhih minung 200 lenglo an kahthat thu leh Aleppo khawpi kiangih Thawngin IS pawlih ralthuam an retnak hmunpi an kah siat nak khalah IS minung 100 lenglo an kahthat thu an tarlang. Russia ralkap pawlhin Latakia leh Idllib ih IS pawlih raldo zirnak hmunpi an kahsiat sak thukhal an sim.

Russia Cozah thilti danhi US cun a duhlo zetih Russia in Syria ramsungih IS pawl ka do tiah a sal aw konan a tum taktak micu Syria ram President, Bashar al- Assad ih Cozah hlawn thlak tumtu US ih bawm rero laimi Syrian Rebels pawl hi Russia cun kah cimit a tum a si tiah US cun Russia hi a puhih. Hi mi Syrian Rebels pawl khalin Russia hin IS pawl lawng kaplo in kan mah Syrian Rebels pawl hi kah cimit in tumsawnmi a si tiah an sim ve.

Kum 2013 ihsin US Cozah cun CIA pawl hmangin Syria ram President, Bashar Al- Assad ih Cozah hlawnthlak tumtu Syrian Rebels ralkap 10,000 pawlhi ralthuam leh paisa leh thil dangdang thawn a bawm ih raldo thiamnak khal an zirter ih US hin Syria President, Assad ih Cozah ih hleih IS pawl khal doter dingin a duhmi an siih. Asi nan US ih tumtah vek silo in, hi Syrian Rebbels ralkap pawl sungah IS pawl hnen ih tlanlut tamtak an um ruangah US in ralthuam a pek mi tamzet hi IS pawl kutsungih a thlenglut a tamzet.

Tu khalah Syrian President Assad ih Cozah ralkap leh US ih bawm mi Syrian Rebels ralkap pawlhi an ramsung hmun tamzet an an kapaw rero laiih, hi US ih bawm mi Syrian Rebels pawl hi an caksawn deuh ih an khawpi Damascus tiang an la theizik thlang ruangah President Assad ih mangbang in Russia hi bawm dingin a dil ih himi ruangah Russia Cozah hin a Assad hi run in an kap ih ruah a si.

Mizan sun khalah Russia ralkap pawlhin Vanzam in Syria ram sungih IS leh Syria Rebels pawlih um nak Hama, Homes, Latakia, leh IIdlib Provincce pawlah Bomb voi 53 an thlak salih, himi laiah US leh a lamtang pawl khalin Iraq leh Syria ramsungih IS pawlcu bomb voi 18 an thlak ve US pawlhin Iraq ram sungih Bayli ah leh Mosul, Washiya hmun pawlah bomb an thlak. US Cozah hin Syrian Rebels pawlhi raldo a zirter nawn lo ding nan a tiankam cia vekin ralthuam leh sumpai leh thiltul dangin a tanpi thotho dingih a tiamcia vekin mizan sunkhalah US cun Syria Rebels pawlhi ralthuam tons 50 lenglo leh cerek tamzet a thlak sal.

Himi laiah Russia cun Syria ramsungih IS pawl do vekcun a sal aw nan US in bawm mi Syrian Rebels pawlcu tlunlam ihsin raldo nak Vanzam hmangin bomb a thlak rero lai ih, himi ruangah US hi Russia parah a lungawi nasa. Tuah hi Russia ih tanpi nak ruangah Syria President, Bashar Al- Assad ih Cozah ralkap pawlcun thathar thawh theisal in US ih tanppi mi Syrian Rebels pawl thawn nasa zetin an kapaw rero laiih, Russia hin IS Muslim tapung pawl hnakin Syrian Rebels pawlhi kah cimit a tum ruangah European Council khal in Russia cu IS pawl kaplo ih midang a kah ruangah Russia hi a zamrang thei bikih Syria ram sungih a ralkap leh vanzam pawl a hman mihi a hnuk kir sal tengteng ding a si tiah thusuah an tuah cih, Tui dinhmu ah US leh Russi hi an mah taktak cu an kapaw lo nan Indirect in an do aw rero tlukih ruah a si.

Theihcia zo vekin Syria ramhi kum 2011 March thla ihsin an President Bashar al- Assad ih Cozah hlawnthlak tum nak ruangah buainak a suakih minung 250,000 lenglo an thizo ih midang Million 8 lenglo in himnak hawllin an ram an suahsan.

(Visited 342 times, 1 visits today)

Comments

comments

Comments

%d bloggers like this: