Ruahnak thar I Pe Aw… Khualtlawn Vahvaih Phahin ….

Ruahnak thar i pe aw…

Khualtlawn vahvaih phahin ….


By: Hniangsinpa

Fur can a siih, lamzin khal a nal, feh khal kan feh cak thei lo. A canah
mawtaw ihsin ttum ta hratin, ke ih kan feh cak sawn can khal a um phahphah. In hmutu an um lemlo, tiin ka hnemaw nan, a thup ten mi ramdang ka ruah ah, ka ning cu a rak zak thup rero. Mawtaw sungih kan um thei can a mal vivo, kan um thei sunah, sun mang tal neih tum in ka theitawk in ihthah hrim ka tum ih, ka ih thah thei can ah, ka sunmang pawl cun lileng za in i tuah lala fawn.

A har fualfo ka ti can a um nan, a har lo can khal a tam zet ko, ka thuruah mi pawlin i neh deuh a si ding, ka thin a bang zik vek khin a um theu. Ka fala kha Phone talin ka biak thei pangah tiih tlawng ka sinak cun phurnak i pek can a um theu.

Ziangtik niah si maw cun, ka umnak ramah ka kiir sal dingih, tui ka ruahnak pawl hi ka ngan leh lai ding ti ka ruat ih, ka hna a ngam zikzik theu, hmansehla ram duhdawttu hrang ahcun, cui kan Lamzin pawl le kan Laitlang mawtaw an vun hmuh cun, an lung a kuai ve ko ding ti ka ruat lo thei fawn lo. Ka tumnak hmun ka thlen khalah, ka hmuh duh mi le ka feh san cu phone tal khal in ka be thei cuang

lo ding ti ka theih vivo le phei cun, a har ka ti. Cui hmun ahcun caan sau ka hmang lo, ka umnak lam ah, cui Fur sung rori ahcun ka kiir sal ih, ka hnatuan kel te tuan dingin, ka tim ka tuah sawn a si cu.

Ka umnak hmun khal ah Fur can a siih, ni thawng kengih khawlak suah a tul can a tam duh zet. Hnipuan tha kan hruh ngam lo ih, ram thangso vutvo a si lo ruangah, a ro ter sal lam ih harsatnak kan tawn ttheu ruangah a si. Zanlam ni a tla cuarco thlang ih, van tawl khal a thaizing ruah sur tum si awm zet vek in a um.

Khua a thim har nawn lo ding ti ka theih ruangah, ka tonak ding Hmanlung (Bus) colhnak lam pan cun ka feh ih, mawtaw sungih to an tam ruangah, kei putar khal in zoh man lo si ding, tonak in kiantu an um lo!

Inn ka thlengih, ka inn thing riapri, a luah hlumtertu ding ka hmuh thei lo ruangih thim rerep ahcun lutin, ka hnipuan ro lemlo cu ka hlip ih, angkibanbul ka  hruh ih, ka to theunak, tohkham zau ahcun ka kuak bawm thawn ka to lala. Khatlam ih nazi pi an tarmi cun, nazi zat in sim tum si awm tak khin, khawnglawng/Dar vei 9 a run tum cun, sim bet tullo in ka lunglennak cun ka nun pumpi cu i luah sal zo. Kuak ziangzat ka fawp man ti ka thei lo nan, a bul retnak cu hlon lo cun a ngah nawn lo ti cu hmuh theih a si.

Khami zan ahkhan, thlapa a vaang tuk lo ih, van mero sah tuklo in a zeel fawn. Hmansehla, lamzin siir ih meisa vaan mi cun kan hmel in palh ter cuang lo.

A lam ka hawi ih, a biang no sen hlerhli cu zoh khawp lo hman khalsehla, kan mit a tawnawk phangin ka zohnak cu ka tthawn lohli. Hmanseh, ka hngilh thei lo, ka thiamtawk ih capoh ka vun tuah can ih, a hmur no tle sersi kau ih a hni le, a mit tleu zerzi, zoih huatthu rel dah lo ding ih zum um hmuh cu ka hrang ziangbang a sunglawi ti zo in so sim fiang thei ding???

Ruah mallai a tla serso ih, hmansehla nithawng pakhat lawng a ken ruangah, ani khalin phorh a tum lo a bang. Ka thinlung ahcun, ‘Na nithawng phorh awla, kan zawnaw dingih, ruahnak lawng silo in kan taksa khal a naihaw sawn ding nan’ ti hmankhalsehla, relsuak thei dingin, ka ralthatnak in a tlin lo. Sualaw/Thawiaw ding sisehla cu, ka suupaw thei lo men thei nan, leitlun ralthuam cakbik, a nunnemnak sawn cun, ka sinak i ti niam ih, keimah le keimah sawn ka nautataw ih, a lakih ziang ka silonak le ka tlinlonak cu, saya pawl ih in sim theu hnakin, ka fiang sawn!

A kiangih ka um canah, mah le mah ka hmuniamaw zet theu nan, umlo in ka um thiam ngam thei fawn lo. Hmuhlo ka tumnak cun, hmuh hiar sinsin nakah mi a hruaiih, biaklo ka tumnak cun tongkam thiamlo cingih amah ka biak i ti tam tertu sawn ah an cang vivo fawn. Ka duhthusam cun, ruah kha tak zet in sur thlurthlo sehla, mi zaute hrawngah can rei sawn hmangin, amah ka biak ngam lo khalah, a rim tal thei thei dingin um sehla tiah ka ruat nan, duhthusam cu mual liam ol zet a si fawn.

An inn kan thleng zik thlangih, ngam le ngam lo in le ka neih sun theiaw cingin, “Lakphak kan in duak kem, na huam maw?” tiah ka sut. “Kan reilo ding ahcun a ngah ko” in ti ih, kan lut nan, ka thinlung cun, a ril a rak rawng pang dingih, ka zaal sungih daih lo mi kan cah sual pang kemmaw? tiih ka ruah laiah, lakphak cekci a cah ih, thisa/phah a in zawngih, a sat ruangih a hmur a vun tuah kawi lai ka hmu cu, ‘Van cung thaihliak teh ziang si ce’ ka ti rori. Ka lo duhlo i ti lo ruangah, beiseinak lamzin cu ka zawh ve rero a si cu.

An in kiang tiang ka thlah ih, kan mangthaawk hnu ah, manhlap he he in kan umnak lam ka pan ih, lamzin hrek ka thlen hlanah, feh lam ih ka ruahnak le duhthusam sawn kha a thleng ta riai!!! Ruah a sur ih, a tak thlurthlo ih, ka duhthusam cu ruahnak thar i pe tu ah a cang ih, beiseinak lamzin zawhih, ka ciin thlekthlek a si hi!!!

Ruahnak thar i pe aw, tiah Van tau phahin, ruah cu ka do so vivo ih, ka hnipuan hruhmi a ciin lo khal a um lo. Hmanseh, ruahnak thar i pe aw … ziangtin ruah do lo in a sawnnak ka co ding tiah ruahnak thar dilin cui zan ruah hnuai ahcun ka can ka hmang ti ka tonak hmun, thim ruamri ihsin ka vun ruah cun, ka kuak bawm khal a zaang zet thlang in ka thei ih, ka Computer hlun se zet ngaingai hmai ih to phah ding cun, inn sunglam ah ka luh san a si cu.

Hi ca ka ngan theh ciah hin, ka man suahmi pakhat cu, ” Kan tlawngkai laiah, kan saya pakhat cun, ka duh zetmi kha, ka fa lepawl an falat tlangval hnuah, rinlo zetin kan tawng aw cu, ka umnak ihsin ka tlu zikte” tiih a rel lai can ka mangih, khai can ahkhan rak hni hmakhalsehla, ka mawh hrih lo nan, tu ahcun, ‘A si thei ngai’ titu lam tang dingin ka um cu a si hi… Ruahnak thar i pe aw… maw Ruah … tiih ka ruahnak ka kawm lai fangah, ka umnak kiangah mino rual thawm ka thei ih, zilthli nem hawp phah tum in, ka kuak cu ka zual ta ih, ka suak.

An umnak a rak hla lo, Pa Tuan ih hla, “Kan nuam caci e” ti a sak mi kha ka mang ruangro. Fala nonal ngaingai le tlangval nonal ngaingai pawl cun Birth Day party an rak tuah ih, an kiang nai ih feh hman ningzah um lamlam khi a bang. An kiang naiah, kum upa pawl lennak Park nuam zet a um ih, cui hmun ahcun feh ka tum nan, ka thuruah a sau vivo pang ding, tiin ka suupaw sal.

Inn sung ka lut sal cu, “Aw… ka no lai can ahkhan ziang ah si nawmnak cen tummai lo ih, duhdawtnak ngai hawl ih ka rak va duh? Ka va rak aa lawmam so, ziangah ka thinlung cu nunau pakhat hrang ka rak hlan ih, ziangah ka dam sung hrang hmasi (Scar) ka tuahaw rero” tiah keimah le keimah ka mawhthlukaw nan, ka ruat sal, ruahnak thar thawn,  ka mawh lo, Leitlunah DUHDAWTNAK ngaingai co ngah lo ih, mual liam leitlunah an va tam so!!!

A cuih duhdawtnak ngaingai hlan ngamnak ka co hman kha ka van a va rak tha so! tiin ka hnemaw ih, ka ih a hmu lo nan, zinglam hnatuan ih tho ding ka si ruanga, ka kuak cu zual phah in, ka ihnak lam cu ka pan hruanhro a si cu.

(Visited 56 times, 1 visits today)

Comments

comments

Comments

%d bloggers like this: