Rohingya pawl Rammisinak Pe Ding ih Ram Ttangrual Milai Canvo Kawmitti ih Forhfialnak Cozah le Mipi in Elkalh

Rohingya pawl rammisinak pe ding ih Ram Ttangrual Milai Canvo Kawmitti ih forhfialnak cu an cohlan lo thu le daan ding lai a si mi 1982 kum Myanmar rammisinak daan thaw lawng in thutluknak tuah ding a si thu cozah le rammipi in an sawnsal ve.

rohingya

Rohingya pawl rammisinak pe ding ih forhfialnak cu Ram Ttangrual Milai Canvo Kawmitti in November 19 ah a nemhnget thu AP thuthangzung in a tarlang mi a si. Cuti ih a forhfialnak cu cozah, ramkhel party pawl, tlangsuak palaipawl le rammipi in an cohlan lo thu theih a si.

Cozah in Myanmar ram sungah Rohingya a um lo lawlaw ti ih a simphuan zo thu ah Ram Ttangrual in Rohingya timi a hman thotho cu an cohlan lo thu, le Bengali pawl ih rammisinak canvo cu 1982 Myanmar Rammisinak Daan thaw lawng ih tawlrel ding a si thu Ramhotu Tlangbawizung ih hotulam pakhat in November 20 ah a sim.

“Rohingya timi ramhrin miphun kan ram ah a um lo ti’n upapawl in an sim zo. Hitawk khal ah kan hmang lo lawlaw. Milutsuak Zohfelnak Zung (lah-wah-kah) daan thaw khal in a mil lo. Cumi kha kan cohlang lo. Rakhine ramkulh ih Bengali miphunpawl Myanmar rammi an si theinak ding cu cozah in a duh lo, a elkalh a si lo. Bengali pawl ih rammi si theinak hi 1982 Myanmar rammisinak daan thawi’ zohfel in a mil mi pawl pek an si ding,” tiah a sim.

Myanmar ram sungah daan vekih nemhnget mi ramhrin miphun 135 an um ih, cumi ah Rohingya timi a um lo thu, rammisinak cu 1982 Myanmar rammisinak daan thaw lawng in zohfel a si ding thu Milutsuak Zohfelnak le Rammipi Thazanglam Tlangbawizung ih Ramdingkhawm Tlangbawi U Khin Yi in November 20 ih 7 Day Journal thawi’ tonsuhnak ah a sim.

Ram Ttangrual Milai Canvo Kawmitti ih forhfialnak cu amah Ram Ttangrual lala in Myanmar ram ih ram sung thu ah a hrolhawk mi a si thu NLD ih thurelsiannak neitu U Ngyian Win in a si.

“Minung pakhat cu daan vekin rammisinak a nei thei ti kan theithiam ko. Asinan Rohingya timi hi kan cohlang lo. Rohingya tivek a um lo. Burma ram sanphung khal ah a um lo. Cumi hmin an hman ahcun ka cohlang lo,” tiah U Ngyain Win in a sim.

Ram Ttangrual ih forhfialnak cu rampi ih thuneihnak laipi (sovereinty) va hmuhsuamnak a si tiah Rakhine Democracy Pawlpi ih Hotu U Aye Thar Aung in a sim ve. “Daan ding lai a nei mi ram pakhat thuhla parah zovek pawlpi hman in hivek ih rel theinak a um lo,” tiah a sim.

Tufang ah Myanmar ram sungah Bengali mipum million 1.33 an um ih Rakhine ramkulh pakhat lawng ah million 1.08 an um thu Milutsuak Zohfelnak le Rammipi Thazanglam Zung ih cazin ihsin theih a si.

Ref: Daily Eleven, November 21,2013.

(Visited 306 times, 1 visits today)

Comments

comments

Comments

%d bloggers like this: