Riteek Um Lomi Feh Theinak

November 23

Tlawngkai Nihnih

Riteek Um Lo Feh Theinak

Siar:

Efesa 2:11-22

Khrih ruangah Judah mi siseh, Gentile mi siseh, kan zate in Thlarau pakhat thawngin Pa kan nei thei. Efesa 2:18

Kumkhat Sung Baibal:

–   Ezekiel 20-21

–   Jeim 5

Ni kum November ah nupa kop khat cu White House ah upa pawl zaanriah ei puai ah ningzak loin an lut ih USA President thawn thlalak tlang vekin a naihte ah an zuk aw. President inn ih lut ding pawl cu an thuanthu nasazet in an sut ttheu ih raalring te’n mileng cazin an cek tikah sawm lo mi an si kha a lang.

Khamnak um lo ih lut theinak hmun thupi cu tusan ah thil harzet a si. “Hnattuantu lawng Lut thei, Lut Hlah, Thuneitu Mawttaw lawng Ret thei, Lut Lo Ding,” tivek catar (sign) pawl in raalrinnak in pek. Kan zate’n “nan lut thei lo/lut sian nan si lo” ti ih in ti ding cu kan duh cio lo ding. Asinan ka lungawizetmi cu Pathian in A hnen ratu pawl hrangah riteek a nei lo.

Pathian hnen a ratu pawl cu, “Suak aw” ti an tong dah lo. Jesuh Khrih in Amah a cohlangtu hrangah Pathian hnen rat theinak ding lamzin a on zo ruangah thlacamnak in A hnenah ra ding Pathian in a duh (Efesa 2:18). “Thilrit a phurmi le zonzaih a tuarmi pawl ka hnenah ra uh, cawlhdamnak ka lo pe ding” in ti (Matt. 11:28). “Ka hnenih a rami cu zohman ka khir lo ding” (John 6:37). “Zokhal ti a haalmi cu ka hnenah ra sehla ra in seh,” a ti (John 7:37).

Khrih hnenah rundamnak ngah dingin veikhat na rat hnu cu Amah thawn rikham um loih pawlkom awknak le lungawi thinnomnak cu cat loin na nei thei. Na hrangah sangka cu on sak ringring a si.    – Cindy Hess Kasper

Kan thlacamnak cu van siangpahrang tokham a thleng,

Ziangvek in kan cam hmanah;

Kan Pa in A minung pawl ih thlacamnak a thei ringring,

Ziangvek ttongfang kan hman hmanah. – D. De. Haan

Pathian tokham cu a fale pawl ih pan thei ringringnak hmun a si.

Comments

comments

Comments

%d bloggers like this: