Riteek Hlah

November 28

Tlawngkai Nithum

 

Riteek Hlah

                                                           

Bible Siar Ding: 1 Samuel 3:1-18

 

A fapa pawl in ka thang in siatter ruangah a sungkhat pawl cu ka hrem hngai ding a si tiah Eli ka sim cia zo. A fapa pawl ih thil ttha lo an tuahmi a thei nain a kham lo.

–  1 Samuel 3:13

 

Ka rualpi nu in huatsuakzet kilkhawi theih lomi fapa pakhat a nei. A hung upa deuhdeuh ih leiba tampi a neih tikah a nu cun a kuan sak thluh ttheu. Thuphan a sim ruangah kaih a tong. Cutikah a nu cun paisa tampi cem in a fapa cu thlah saal dingin a leem. A nu cun a fapa in nehhnu lam ah ziangbangtuk buainak a suahpi lai ding ti thei loin a buainak cu riteek a neihter vingvo. Curuangah cuih tlangval pate cu ziangtik hmanah a nuncan le a cangvaih daan thlengh dingin a zir dah lo.

Bible in, Eli cun a fapa pawl ih thil ttha lo an tuahmi a thei nain a kham lo,  ti’n a sim. Eli in a fapa pawl cu an sualnak parah nunsim loih a umsan men ruangah Pathian Amah rori in a hrem hngai a si.

Zumtu pawl tla kan rualpi maw, asilole kan innsungsang mi pakhatkhat maw thil dik lo hril sual dingin thapetu vekah kan cang pang ttheu. An parah Pathian ih thuneihnak lang thei lo dingin kan hnaihnok ttheu. Anmah humhimtu kan si theinak dingah thil siavatuk an tuah lonak ding, Pathian lawng zoh ih a nuncan ziaza an thlengh theinak ding bawm cio uhsi! Cuti’n ti tikah zianghman ngaihsak loin kan hnong ding tinak a si lo. An dinhmun kha riteek tuahsak loin thazaang peknak kan nei thei, ih a dang cu Pathian ih thuneihnak sungah kan ap thei.

Thuneitu sangbik Bawipa, midang pawl ih nunnak ah Na thuneihnak lo hnaihnok ih ka luh ttheunak ah in ngaidam hram aw. Lamzin dik ih hruai theinak le Na hnenih hruai theitu si dingin in bawm aw.

Mi in Pathian ih thuneihnak an hmuh theinak ding hnaihnok khop in an nunnak sungah ziangmi si ka tuah pang ttheu?

@Pennington

(Visited 29 times, 1 visits today)

Comments

comments

Comments

%d bloggers like this: