Rinsan Tlak Sinak

January 13

Tlawngkai Nithum

Rinsan Tlak Sinak

 

Siar:

1Peter 2:11-21

 

Pathian zum lomi lakah ziaza zohtthim tlak in nung uhla tthat lonak a tuahtu tiin sual lo puh hman haisehla, nan nuncan tthatnak an hmu dingih Pathian cu an thangtthat ding a si.     -1Peter 2:12

 

Kumkhat Sung Baibal:

–   Seemtirnak 31-32

–   Matthai 9:18-38

Kan dung naite ih leitlun huap sumpailam harsat buainak ruangah mi in an sumpai cazin an zoh fel cio. Tangka cawi a ol ruangah mi tampi cu a hmanlam ah an raalring lo. An thil duhmi leinak dingah paisa khawl an paih lo ih an cawi hluahhlo men. Leibak neih an poisa lo. Hmanseh buainak a thlen tikah sumpai neih cu thil thupizet ah a cang lohli.

A baak ih thil lei theinak an rem thu an than hnu ah thuthang siartu in, “A baak ih thil lei theinak rem timi cu thil pakhatkhat na lei thei tinak a si lo; thil pakhatkhat na tuah a ttul tinak  a si,” a ti.

Himi thuhrampi hi mi ih zum le rinsan tlak sinak khal a huap cih. Cumi cu lei theih a si lo; ttuan ttulmi a si. Rintlak mi pawl thawn pawlkom aw in an hnen ihsin caan khatte sung mi ih zum le rinsannak kan cawi thei men nain a fung maw a rang in kanmahte neih kan ttul.

Mi ih zum le rinsannak co dingin zumnak phuan suah thei a ttul. Khristian pawl hrangih cumi a ttul sannak cu zum lotu pawl in kan nuncan tthatnak ihsin Pathian an thangtthatnak ding hrangah a si (1Pet. 2:12). Zumtu kanmah in zum lo asile Pathian khal an zum thei lo ding.

Rinsannak co dingih nun cu upat tlak ih nun khi a si. Mi in in zum dingih Pathian an thangtthat ding.

Matthai 9:10-13; 20:28; Luke 6:12 sungih Jesuh Khrih nunzia vekin ziangti’n na nung thei ding?

 

Kan nuncan ziaza kan fingkhawi asile

kan sunlawi upatnak cu  amah te  a fingkhawi aw ve ding.

Comments

comments

Comments

%d bloggers like this: