RFA In Kawlram Sungah T.V Thuthang Program Tisuak

Mizzima | January 22

RFA ( Radio Free Asia ) cun a hmaisabik hrangah T.V thuthang progam cu January 19, thlawngkaini li ah Kawlram sung rori ih an tisuah zo thu Mizzima thuthangca in a tarlang.

Kawlram cun ram remthat-awknak a fehpi vivo ih ramsung khal ah thuthang lawng silo in T.V thuthang lam tiang in zalennak pek an si zo. Cu vek ih zalennak pek a si cu mipi hrangah cun lungawi um zet thuthang a si ih ram dang ihsin khal in thuthanglatu pawl cun Kawlram sungah thuthang khal a rei hlanah zalen zet in an lak thei ding khal beisei a si.

Cu vek ih Kawlram cozah in zalennak a pek thu an theih ve ten RFA cun Kawlram sungah an T.V thuthang program cu an tisuak ve cih ih an program hman daan cu zianglam nazi 8 : 00am ah program hmaisa sawn cu nazi khuai sung suah a si ih Nobel Peace Prize ngahtu le opposition party ropi bik hruaitu Awng San Su Kyi thuhla : ramthukhel ding ih a register-awk thu, thuthanglatu pawl in hmaitawnnak an neihmi pawl le NLD party hmalak daan ding a relmi pawl in program cu a peh leh a si.

An program suah hmaisabik tum ah Suu Kyi in RFA cu mipi thudik theihter an duh ruangih an pumpekawknak parah a lungawi thu le a fak thu a tel ih  Suu Kyi cun, “ Hivek ih Kawlram sung rori ah RFA thuthang kan ngai thei hi a lungawi um in thansohnak khal a si. Kei mah rori khal ka inn ih kaihtar ka si lai ah RFA radio progam cun leilun le abikin Kawlram thuthang tharhlam bik pawl in theihter theu ih cuhleiah fimnak khal tampi ka zirsuak a si.” tiah a rel bet.

RFA cun an program cu zarhkhat ah zarhkhat sung, ni 7 rori in an pesuak dingih zarh tawp ah zarhkhat sung ih thuthang an tisuahmi pawl cu lawrkhawm in an tarlang leh ding a si. Cuhlei ah RFA T.V thuthang program cun hmaitawn thusuhnak pawl, ramsung le ramleng thuthang pawl, ramsung ih thansohnak a phunphun pawl le  Kawlram cozah in April 1 ih lailak-hrilawknak a neih dingmi pawl cu thlurbin in an tarlang tel cih ding a si.

Theihcia zovek in RFA cu private, hlawknak tel ding nei lo ih thuthang le thansohnak ding hrangih tawlrel mi program a phunphun pawl cu Asia Nisuahnaklam tawng 9 rori ih suah tu a si ih a hmuitimibik cu zalennak famkim thawn mipi in ramthu ah an tel ve ih an ruahnakpawl zalen zet ih an rel theinak ding hi a si.

(Visited 54 times, 1 visits today)

Comments

comments

Comments

%d bloggers like this: