Rev. Dr. Ro Hming Lian Leh CT Hmaitonnak

 

Rev. Dr. Ro Hming Lian Leh CT


Part I

Rongbawlnak

  1. Chinmi lakah Pathianin mangbangza ih a rak hman mi Evangelist tampi an um ko nan, hrekkhat cu an hmin theih ding hman a um nawn lo. Tuisunni tiang Pathian mi hman na si ringring theinak thuthup hi ziang bik a si pei?
  2. Na rongbawlnak sungah nangmah hmangin Pathianin a rak tuah mi thil mak (Miracle/s) pawl tla theih kan duh zet.
  3. Pathian hnatuantu hmuahhmuah hi Pathian kawh mi an si thluh maw? Pathian hin a hna tuantu dingah hril mi le kawh mi hleice a nei maw? A nei asile zovek/ziangvek mi hi a ko hleice theu?

Zumnak Leh Lamzin

  1. Tuihlanih a rak lar zet mi khurh laam (caih laam) le thlarau nausen tvp hi Thiang Thlarau hnatuan a si thei maw? Ziangruangah rei daih loin an riralsal?
  2. Japan na rak tlawn laiah Japan ram uktu khawsia thawn nan rak buanaw dah ti thu kan rak thei. Hi thu hi tam deuhin in ruah thei pei maw? Cule rongbawltu dang, cuvek rak tong dah vetu teh an um maw?
  3. Hrekkhat in rawl ul hi a tul lo an ti. Rawl ul thlacam ih a thupitnak, a umzia le a rah suah mipawl in simfiang aw.

Rongbawlnak

CT : A hmaisabikah, Thuthangtha na simnak hi kum ziat a si zo ti in sim thei pei maw?

RHL: Pathian zangfahnak in kum 15 ka si ah pulpit ka kai zoih, kum 20 ka si kum, 1975 ah Evangelist hmin in putter ve ih, kum khat sungah thla 7-8 tluk hrawng ka vak theu. Fulltime ngai ih ka tuan cu 1983 kum in a si ih, curuangah 1975 kum ihsi siar ahcun kum 37 a si thlang dingih, hna dang tuan lo roriih ka tuan cu 1983 in a si ih, kum 30 ti theih cu a si ve thlang a si hi.

CT: Rongbawlnak lamzin ttek tampi a um mi lakah ziangruangah ‘Evangelist’ zin hi na rak zawh kherkher?

RHL: Nauhak kum 5 hrawng ka si lai ihsin Pathian thu simtu si ka rak tum cia. Evangelist-pawl in thu an sim ih mi tampi thangphawknak an ngah mi ka hmuh ahhin Thuthangtha simtu Evangelist hi rongbawltu sinak lakih ka duhbik a rak si theu. Nauhak laiih ka thinlungin a rak duhbik theu mi kha Pathianin in tuanter si’n ka thei.

Rev. Dr. Ro Hming Lian leh nupi

 

CT: Chinmi lakah Pathianin mangbangza ih a rak hman mi Evangelist tampi an um ko nan, hrekkhat cu an hmin theih ding hman a um nawn lo. Tuisunni tiang Pathian mi hman na si ringring theinak thuthup hi ziang bik a si pei?

RHL: Rualpi dang hnakih ka fel le ka tlinnak rel ding pakhat hman ka thei lo. Pathianih zangfahnak pakhat ruangah a si ko. Thuthangtha sim lo bak tuan ding dang ka thei lo. Kum 30 leng Evangelist ka tuannak ahhin keimai lamah tluangkhawn ding pakhat hman ka nei lo. Rualpi dang cu tuah ding dang an thei ih, tuah thiam mi tla tampi an nei. Kei cu hi Evangelist hna lo hi cu tuan ding dang ka thei lo. Hi hna hi ka thih tiang tuan dingin Pathianin in ko ti hi rinhlelhnak tel loin ka pom zo.

CT: Na rongbawlnak sungah nangmah hmangin Pathianin a rak tuah mi thil mak (Miracle/s) pawl tla theih kan duh zet.

RHL:  Pathian zangfahnak ruangah khawruahhar thil hi ka tong tam nasa. Cumi lakah mipi tampi’n in theihpi mi malte, pahnih-thum lawng ka rel ding. 1984 March thla ih Falam meisa in a kang kha kanmah Methodist Biakinn ah in ruai ih, rawl suangtupawl an rak daithlan deuh ruangah coka in mei a suak si’n ka thei. Falam khawpi kangral thluh ding bangi a um laiah Baptist Biakinnpi dunglamah thla kan cam ih, Pathian hmin in mei kang nawn lo dingin keimah ah thuneihnak le thupek theinak a rak suak. Cumi mei mit dingih thuneihnak in pek mi cu ka aupi ih, khai Falam khawpi kangraltertu ding meipi kha Pathianin a mitter! Cucu mipi hmuahhmuah cun an thei loih Gospel Team ih ka hruai mi mi 12 in fiangten an thei.

Mipi theihpi mi lawng ka rel kei ih, 1989 kum ah Ku-Maing, tui Lungpili kan ti thlang deuh ahkhin campaign kan rak nei ih mi 900+ hrawng kan feh. Kan campaign thok zanah thlipi le ruahpi nasa nawnin a rak hrang ciamco. Mipi khal tlun thluh an tum ih, hmansehla, thlipi le ruahpi parih thuneihnak Pathianin in pe ih, thla ka cam ih ruahpi le thlipi cu Jesuh Krih hmin in ka hei kawk. ‘Amen’ ka tuah rualah thlipi le ruahpi cu a thawm le vang khal hmuh ding um loin a reh! Cui thil ruangah campaign fehpawl kha sim rero khal tul nawn loin sual theihsuahnak an nei ih tetti an khan ciamco. Pathian a hlawhtling zet. Thlipi le ruahpi parih thuneihnak hi Pathianin in pek bik mi a si’n ka thei. Vei tampi thlipi le ruahpi hi ka thlacamnak in a dai ih, keimah khal ruahpi sur lakih ciar loih ka um hi vei tampi a um.

A netabik cu, July 7, 2008 ahkhan Khampat ihsin zanlam nazi panga ah Tahan tlun a tul ih zanlam can ka neih ruangah. Khampat ka suah ihsin ruahpi cu nasa nawnin ka hmailamah a sur ih, Nankateh khua ka thlen in ruahpi a sur. Bike ka to ih, rain-coat khal zianghman ka hruh lo.  Ruahpi tampi lakah ka cin loih Hmuntha khaw tiang! Cangelzawl ihsin Tahan tiang ruahpi tampi a sur ih, kan inn ka thlen hmanah kan kotka ah lihong a luang durdo. Cin loin inn sung ka lut. Ka mit in ka hmu lo nan ka ruahnak ah van mithiang pahnih, vorhlam le kehlamah an rak um ih, cucun cin loin in humhim ih, ka bike khal ziangmawcanah cun a mawn ka theihhngilh ih ka kut hnih in “Halleluijah!” tin ka phar. Ka bike cu amahten a feh rero men. Cumi ni kherkher cu ka dungah Evan. Hmingsawia kha bike in a ra ve ih, kan inn ka thlen hnu nazi khuai ah kan inn ah cun a ra lut ve. Anih cu a ciar thliauthliau ih tohkham to ding hman a ngah lo. Fiangteih a theitu cu amah a si. Rel ding cun a tam tuk dingih hizat in kan duh tawk mai pei uh.

CT Palai Thawn

 

CT: Pathian hnatuantu hmuahhmuah hi Pathian kawh mi an si thluh maw? Pathian hin a hna tuantu dingah hril mi le kawh mi hleice a nei maw? A nei asile zovek/ziangvek mi hi a ko hleice theu?

RHL: Pathian thangthat ding cun mi hmuahhmuah lawng siloin, lei le van mi a um mi hmuahhmuah hi Pathianin in ko. Cui Pathian thangthatnak cu Pathian hnatuannak a si ve ruangah mi hmuahhmuah hi Pathian rongbawltu kan si ti hi ka pomdan pakhat a si theu.

Pahnihnakah, Pathianin pastor ding cun hril le ruah mi a nei. Missionary le Evangelist ding khalin a hril mi  le a kawh mi an um theu. Cuvekin roreltu ding khal Pathianin kawh ce a nei theu. Thil pek petu ding tiangin bulpakih kawh mi a nei theu ti hi kan Baibal in in zirh mi le in sim mi a si. Curuangah a thiamnak le a fimnak in a tlin ruangih pastor hna tuan mai an um thei. Pathianih kawh lo mi an si ti khal an memberpawl in an thei.

Pathumnak, Pathianih kawh ce mi cu mi cuvek an si ti ih hminsin theih cu a si lo. Amahlawngte, an vun tuan tikah Pathianin a rak ko ti hi anmah le mipi in an theifiang theu. Pathianih kawh ngaingai mi cu a Pathian hna lo tuan ding dang, hna dang, an thinlungah a um nawn lo. Pathianih kawhnak ngai a cotu cun a el rero khalle khai kawhnak kha a fiang deuhdeuhih, hna dang a tuan ah tluannak le malsawmnak a um thei lo. Curuangah Pathianih kawhnak cu theih lo a theih nawn loih, hi cu Pathianin a ko a si ti kha amah le mipi in an thei theu.

CT: Pathianih kawhnak fiangfaiten a thei ko nan a tuan duh lotu le a tuan paih lotu tla an um theu. Cupawl hnenah ziang mi na sim duh in na cah duh?

RHL: Pathian rong bawl dingih kawhnak fiangteih thei ih tuan duh lo kan Baibal khalah Jonah kan hmu. A lamzin cu kan zaten kan thei. Fiangtei Pathian kawhnak thei naih a eltu cu amah le a sungkua kha camsiatnak a pek ti hi kei cun ka theihfiang mi a si. Cun, a kawh ngaingai ahcun tuan duh lo a theih lo! A thei tawpin tlanhlo hrih sehla, a netnakah cun Jonah vekin a tuansal leh thotho dingih sirawk lawng a hrangah a hmabak a si. A kawh ngaingai mi cun el hmansehla an tuan leh thotho ti hi kei cun ka hmuhdan a si. Tuan duh loih a tlanhloh sung kha amah le a sungkua ah malsawmnak le hriselnak khal a tisiat thluh dingih, ti ding um lo mangbang tawpah Pathian hna a tuan leh kei, tam tuan man nawn lo’n a can a cem dingih a poi ti hnakih poisawn a rak si ding!

Zumnak Leh Lamzin

CT: Tuihlanih a rak lar zet mi khurh laam (caih laam) le thlarau nausen tvp hi Thiang Thlarau hnatuan a si thei maw? Ziangruangah rei daih loin an riralsal?

RHL: Thiang Thlarau hnatuandan hi ramri khiah theih a si lo. Mi tampi’n cumi ri cu ka pom lo, tvk le cuvek a si lo ahcun Thiang Thlarau a si lo tla an ti theu. Sihmansehla, Pathian kan si loih a ramri khiak ding tlak leitlunah hin zohman kan um lo ti hi ka pomdan a si. Kan zate pomtlang mi Pentecost ni ah an thiam dah lo mi tong in an tong ih, an theih dah lo mi tong hmangin thu an rel tikah anmai tong vekin an rak thei. Tong thar le tong hriat lo an tong ih, khami Pentecost ni vek kha a kumkhua in an si ve cuang lo a bang! A rehsal ruangah khai thlarau kha khawsia a si ti nungla a dik lo thei men.  Amahlawngte, Pathian rongbawltu diktak cun khawse thlarau cu theih lo a ngah lo! A umdan, a cangvaihdan action lam cu tah a theih lo nan a khurh ciamco ruangah khawsia a si ti mi le a ngui ringring ruangah ti mi ahhin tahnak dik a um lo. Khurpawl hnenih khawsia a um ih, ziangkhal rel loih um khawse thlarau khal a um thotho. Cuvekin a khur reropawl hnenah Thiang Thlarau a dik mi tampi a um. Ngui men, halleluijah vei khat khal ti lopawl hnen khalah a dik mi Thiang Thlarau a um ve thotho. Curuangah mit ih hmuh ih a langdanih rel men hi cu a dik duh loin ka thei. Tulai leitlun mi hminthang pakhat Benny Hinn khal hi Pentecostal a si ih, mi hrek cun khawse thlarau an tisak. Hmansehla kei cu khawse thlarau ka ti ngam ve lamlam lo! Ka tluk loih Pathian hman mi a si tin ka pom. Good Morning, Holy Spirit ti a ngan mi a siartu cun kan thei ding. Khur rero, umdan danglam tuk a nei mi a si. Khawse thlarau cu a si lo hokhaw. Curuangah thlarau mi diktak cun khawse thlarau theih theinak an nei ti hi cu a fiang ko.

CT: Japan na rak tlawn laiah Japan ram uktu khawsia thawn nan rak buanaw dah ti thu kan rak thei. Hi thu hi tam deuhin in ruah thei pei maw? Cule rongbawltu dang, cuvek rak tong dah vetu teh an um maw?

RHL: August 23, 2006 ah Japan khawpi Tokyo ka thlengih, cui khawpi ah cun kan Laimi an zaten 100 zik lai an um ding. Japan ahhin Billy Graham a feh ih, Benny Hinn khal a feh. Cule Paul Yonggi Cho khal a feh. Hmun dangih an crusade tuah vekin an rak hlawhtling lo ti hi Japan khaw sungih a umpawl in an rel. Yonggi Cho in khawse lalpai’ a rak ngiar le hro thu khal a ngan ih, Japan ka feh hlanah khami thu thei cia in Japan ka lut.

September 12, 2006 zanih ka thil ton mi kha thil mak zet a si. Midum, pa tumpi pakhat ka ihnak kiangah ka theih lo sungah a rak dingih, amah cu a dum ti men si loin a thim in a thim. Thim kan ti mi hin taksa nei sehla cuvek cu a si bik. Ka ih tong suak tul lo’n ka ruahnak thinlungah fiangten i biak ih, Japan ahhin ziangha na ra ti? in ti. Ka tong dah lo mi tongkam keimah in a rak suak ih, Emmanuel Pathian in hitawkih na ram siatbal dingah I fial tin ka ti. Cucun  a tihnunnak thlarau huham in ka taksa kha a run luah khat theh. Ka tih tukah tong thei lo vekin ka um. Hmansehla ka sungmuril ah Pathianih tleunak fate takte a rak um mi kha a run eng kau deuhdeuhih Pathianih tleunak khan ka taksa a run khatter ve. Cuisi cun setanih tihnunnak ka taksa ih um kha Thiang Thlarau in a dawi hlo theh ih amah hnakih tumsawnih theihawknak ka run nei!

Rel thluh ding cun a sau tuk ding ruangah in thlemnak hi pathum a si ih, cui pathum lawng cu tawiten ka sim mai ding.

Pakhatnak cu, dollar tampi ka hmaiah a run ret. Ka kut ih ka tham khalle a ngaingai a si ko. A lak ih ngah dingin in pe ih, paisa hi ka duh zet nan Pathianih pek lo mi cu ka la dah lo tin ka ti ih in neh lo.

Pahnihnakah cun, sex lam thil in in beisal. Fala mawi le mipa hrangih it-um zet pawlin in bei ciamco. Sihmansehla ka taksa ah Thiang Thlarau le Pathianih tleunak a khah ruangah in neh lo.

Pathumnak cu, amah setan cahnak huham tinkimin in bei ih, Pathian Thlarau in khami setan neh theinak dingin khatlam khatlam a hriam mi naam le Cross a zim le a baan thil ti theinakih khat I pek mi hmangin ka rak bei veih, cutin nehnak ka co!

CT: Hrekkhat in rawl ul hi a tul lo an ti. Rawl ul thlacam ih a thupitnak, a umzia le a rah suah mipawl in simfiang aw.

RHL: Na thusuh mi hi poimawh zet mi a si. Rawl ul thlacam hi thil tha a si aw ti menih rawl ulh a um thei. Cucu a poi zet cuang lo nan, huham thil ti theinak (power) an ngah cuang lo. A thupteih tluangkhawnnak a um thei lawng siloin rawl ul lopawl hmuhsuamnak maw, anmah hnakih niamdeuh ih ruahnak tla a suak thei ti cu kan zate theih cia mi a si.

Rawl ul ti mi hi a that ruangih ulh siloin, nulepai’ thih ni ih rawl ei duhnak kan nei loih thil dangin in luahkhat theh vekin, Pathian Thlarau lam thilah tul ti zet mi kan thinlung hmuahhmuah in luahkhattu thil kan tong thei. Thla cam lo khalle sungmurilah a um ringring mi, kan boruak ton mi ah a um theu. Cutikah cun rawl ul tul tinak kha kan thinlungah a rung suak. Minung hi ti le rawl loin kan nung thei lo. Kan nunnak bik ti le rawl ei le in loih Pathian kan karnak hi kan taksa Pathian hnenih kan hlannak (sacrifice) a si ding hi a poimawh zet.  Rawl ul lo hmanih thlacam ih kan ngah a si ahcun, rawl ul ih thla kan cam mi cun rawl ul lo hnakin tampi huham a nei ih, a danglam zet.

Mi hrek cun ‘rawl ul a tul lo’ an ti theu hmang.  Hihi rawl ul loih an hlawhtlinnak a um tinak men a si ih, rawl ulh boruak thleng ban ve sehla cu nasa sawnin anmah kha Pathianin a hmang ding. Rawl ul lo hmanih an hlawhtlin ahcun, rawl ulh boruak an thlen tikah mipi hrang le ram hrangah nasa sawnih hlawhtlinnak le huham neihnak Pathianin a pek hnu hmanah, anmah khal tluangkhawnnak le hngalnak hmuihmel lakah Pathianin a humhim dingih tuufano duhnunnak anmah ah a lang ding.

Part II  CUAN

Zumtu Nun Leh Ruahsannak

  1. Tuarnak (Suffering) hi thu ngailotupawl lawngih ton ding mi maw a si ih, zumtu hmuahhmuah ih ton ding hrimhrim? Tuarnak hi ziangruangah?
  1. Mi pakhat in a zawh ding mi lamzin hi Pathianin a hrangih a tumtah mi a si le si lo ziangtin a theithiam thei ding?
  1. Mipiangthar a si ko nain nun ih lang thei lo (a rah hmuh ding um lo) Kristian kan tam tuk hi ziangruangah a si pei?

Chin Mipi Leh Pathian

Chinmi tampi refugee dinhmun kan thlennak san hi ziangruangah a si pei?

Innsang Nun

  1. Nupi pasal kan hrilawk tikah Pathianin kan hrangih in remruatsak mi a si le si lo the ziangvekin kan thei thei ding?
  1. Nupi dam thei lo, a kum telih ihkhun parih ngor ringring, neitu mipa hin a nupi hi a then thiang maw? Asilole, minu dang hnenah a taksa diremnak tuah teh a thiang pei maw?

Calai

  1. Milai hrangah calai hi ziangtlukin a thupi? Ziangruangah ca siar a tul?
  1. Cangan thiam si dingin ziangtin kan zir thei ding?
(Visited 150 times, 1 visits today)

Comments

comments

6 Comments

  1. Hitluk interview ropi ka siar dah ngelcel lo.

  2. Ka umnak sizung ihsin hi thupawl ka siar tikah ka mitthli a haal. Pathian thiltitheinak a maksaktuk lawmlam.

    Pu Hming cung Pathian thu neihnak thawn thlisia le ruah na kawk cawl thu ka siar cu ka lungawinak mittli a luang.

    Pathian thiltitheinak ka hmuh tikah lungawi in ka sup aw thei lo theu.

    Azaten siar ding ka hngakhlap.

  3. Zodai Zilthli says:

    Thazâng ka rak ngah ve…
    Pathian in thlarau hlo tampi hruaisuaktu ah lo hmang vivo hramseh.

  4. vanneizing says:

    sayapa ih thu let mi ka siar mi cu kei mah ah sim thei lo mi lungawinak sang thazaang thar ii nei ter. Rawl ul thu hi kei mah rori Apr 4 ni sun ih ka pahsuak mi nun a si.Pathian mual neinak bik le kei mah lam suang ding um lo nun ropi ka hmu. sayapa sim mi ka siar ngah cun cui niih Pathian ka hnarhno nak mit ti a hal sal. Pathian a sunglawi ngai si. A dang pawl khal thazang ka ngah zet. Tuan vo lak tu nan zate parah lungawi nak tumpi ka nei. zuam sinsin uh nan ca suah mi tete an tha thei nasa.

  5. A ropi hle mei! Sihmansela, Laimi pawl parih Pathian hnatuan dan hi a caan ah cun mangbangza asi in ka thei. Hrekkhat kan Pastor le Evaneglist pawl hi, inti piangthar/thlarau viau siin Kohhran kan ti buai/then/kuai, Kohhran/Pawl dang kan din Pathian thlarau ngai ngai asi
    thei pei maw? Sinak, Thuneihnak le Tangka kan duh ruang men asi thei pei maw? tihi ruahding tampi a umin ka thei. Kan ram, Malaysia le USA a khal Laimi (Chin) pawl cu kan buai/then/kuai aw cing cing hi zuangruangah asi pei? Kan Pathian hin remdaih awknak a keng tel lo maw???

    Falam Siampahrang Rev.Dr. Hre Kiau in ZOHMAN VATI BUAI/THEN/KUAI HLA UH! tiin Laimi pawl in caah asi kha. Kan zateih nunpiin, cing ring ring kei uh!!!!

  6. Thazang tampi ka ngah. Pathian in hmang sinsin sehlaw..

Comments

%d bloggers like this: