Rev. Dr. Hre Kio Ih Hakha Laihlum Pawl Hnen A Thucah Hi Ruah Tlak A Si

hqdefault

– Van Bawi Lian

Ka rual Aanau in Rev. Dr. Hre Kio ih thusim mi na ngai zo maw tiah kan biakawknak titi tluang ah a rak ṭheṭholh. Keikhal cun a khawi mi bik tiah ka tiih, a link te in rak kuat cih. A thusim mi ah thlarua ciamco cu a um in kei cun ka theilo. A rak um tla a si men ko ding. Asinan a thusim mi hi ka uar zawng le ka lak zawng a si ruangah a si ding, I ciahneh zet ih ka ruat peh vivo. Ramkhel party pawl ih rel ding mi awm le nor ding awm thuhla mawi a si ih khawtlang mipi zate hrang ih thilthupi zet a si.

Vantlang mipi pawl hnenah sakhuanak hruaitu upa pawl in hivek in nor vutvo sehla ziangtluk kan Chin ram le kan vantlang; Chin mi pawl kan thlennak hmun pohah kan ṭhangso pei ti ka vun ruah ah ka khawsik hmul khal a tho rori ih ka lung hmui tuk. Ka uar hleicenak khal a thinlung kekkuai rori in hi thu hi a rel tiah keicun karak hmuh ruangah khal a si ding.

Rualpi pawl thawi  kan titi caan khalah hitin ka ti ṭheu, ‘Chin mi pawl kan vanṭhatnak pakhat cu, Pathian thu kan duhnak hi a siih, kan van siatnak khal a si telve cih thotho’ tiin ka ti ṭheu. Chin ram ṭhansohnak dingih cangvaihnak ah ramkhel party pawl le vantlang hotu upa pawl ih an nor le tham ngam lo mi khal, sakhuanak lam ih ṭongkam khatte in a thamban thei. ISIS pawl bangin a siatnak lam ah kan hmang lo ih a tawk deuh lai.

‘Chin mi pawl hi hlansan ih Samari miphun vek kan si. An ni pawl cun Pathian an sawm ih nihnih a caam bet kan hnenah Bawi Jesuh kum 100 lenglo a caam zo,  a caam ahcun hmuhsuam mi kan si lo ding. Pathian kan nei’

Asinan a lehlam ah kan sakhuanak le zirh awknak ruangah, sungkua pakhat khal hmunkhat ah rawl kan ei tlang thei nawnlo, vantlang mipi khal vaivuan in kan um phah ih, miphun hrangih ṭuan hi setan hnaṭuan vek ih rak phuangtu khal kan sakhuanak a si ṭhiamṭhiam. USA, Canada, Australia le leitlun ram dangdang ih um, Chin mipi le vantlang mipi hruaitu pawl ruahnak le hmakhua khar bettu le, ti beidongtu bik khal kan sakhuanak hruaitu pawl ih thuzirhawk dan le vantlang mipi hruai dan hi a si thotho. Bet ding a tam zet nan hizat in tawk hrih sehla..

Chin mi sakhuanak zirhtu pawl an sual tinak lam siloin, vantlang mipi pawl nun an fah mi ah van lam thlarau silomi, mai khurbik le mai kua ih lal theinak ding, thlarau pawl an tuh ṭheu ruangah a si tiin kei cun hmu.

Leiltun santhar thleng aw rero lai fang, Chin nunphung, vantlang mipi kan phawklek rero lai, Chin mino tampi pawl ih thitha a zaat laifang te ih Rev. Dr. Hre Kio ih a thu cah hi Jesuh Dungthlun Paul ih cakuat vek tla khi ka thinlung in a vun mang.

Hi thucah hi Chin Baptist Church, USA, a vei (5) nak civui ih a sim mi a si. Youtube ah June 18, 2015 ah CMSP production pawl in an ret mi a si. A thusim mi a thok ihsin a cemtiang cu minute 59 le sekan 43 a si.

A thusimmi pawl hi a thok ihsin thupi zetzet a rel, Chin ram a seherhnak le Pathian thu ih ram zalenlo kan sinak pawl khal a rel vivo. Ka uar zet mi a thurelnak cu a netlam ih asim mi hi a si.

A thusimnak ah Samaria ram hmangin a thok ih a cemnak khalah hitin a sim nawnsal ‘Chin mi pawl hi hlansan ih Samari miphun vek kan si. An ni pawl cun Pathian an sawm ih nihnih a caam bet kan hnenah Bawi Jesuh kum 100 lenglo a caam zo,  a caam ahcun hmuhsuam mi kan si lo ding. Pathian kan nei’ tiin a thusim kharnak ah a rel.

Ka uar biknak a ṭong fang hi minute 50 nak ihsin a rel thok. Hitin a ti ‘Bawi Jesuh ih in fial mi cu Pathian ram khal hawl uhla, dingthluk lairelnak(taya-hmiyah-tah-hmuh) khal hawl uh’ tiah tiin in ti. A aw suah dan khal malte a danglam deuh ih, thinlung takte in hithu a rel ti theihthei ding fahran in a kut tuahdan le a mitthmai pawl khal a ti danglam thluh.

Cule hitin a peh vivo.. ‘Kan ram ah kan Lairam ah dingthluk lairelnak a um lo tuk. Kum 50 biak inn sak kan tum nan kan sak thei dahlo. An mah nih cun an duhnak  hmun poh ah Pagodah an sak. A taza lo tuk. Kan Bawipa in taya-hmiyah-tah-hmuh hawl uh tiah in ti. Kan hawl lo ding maw! Curuang ah Halkha ih um mi pawl nih thaten rak ngai uh law! Budhis pawl in Rungtlang ih Thinglamtah kan phun mi kha, in phawi sak. An mai pagoda an sak. A taza lo tuk. Taya-hmiyah-tah-hmuh kan hawl ding a si ahcun, ziang kan tuah ding? Tuah ding ah ka sim duh mi cu, Rung tlang ih Pagoda kha va phiat uh ti khi a silo. Asinan khawthar inn lu ah tlang a um. Falam lam fehnak lam ah tlang thate a um. Pakhat pa nih thlacamnak inn a sak. Cucu cozah in an laksak. A taya lo tuk.

Curuangah Hakha um mi khrihfa bu um pawl nih, kha mi kha rak lak sak sal uh. A taya, a dik. Kha pai inn sak mi lawng silo a tlang pumpiin rak ham thluh uh. Rungtlang an lak thluh. Kan lak thei nawn lo. Khat lei tlang cu kan lak ve ding rori a si. Cumi cu Pathin in dingthluk lairelnak hawl uh in timi cu a si.

Thawngtlak a tul ahcun rak tlak ko uh. Rawl Ul a tul ahcun rak ul ko uh. Ṭap a ṭul ahcun rak ṭap ko uh. Hivek taya-hmiyah-tah-hmuh hawl dingah si Bawipa nih in fial. Pathian ram le taya-hmiyah-tah-hmuh hawl uh.

A ngaingai ti ahcun Pathian ram le taya-hmiyah-tah-hmuh hi a peh aw mi asi. A dangdang pi a silo a peh aw. Pakhat kan hawl tikah pakhat thawn a pehpar aw cih.  Kan tuah thei pei maw!! Kan tuah thei ding. Kan tuahthei ding ka tinak cu, Laimi leilung tlun mi zaten kan funkhawm ahcun, kan funawk a tul. Kan zaten kan funawk a ṭul. Kan funawk ahcun kan aw hmuar a nei ding…… cutin a thusim tlangkhawmnak a tuah.

Rev. Dr. Hre Kio lawng siloin Lairam, Lairawn, ram tinkim ih a thlengtu kan sakhuanak hotu pawl in a dikmi vantlang mipi zalam hrang vanlam thlarua fah phahin funtomawknak ding le dingtluk lairelnak, hnaṭuan khawmnak ding hi in zirh bet ding kan ṭul a si.

Rev. Dr. Hre Kio ih Hakha laihlum pawl hnenah titak te ih a thu cah mi hi kan vantlang mipi zate hrangah titak te in ruah tlak a si.

A simi lak ihsin ka uarnak fang Video, Pum Cing timi  nih a rak upload ih ka rak ther.

A thusim mi video zaten ngah duh  hrangah;

Comments

comments

Comments

%d bloggers like this: