Rev. Don Hre Dun thawn Hmatonnak

Rev. Don Hre Dun thawn Hmatonnak

Profile:

Hmin                     : Rev. Don Hre Dun
Nu le Pa               : Pu Ca Thuan (Laizo – Zalai, Laisak) le Pi Hrang Tlem (Laizo – Zalai, Zahup).
Suah ni                 : April 10, 1947
Suahnak khua    : Laizo – Zalai
Qualification/s   : M. Sc (Zoo), B.R.E., B. Min.
Innsangnu           : Pi Zing Cuai
Falepawl              : Mai Sui Ngun Par (Bingbi Par), Mai Ann Zung Len Cer (Karate Champion, 2012), Salai Jerry Ram Lian Thio, Salai Joe Thian Kip Ceu.
Umnak                 : Chanmya Thazi Myone, Yangon-Mandalay zinpi kiang, Mandalay.

309736_2468309302073_1303491063_n

CT           : Pu, ahmaisabikah na thuanthu tawi theih kan duh. In sim thei pei maw?

DHD       : Sim thei tuk e. Ka thuanthu tawi cu hitin lo ziang; kum 1969 ah matric ka ong ih, Mandalay University ah Zoology Major ka lak; kum 1971 ihsi in Karate ka lek thok ih, kum 1975 ah Black Belt le B. Sc ka lak theh hnuah, kum 1980 ah Zoology Department ah hnatuan ka ngah. M. Sc cu kum 1982 ah  in pek. Kum 1981 ah Pi Zing Cuai thawn kan neiaw ih, a tu Pathian in fanu pahnih le fapa pahnih thlawsuah in pek; an zaten degree an ngah thluh zo. Suikuk (Bingbi Par) cu Myanmar TV & Radio, Chin Program ah a tuan. Ka pa cun 1947 kum ih Civil War ah in rak liamsan zo. Ka nu cu Col. Hrang Thio-ih farnu, nautabik sangtu a si ih, 2001 ah in rak liamsan.

CT           : Ziang tik kum ah Pathian hnatuan na rak thok?

DHD       : Kum 1981 ah Pathian kawhnak ka rak dongih Mandalay ah Pathian thu ka rak sim phah theu. Rev. James Biak Lianih tlawng le Rev. Robert Thawm Luaiih tlawng (Falam) tla ah ka rak bawm phah. Cun Col. Khun Nawng tla thawn siseh, Saing Aung Nyein le Daw Snow tla thawn Campus Crusade ah ka rak tel ve dah.

CT           : Ziangtik kum in hnatuan na rak cawl?

DHD       : Kum 1987, March thla, Pakukko College (University) in ka bangih, 1988 ihsin 1990 tiang Camp Evangelism lamah vei 20 lenglo ka rak tel.

CT           : Ziangtik kum ah pastor na rak tuan thok?

DHD       : 1993 kum ah F.B.A Evangelist in 1995 tiang ka rak tuan ih, khua 80 lai ka rak tlawng. Cun, 1996-1997 kha Z.B.C ah Carson Hall, Coordinator ka rak tuan. Cule 1998 in F.B.A, E & M Secretary ka rak tuan ih, 2000 – 2003 tiang F.B.C ah E & M Secretary le F.B.A Chairman ka rak ceem; cun F.B.P khalah Part Time in Education Chairman ah in ret. Ziangtik laiah in hlon ti cu ka rak thei man lo. Cun, 2004 – 2008 tiang FCC Secretary ka rak tuan ih, cui kum FBA Triennial, Bual Khua in pension ka rak la; cunah kum 59 ka rak si.

CT           : Pu, karate teh kum ziat na rak lek? Cule Pathian thu le Karate teh hi a milaw ko maw?254510_149838925089508_2214081_n

DHD       : Karate cu 1971 ihsin a tu tiang ka lek lai ko. Pathian thu thawn an naiaw zet. Karate – Pu Kichin Funakochi in ‘Mi upat thiam ding’ ti hi a rak sim bik mi a si. Pathian thu khalin mi upat le duhdawt hi in zirh bik.

CT           : Funakochi cu zosaw a si? Cun Falam lamih na zirh mipawl hi mi thawi le mi vel ah an vak an ti bangih?

DHD       : Funakochi cu Japan ram ih Modern Karate Founder a si. A kum 93 ah a thi. Amai tinakah cun ‘Sii le vai ka ei dah lo’ tiin a rak sim dah. Cule Laimipawl, a tamsawn Karate zirh hi sirawknak tampi a um. Saya upat le tihzah khal kan thiam lo. Cule thiam lo piih mi zirh le mi thawi hi kan uar tuk ngai. Cucu Lai Culture a si ko! 

CT           : Asile ‘Art le Sport’ ih danglamnak in sim thei pei maw? Ziangtinsaw a umdan bik hi?

DHD       : Ka sim thei tawkin ka lo hlawm ve pei cu: ‘Art’ ti mi thiamnak (Anuhpinngia) hi mai paih le zuam ruangah tuah le zir a si ih, suahpi talent cu a tul ve. Karate, Judo, Kendo (naam sah) pawlih sim asiahcun thinlung nehawk hi a thupibik ko. Taksa le thinlung hmunkhat thei ding hi a si ih, a tul can ah ruatcia loin amahte a suak thei. Laimipawlih Lae Taing (thli taing) ti mi hi a taktakah cun dikteih um thei asiahcun mit hmuh lo khalin a khamaw thei. Asinan mi huatnak, thinhennak, le duhhamnak a um asiahcun sunralnak ah a cang thei. Korea ‘Tae Kwon Do’ sayalepawl tla cun Karate lekpawl cun ram hrangah rintlak ding; ram le miphun duhdawt ding; nunau le mipa lamah rintlak ding; mi zawn ruah ding, mi zangfah le mi upat thiam ding, tiin thukamnak tuah a si. Hi mi hi kan Laimipawl zirh an si nan an thlun thei lo. Zangfah ding kan si. Ziangah tile kan thanlennak hmunram le theihnak a tam ruangah a si thei.

Cun, ‘Sport’ (Lehpannak) ti mi hi cu neh ding rori ih tumtah a  si. Cuihrangah Martial Art (Ku-khan-Pinngia) thaw cun a dangaw ngaingai. Asinain ‘Karate’ khal hi Olympic ih telh a si tikah Martial Art ih lungput a si mi, mi upat le lungthiang tei leh a um nawn loih a lungput dik a hlo thei. Dik loih ttanawk a um pang theu. Sport le Game hi cu nomnak le harhdamnak deuh ih leh a tam deuh ih, Martial Art hi cu mah le mah nehawknak, ziaza thatnak, thinsaunak, le supawk theinak dingah a sisawn.

CT           : Na rak no laiah mi thawn nan sualaw dah maw?

DHD       : Sualaw dah lo. In thawi ih ka rak kham men a si ko.

CT           : Na sayapa hi a dam lai maw? Ziangtlukin a thiam?

DHD       :Sayakyi U Kyaw Nyunt (Peter Thant) le Sayakyi Richard Chan an si ih, an damcak lai ko. A tu Mandalay ah an um ih, kum 75 lai an si. Mirang ca an siar thei ih, a tong khal an thiam veve. Japan le Mirang pawl thaw khalin an rak lektlang dah ih, an upat zet. An sim theu mi cu, ‘Ziangtluk thiam khal awla theihnak na neih lo ahcun a lak men a si. Cun, Karate ziangtluk thiam khal awla saya upat le lehpi upat na thiam lo ahcun thiam lo belbel hnakin a sualsawn,’ tiin nun in sim ringring theu. Sumpai le cawmawknak menih Pathian hnatuan hnakin Karate lole Martial Art leh hi a thasawn a bang!

CT           : Na no laiah Competition (Tournament) ah na rak tel dah maw?

DHD       : Kan no laiah Myanmar ah tournament a rak um lo. Kan van a sia. Club sung lawngah kan nei theu. Cun thla 6 vei khat ‘Show’ kan nei theu ih, zialpheng (plank) pahnih (zungbok khat ih sah) ka sat theu. Cun Kata, Chinte (Strange hands), Unsu (fist of cloud), le Basai Sho (Attacking Castle) ti mi Kata-Form ka lek (show) theu. Ka no laiah cun sathaufar (candle) tumpi kha tlu lo ten ka rak sat thei theu.

CT           : Tu teh ziang na bang lai?

DHD       : A tu cun hmakphek suk (lungcang) le arti parih fu lawng ka hmuh theu. Thingpheng tipawl hi cu ka ti paih nawn lo.

CT           : Na fale ah zo an thiam bik?

DHD       : Upabik Mai Bingbi Par hi cu thla khat lawng a zir ih ‘bow’ ti mi Karate ih mi upat cu a thiam ve. Salai Jerry le Joe hi Black Belt an si veve ih, Zung Len Cer hi Brown Belt (2012 Champion le 2nd vei 3, 3rd vei khat ngah) a si.

CT           : Tlawngta na nei tam maw?

DHD       : Ka nei tam nan rintlak lo an tamdeuh ih riahsiatza a si.

CT           : Tu hi teh ziang bik na tuan theu?

DHD       : Mandalay ah Honorary Pastor in 2012, April ihsin tuisunni 2013, February tiang ka bawm. Cun Ywatitkyi ah Bawipa Zanriah ka pe theu. Cule tu hi Pyin Oo Lwin (May Myo), Falam Baptist Church ah Part-time in ka tuan. 2013, February in ka tuan thok. Cun Tamu, Falam Baptist, Zaydaan-7 le New Eden Baptist Area, Falam ah Honorary thotho in (Tamu, kum 1 le hrek, N & B kum 1, le Kanan Baptist Church) khalah ka tuan.

Karate khal zarh khat vei hnih, Mandalay Black Belt pawl thawn kan lek theu; ih, kan sayakyi U Kyaw Nyunt in in zirh theu.

CT           : Na leh ruangah hin ziang thathnemnak a um?

DHD       : Taksa cangvaihnak neih le leh hi a thahnem zet. Damnak a si hleiah mah le mah rinawknak a um ih, cun thluakhri (brain cell) thar a hringsuak ih, nausen lungput (Tangepian/Juvenilism) ti mi a um thei lo. Mah kel tein thluak a tha thei.

CT           : Cule na B. Sc le M. Sc kha ziang subject bik saw na rak zir?

DHD       : Ka B. Sc cu ‘Nga’ (Itchtheology)  a si ih, Marine Fish, Fresh Water Fish thupawl a si. Cun M. Sc cu Herpetology ti mi ‘Bokvak’ a si ih, ‘Rul’ thu deuh a si. A hmin cu ‘Taxonomy of Burmese Non-Colubroid’ ti mi Kawlram rul-tur-nei pawl deuh hi a si. Kum 7 rei rul thu ka rak zingzoi.

CT           : Lairam ah rul-tur-nei phunziat lai a um pei?

DHD       : Sim thei e. Laitlang (Chinland) ih rul tur neipawl tla cu, Rulngan (King Cobra), Liim lole Cong-or ti mi (Black Cobra) le Rulha tla an si. Rulha phun thum an um: Sim rulha hi hringdup le hring-eu an um ih. Zo rulha cu khawfi rong ih ttekttial a si. Sim rulha cu Mirangin ‘green-pit-viper’ an tiih Zo rulha cu Jordoni (Trimeresurus jardoni) tiin an ko. Tih an nung zet!

Sumpai bawmtu nei sehla Laitlang Rul (Chin Snakes) tla hi zingzoi ka duh zet nan_ nga thawn lo ziang. Cule kan Laimi tla an beng a var deuh ding. Cun ‘Viper’ ti mi hi nui pumsungih ‘Tii’ ih seem hnu a fakeuh lengih suak an si. Rul dang cu tii in an tit ih op tul le tul lo an um. A tambik cu Saphai le Rulngan in an op theu. Central Myanmar ah cun Rulngan hi phun nga lai a um ih, kei hi phun li lawng ka ngah thei. Cun Mandalay, Madaya lamah hin Cong-or (Ringhal Cobra or Spitting Cobra) ti mi tur-zit-thei cobra a um thei men. Malaysia ah cun a um tiin record an ngan.

CT           : Ka lung a awi zet. Mipi hnenah ziang na cah duh bik?

DHD       : Ka cah duh bik mi cu, Laimi (Chinmi) tla hi ziangkim theifiang ko zirsuak ih, specialist si thei zuam sehla, cule dik le fel zetin rintlak sehla, cule mai miphun tan le bawmaw in hnamdang tla upat in, an calai, an nunphung, an tong le an biaknak tla upat sehla; Lai-Christian tla hi miih zohthimtlak kan si thei ding. Cule Church din le Bible tlawng din hnakin NGO tla tampi din sehla; cule kan bawmaw thei dingih hnatuan tla kan nei thei ding; tiin, mah hman tling lo cingin cah ka duh. Ka lung a awi zet. Himi siartu nan zaten Pathianin nunsaunak, damcahnak, le lenfimnak lo thlawsuah hram seh! Laimi, nau duh hlah law. Kan duai ve ce lo sokhaw maw!

Comments

comments

Comments

%d bloggers like this: