Rethei Fa Ka Hrang Țahnak (Part- III)

sad-man_thumb
Thlithiang hawpin dai zirziar tei’ a nuam aw rero lai cu khurhnat tuartu men bang a taksa khal an sa hethet. A thlan hripi a ciap. A thil hmuhmi ruangah a dang tiangin a caar. Fala nu cun duhnung mithmai pan siamsi thawn a rak hnihsan. Um hnailo a cil cu a mitsing in a von dolh ruapri. “Lasi fala ka hmu maw si himi? Asilole zaan mang ka man maw si?” tiin a sut aw rero. A khawruah țhat laiah a kiangte in aw pakhat a thei. A hong fim harh puppi ih a sir a her. Lasi fala ih a ruahmi fala nu cun, “Uu, nang Falam in maw na ra?” tiin aw neem takin Hakha țong cun a hon sut. Pa Hum cu thi le tha khal neilo mi bang rau diapdiap ih a umnak ihsin a hong fimharh ih, “Aw. Falam in ka si. Rualpipawl thawn kan ra nuam aw ta men.” tiin a hon sawn. Cuih fala nu cu “Aw…..” ti phahin a lu a sut hmuthmo. Pa Hum cun, “Nangteh Hakha in maw? Ziangah Hakha ihsin hitawk cancan nan rak ra?” “Aw…. Kannih khal tlawngkai tlang rualpipawl thawn kan rak nuam awk ta panteh”. Cutin an thu a feh vivo ih rualpi dang ziang an tuah tikhal thei nawn lo’n thu an rel. Pa Hum cu nidang ih Fala biak ngam dah lo le thinlung khalih ret dah lem lo asinan tuițum cu a linglet tariai. Fala nu ih hmin le a cungcang pawl a sut. Fala nu ih hmin cu ‘Hniang’ ti lawngin a ko. Cutin ziangtik lai ah nikhat a rak liam tikhal an thei man lo. Zaanlam tlun a rak cu zo. Phone number an pe aw ih cutin siang lo cingten mai khualam pan in an tlung veve.

Pa Hum cu bang tukin zianghman tuah paihlo’n tohkham parah a zau. Sun ih an um tlandaan pawl a mitthlam ah a von suai ih a lung a hong tur ciamco. Amah le amah hi mak a ti aw tuk. “Himi hi maw duhdawtnak an timi? A hmaisabik hmuhnak in duh cih timi hi ka hma khua ah a thleng ve maw???” tiin a sut aw rero. “Pa Hum!!! Pa Hum!!!! Phone a ra” Pa hum cu a uu LL ih aw a theih veten a tho vukvi. Zohman Pa Hum cekci hlam in phone tu a nei dahlo. Ramdang ihsin phone a sicun a uu le a nu le pawlin an biak hmaisa ringring. A tu cu…. A tu cu…… PaHum cu “Uhum!!!” tiin a dang a von thian hnu ah a aw neih hmuahhmuah lakih a neembik suah in, “Hello….. Pa Hum ka si. Zo si ta?” a von ti. Khatlam ihsin, “Khik..khik…khik…” tiih hnih aw a thei. Cuih hnih aw cu a neel zet vekin a thei. Asinan a zum ngam ciah lo. Khatlam ihsin țong a hon thei sal. “Uu, na bang maw?” ‘Uu’ timi țongfang cun a tak pumhlum tiang a țim suarso ter thei. Nasa ngai in tha a hon la ih, “Hniang, ka bangtuk tin ka ruat aw nan na aw ka theih veten ka banghnak hmuah a hlo thluh. Vanpar mero lakih zam vekin ka thei aw,”
“Hihihi…….. Thungai maw?”
“Thungai panteh”. An phone biakawk cu nazi pakhat a rak kim mai. An khawvel ah zodang an um nawnlo. Cutin zaantin phone an biak aw ringring.

Pa Hum tei rualvahza cu ramdang feh dingin Yangon an thleng taktak thlang. Pa Hum cu pa Tuan hla ih “Cinmual tlang na liam hnu cun” timi khi “Cinmual tlang ka liam hnu cun san tlailo val tiin i hngilh siang hlah” tiin zaantin a sak. Yangon an um sung khal Hakha ah cun phone a ko ringring. “Hniang, Malaysia ah kumli ka um dingih ka rak tlung sal ding. I rak hngak tengteng aw maw,” tihi a nitin thucah mi cu a si. An rualvahza in Malaysia kumli um hnuih kawlram tlungsal tahrat ih hnațuan picang țuan tlang dingih thukamnak an nei. Ni le thla a herliam ih Yangon an umnak thlakhat le hrek khal a rak kim thlang. An passport an hon suah ih Agency ih bumnak tongtu ah an rak tel ve ngelcel. An panga lakah Pa Hum pakhat lawng ramdang feh a rak ngah. Khaițum ah Agency(Puaisa) ih bummi kan laimi tampi an rak um. “Ziangtițha Leitlun cu bumawknak ram a sisi” tiin a țha zawngih ruah thiam an zuam. Cutin “Duhdawt aw zet ko na in nang le kei hi um tlang thei lo’n kan um mitthli thawn….” Pa Tuan ih hla cu thihcilh ngam tlukin an sak. Mipa an si nan sen rual rori an si tikah mitthli thawn Airport ah cun Pa Hum cu Bye-Bye an va pek ta hai.

“Rualpi țha maw na fala zo na hril ding?” tiin thusuhnak tong sehla “an pahnih in ka thlah theilo” tiih a let tumtu Pa Hum cu rualpi țha khal țhen lungduh fala thawn khal a hlatnak panin lungkuai thuahhnih thawn Vanzam parah cun a thleng. Vanzam leng tukverh sangka te in khua le ram a cuan ih a hmuhmi thil ziangkim hi a lung ti zuurtu ah an cang thluh. A biangki no parih dai kiahkoih rong luang a mitthli cu a hon hnulih, “Țhen awknak cu ton salnak hrangih a hram a si. Kumli hnuah ka rak tlung sal ding!” tiin thinlung pacang le hngetkhoh takin amah le amah tha a pe aw.

A tumram Malaysia cu a von thleng taktak. Țong aan-cin lo har le boruak ziangkim a linglet țheh thlang fawn. Har a ti zet. Asinan rualpi țha a tong leh sal. A uu vek rori ih a zohmi le nau vek rori ih a duhdawttu “Rai rah” timi pa thawn hmunkhat ah ei tlang in tlang it tlangin caan an hmang. Kumkhat leng a um hnu ah a duat boihte hnenah phone a von ko. Asinan Yangon ah tlawng a kai ti thu an rak sim. Kumhnih a um hnu ah a hlathlai salih, “Yangon ih mi lian pa, Țaih inn le Mawtaw thawn um pa thawn kan dung zarh kha kutsihnak an nei,”….. Pa Hum cu a phone khalparh thluh ko lei tangah a tla ruairo. A khaw ruahnak khal an hlo thluh. A sunmang khal a cem thluh. ” Lungduh co lo valtiih kawhmi maw ka si thlang ding??” tiin an sim fala zuun tuar cu a takin a tep ve fawn. Zing le zaan in zianghman ruahnak a neilo. “Ruahsannak nei loih nun cu Nung cingih thi an ti si. Keimah hi nungcing ih thi ka si ko!” tihi a kaa cun a phun burhbo ringrung.

A rual Rairah cun theitawk te in a hnem. Ziangkim a ngaihsak. Thazaang thar la dingin ruahnak phunkim a pe. Cutin Rairah ih ruahnak pek vekin UN a lut ve ta. UN card a ngah zawng ih a thu theihmi cu, Kawlram ih a tanta mi a rualpi pawl cu phunhra an hong kai salih an zaten an ong thluh. A tu ahcun phunsang tlawngah an kai țhepțhep zo. Culai lakah a hna țuanmi a zoh ih Nitin Trolargy mawngin a khawsa a ruah tikah,
“Aw… Inn thawn a hlatnak hmunah,
Țhian le rual țha khal a kaang maw!
Tumruhnak thawn hram ka țoh hmang ka rak ti,
Phu lo leng ka ton ruangih a hlomi sunmang,
Mitțhep karih a ziamral mi ruahsannak,
Ka khukruun cu phunsang tlawngah her hai maw!
Kei ka phut tawkte Trolargy!
A cuih ka dihmun le ka sinak!
Rethei fa kahrang țahnak lawng maw an si” tiin…..

By/Mai Mai Daidim

Note:: August 15, 2012 ih nganmi cafang rem salmi a si.
Thuanthu neitu => (Albert Chin)

Comments

comments

Comments

%d bloggers like this: