Refugee pawlin sumpai ih zuarnak an tong

Tipi ah mi 16 thi:

Kan dung tlawngkai nithum ah Bangladesh khawpi Dhaka saklam 100 km ih tipi thuanthum ah mi (16) cu an tonak long a let ruangah an thi ih, an ruak cu hawl rero lai a si. Hih long hi mi (passenger) a phur tam tuk (over-load) ruangah a pil a si.

Gas platform a pil

Venezuela ram ih tipi kap Gas laknak hmun ih platform tumpi an tuah cu Kan dung tlawngkai nili ni ah tipi (sea) ah a pil ih hnatuantu mi (95) cu an runsuak thei sal. President Hugo Chavez cun “Aban Pearl gas platform a pil na’n zohman an thi lo’ tiah twitter account ah a ngan. Aban Pearl Gas laknak hi a hlunzet ih, 2007 ah tuah tha dingin acozah cun sumpai tampi budget a tuah na’n tuah tha sal loin tuni tiang an ret ringring ruangah mi tampi cun president Hugo cu sumpai eiru tiah an puhmawh a si.

FBI in misual hawlnak an tawpter

Kan dung zarh ih New York khawpi sung Times Square siatsuah tumnak thawn pehpar in FBI in ram sungih misual cangvaihnak le bomb phuah dingih timtuahnak dang a um le um lo thu an hawlnak cu kan dung tlawngkai nili ni ah an tawpter thlang. FBI thuphuantu cun Times Square siatsuah tumnak cu an hlawhsam ih, hmun dang ahcun hitivek ih cangvaih tumnak a um thu kan thei hrih lo tiah a ti.

Angki sen hotu in hliamhma a tuar:

Thailand ram acozah dodalnak langter ih lamzawhtu lakih hotu pakhat Khattiya Sawasdipol (zuk)cu kan dung tlawngkai nili ni ah Bangkok khawpi sungih lamzawhnak ah ‘sniper’ (hlaral ih um kahnak meithal) in an kap ngah. Sawasdipol hi Thailand acozah ralkap Major General a si ih, kan dung thla ah lamzawh pawl tampi lakih ‘granade bomb’ puahnak le mi 100 in hliamhma an tuarnak thu thawnn pehpar in acozah in a hnatuannak ihsin a colhter (suspended) mi a si. Asinan, amah rori cu angki sen hrutu (Thaksin tantu) lakih hotu ah a cang ih, acozah cu nasazet in a dodal. Tlawngkai nili zan ah lamzawh pawl le security pawl karlakah buainak a um ih, mi 20,000 hrawngin security pawl an nawr rero lai ah Sawasdipol hi hlaral ihsin an run kap ngah a si. A kiangkap ih mit rori ih a hmutu pawl cun midang (2) khalin hliamhma an tuar tiah AFP thuthang cun a ngan. Angki sen hrutu pawl cun daihnak tuah an tum lai ah Thailand prime minister Abhisit cun rampi hril awknak cu hmai November thla ih tuah ding a ti ruangah mipi cun lamzawhnak an colhsan thei ngaingai lo a si.

Russia ralkap in mi 3 an kap that:

Kan dung tlawngkai nithum ah Russia ralkap pawl cun Moscow khawpi ih bomb puahter tumtu misual (3) an kap that tiah Federal Security Service hotu Alexander Bortnikov cun a sim. Hih mi (3) an thahmi pawl hi Moscow khawpi sungih hmun pakhatkhat siatsuah tumnak le bomb thawn milai tampi thihnak tuah tumtu ti’h an puhmawhmi an si ih, an hnatuanpi pawl khal hawlsuah an tum thu Alexander cun a sim.

Australia nunau in leitlun helsuak ding:

May 15, 2010 (zarhte ni) cu long fate (solo-yatch) thawn tipithuanthum ihsin leilung helsuaktu lakih nauhakbik Jessica Watson cu ‘mi raltha pawl upatnak thawn’ Sydney tipi kap ah mi thawng tampi cun hmuahnak programme hman an tum. Jessica Watson hi Buderim khua, Brisbane saklam, Queensland state ih um a si ih, thla (7) lai amah lawngin tipithuanthum ih a um hnu ah May 15, 2010 ah an ram ra thleng sal dingih beisei a si. (Hih thuthang kan nganlai ahcun an ram a thleng hrih lo).

Jessica cun 2009 October ni 18 ah an ram tipithuanthum ihsin thokin pacific tipithuanthum ah a feh ih, cuihsin Artic tipithuanthum pal tlangin North America le South Americaa  hel vivo ih, Indian tipithuanthum ihsin an ram lam ah a ra kir sal. Amah lawng a si ih, solo- lawng thawn tipithuanthum ihsin leitlun helsuaktu lakih nauhakbik a si thei na’n cuih zuam awknak tawlreltu pawl ‘World Speed Sailing Record Council’ timi cu an um nawn lo ruangah ‘1999’ ih rak helsuaktu Jesse Martin kum 18 (Australia) ih record tuahmi cu a long sak thei cuang lo ding tiah thuthang cun an ngan. Jessice Watson ih nu le pa khal mi tampi in ‘kum 16 nunau’ hibangtuk ih an thlahnak cu an sawisel. Mi dang khalin Jessica ih lamzin fehnak pawl cu leitlun helsuaktu ‘record’ lakih ret tlak lo tiah an sawisel. Asinan amah duhdawttu pawl cun ‘record’ tuahtu an um lo khalah ‘a zuamnak le a ralthatnak cu’ hminsintlak tiah an ti. – AFP

Refugee pawlin sumpai ih zuarnak an tong:

Refugee pawl bomnak tuahsak tu South Korea ih Durihana Association hotu Rev. Chun Ki-won (kum 53) cun North Korea ihsin Tuluk ram ih tlan (refugee) pawl cu an umnak kip ah ‘Lo’ hnatuan dingin mi pakhat US$ 1,500 hrawngin zuar an si tiah a ti. Pastor Chun Ki-won cun North Korea le South Korea ramri cu ralkap pawlin an kil ringring nan nunau pawl cu feh sukso an sian ringring ruangah North Korea ih mi harsa pawl cu ‘Agent’ pawlin an hruai suak in, hnatuantu nunau samnak hmun, Tuluk ram leiletnak ram car ah zuar an si tiah a ti bet. Nunau hrekkhat cu Lo hna an tuanter ih hlei-ah Lo neitu pawlin nupi vekin an rak cohlang ih, an pasal pawlin an duh nawn lo hnu ah midang hnenah an zuar sawng sal. Cutin, nunau pakhat cu vei (8) tiang zuar an si’ tiah Pastor Chun cun a sim.

North Korea nunau pawl cun Tuluk pacang lakih fa an neih khalah Tuluk acozah cun ziang a rak siar lo ih, a nu cu Korea rammi a sinak an hmuhsuah tikah harsatnak an tong. Cun, anu cu amai’ ram ih a kir sal ahcun Tuluk acozah cun ‘nu nei lo’ nauhak cu ID card a pe thei lo. Korea nunau pawl khal anmai’ ram ah an tlung ngam nawn fawn lo. Cucu leitlun ih milai hrang phurrit tumbik a si a ti. 2009 April thla ih Washington Press Conference ah North Korea ihsin nunau (hlawhhlang ding) tampi cu Tuluk ram ah ‘Agent’ pawlin an phur lut ih, cu pawl cun pasal dangdang hnenih zuarnak an tuar ti a si. – AFP

Comments

comments

Comments

%d bloggers like this: