Refugee Pawl hrangih Theihtha tete

REFUGEE PAWL HRANGIH THEIHTHA TETE

1.A hmaisa bikih na pekmi na phone number na hmang thei nawnlo asilole misualin an lo lawnsak tivek asile a rang thei bikin UNHCR office ah na sim a tul.

2.UNHCR lam ih tuanvo neitu pawl khal kanmah vek, minung men an siih ruangah a tha thei bikih an tuah le tuan rero hmanah thil tlamtlinglo tete a rak um ve theu. Curuangah an lo pehtlaihlo nak a rei tuk asi ahcun nangmah rori kha va fehin thuhla va sutaw. Cumi hlanah thu na suh duhmi kha Laica in ngan in na keng ding. A sung thuk lamih an lo luhter sian ngaingai lo asi hmanah na ca lawng tal kha officer hnenah na tan ta thei ding.

3.Interview na tuah tikah officer ih thu a lo suhmi lawng kha thate le felfai te in leh thei na zuam pei . A tullomi, nangmai duhmi kha rel rero tum aw hlah.

4.UNHCR ih na va feh tikah kan tawnglettu pawl khi, kanmah Laimi an si pam si tivek menin mi hmuh theih rori ah va biak rero a tha lo. A tikcu le a hmun ah lawng biak le kawm ding an si. An din hmun theihthiampit a tha.

5.UNHCR ih lo pekmi cahlap(document) kha plastic in thaten fawn hlenhli aw. Tidai/ruah ih siar ter timi hi thil tha lo a si. Officer thin hngiar na ti teu men.

6.Appointment ni ih na feh tikah UNHCR cahlap an lo pekmi original kha a zaten na keng tengteng pei . Nupa nan sile pahnih nan nei dingih a pahnihin nan ken a tul. Card na nei asi khalle keng tengteng aw.

7.Officer in interview a lo tuah ni le canah thuhla na fenglo mi siseh, na suh duhmi pohpoh kha felfaiten na sut thei. Tih ding ziang hman a um lo.

8.Officer hmai ih na to tikah mipa na siih lukhum na khum asile phelh awla, a mai mithmai rori kha zoh kerker thei tum aw.

9.Officer hmuahhmuah hi an sual tivekin lungthin pu aw hlah. An zate deuh thaw in nangmah lo bawm a duh zettu an si ti khal na hngilh lo pei .

10.UN(Refugee) ngah a theih lo tin thanau hrimhrim aw hlah. Tulai fangah hmun khat hnu hmunkhatah fehin mobile register tuah rero asiih tuah vivo lai ding a si.

Laimi Vrs Israel

Cap Burubng

Laimi le Israel pawl hin bang awnak tampi kan nei lai. Israel miphun sungah phunhnam 12 an um vekin Falam peng sungah hin phun hnam tampi kan um ih, cuih phunhnam pawl cun mai’ tlangkulh le khua, peng le ttong vek in pawlkomnak kan nei. Kan umnak tlang le khua vekin kan ttong le kan ziaza khal a danglam. Asinan, miphun 12 cun Israel miphun sungah an um vekin an miphun sinak ‘ Israel ’ cun a khaikhawm thluh. Cucu Falam pengih miphun (ttong dangdang neitu pawl) kan pumkhat awk dan cu a si ve.

Himi thu ah hin ruah ding le zir ding tampi a um. Bible sungah khal kan hmu. Miphun 12 sung ihsin pakhat le pakhat rem awk lonak tampi a um ih, cutivek ih an do awk ruangah ziang a cang ti khal kan zoh tlang pei . A hmaisabik ah Judah phunhnam pawl cu Siangpahrang a ra suahnak ding ih thluasuah cotu an si. Judah cu midang hnakin a covo a sang deuh tla kan ti thei. Khatlam ahcun ‘Uktu phunhnam’ deuh a si. Falam peng sungah tla bawi phunhnam deuh le ttong neitu deuh vekih kan ruahmi phunhnam kan um ve. Asinan , Judah phunhnam pakhat lawng in raal a hneh ti thu kan thei lo vekin, Falam peng sungih ‘bawi fa le ttong neitu deuh phunhnam’ pawl cun anmah lawng in Falam miphun hrang nehnak tlamtling an tuah thei ve cuang lo ti kan fiang. A thupibik sawn cu, Israel miphun 12 in lungrual zetih raal an neh vekin Falam peng sungih ttong dangdang hmangtu (khaw dangdangih umtu) pawl kan lungrualnak cu kan hrang nehnak ding a si sawn.

Israel rampi cu siangpahrang Solomon a thih vete’n saklam thlanglam tiah an rak tthen aw. Saklam cu miphun 10 an si ih, an hotupa ‘Jeruboam’ cu Ephraim miphun a si ruangah an ram cu ‘Ephraim’ ti khal in an ko. Thlanglam cu miphun 2 lawng Judah le Benjamin an si ih, Judah miphun an tam ruangah le an siangpahrang ‘Rehoboam’ cu Solomon ih fapa (Judah) a si ruangah an ram cu ‘Judah’ tin an ko. Saklam le thlanglam an tthen aw vete’n an kiangkapih miphun dang pawl cun an zuamtai deuhdeuh ih, a rei hlan ah Assyria acozah cun Israel ram cu a neh ruangah an zate’n ‘Sal’ vekin a hruai thluh hai. Thlanglam Judah pawl khal Babylon cun a neh ruangah an zate’n Babylon sal an si. Cucu miphun pumkhat aw thei lo pawlih covo diktak cu a si. Kanni laimi (Falam) pawl khal hi, kan ttong le kan suahnak tlang a danglam vekin kan duh dan bang aw thei lo sehla, kan hmailam caan cu a thim tuk lo ding maw? Zahau, Zaniat, Tlaisun, Sim, Ngawn, Lumbang etc.. in tthen aw thluh sehla, kum ziangzat kan feh thei ding. Ramdang ah kan feh vivo lai dingih,… Tlaisun tlangval siseh Zahau tlangval pakhat in siseh, thil ttha lo tuah pang sehla, miphun dang pawl cun,… “laisun pa-in/ Zahau pa-in”.. cuvek khavek a tuah” ti hnakin ‘Falam pa’ in cutin a tuah in ti tengteng ding. Hih hi kan hrangah thlalang fiangbik cu a si ding.

Israel pawl khal an umnak khua a danglam vekin an ttong a danglam ve ti Bible in insim. Culawng si loin, Bejamin miphun pawl cu nasa zet in miphun dang 11 in an that ciamco ti khal kan thei fiang. Cuvek thuanthu a um theinak cu ‘Nunau mipat sualnak le zuri sabah ih an um ruangah a si’ ti a fiang. Kawlpa pakhat cun hitin in sim: Chin miphun sungah Halkha, Falam le Tedim hi a larbikih, cathiam khal an tam. Asinan, Halkha lam cunZu an duh,Falam lam cun nunau an duh ih, Tedim lam cun ei le in (sa) an duh’ tiah in ti. Asinan, tulai san ahcun ‘Halkha, Falam le Tedim cun Zu le Sa le Fala an duh tuk ruangah an tthangso ngaingai thei lo ding’ tiah a ti bet. Hih thu hin diknak tampi a nei. Kan laimi zu in tu pawl ruangah Malaysia ah Kawl pawl cun zu dawr an tuah ih,.. an lian deuhdeuh. Nunau mipatnak lam ah teh ziang kan bang? Malaysia ih Laimi AIDS neitu cazin cu rel ngam ding khal a si lo. Vansiat ruangah maw, huatsuak ruangah?

A dang pakhat kan zoh sal dingih ka duh cu ‘Calai’ a si. Judah pawl cunHebrew ttong an hmang. Asinan, Babylon , Assyria , Persia , Greek le Rome acozah hnuaiah kum tampi an um ruangah Bawi Jesuh sanlai le Krihfa hmaisabik umkhawmnak Kawhhran ah tla ‘Hebrew ttong’ thiam nawn lo siseh, miphun dang ttong uar sawn tampi an um. Greek sanlai ih Judah mifim pawl khal in Greek ttong an hmang tuk ruangah Bible rori hmain ‘Greek-Judah’ tin a ngan. Cupawl cun kawhhran tawlrel dan pawl an sawisel tuk ruangah Jerusalem kawhhran hmaisabik khalin harstnak tampi an tawng. Laimi lakah Lai ttong hnakih kawl ttong uar deuh kan tam vivo a bang. Mi hrekkhat tla cu Laimi sungkua si si, kawl ttong lawnglawngih thunuam sim rero an um. Cupawl cun ‘mizo ttong an dodal zet na’n,… kawl ttong cu nasa zetin an uar ih, kawl nun dan khal an cawng rero. Cuvek cu ‘Kawl-Laimi’ tin ko sehla a buaithlak zet ding. Leitlun raalpi veihnihnak a thawk hlan ih Israel pawl tuarmi kha kan cing ringring a ttha. Annih khal kha an umnak Europe ram miphun tampi ttong le nun dan an rak cawngih, an sihnak ngaingai khal thei nawn lo vekin kum tampi an um. Poland , German, Austria , France le England ah Israel tampi an um ih,… England ramih Israel pawl lawng in Hitler ih kut an tuar lo a si kha. Ziangruangahtile’ n, an khawpi le an ram a petu Pathian in cuih an ramih kirsal ding in a duh ruangah a si.

Laimi pawl teh ziang kan bang. USA , Australia , Europe ram le hmun dangdang ah kan feh. Kan ramih kan um rero lai hman ah miphun dang (abikin ‘Kawl pawl’) um dan le ttong kan uar sawn a si ahcun, cuih tipi ral ramdang kan thlen ahcun ziangtluk in lai nun le lai ttong kan nautat lai ding? Daniel ih rualpi pathum vekih miphun le Pathian hrang ralttha, lai pacng kan ttul ngaingai a si hi. Miphun dang nun dan le ttong kan uar tuk ahcun Pathian in kan umnak ding ih in peekmi Lairam ih kan kirsal theinak ding ah,…Hitler vekih micak le zaangfahnak nei lo uktu in indawi sal ding tiah ruahnak a um thei. Ttong dangdang thiam cu thil ttha zet a si. Asinan, Lai ttong hngilh ta hrat in Kawl ttong sawn kan thiam a si ahcun,.. kawlram ih um ringring ding kan si sawn. Miang ttong cu zumtu pawlih ttong a si ruangah lai ttong hnakin kan thiam a si ahcun a pawinak a tam tuk lo na’n, a pawi tuk thotho.

Kan miphun le kan Pathian hrangah Laimi sinak lawng duh tawk loin, Lai ttong, Lai nun, Lairam’ khal duhdawt uh si.

General Knowledges

THEIHKAUHNAK LE RUAH DING TAM

(Compiled by Biak Chawn)

1. Leitlunih fala mawibik hrilnak Miss World 2008 cu December 13 ah South Africa khawpi Johannesburg ah tuah ding a si. Hih fala mawi hrilnak ding hi Ukraine ram khawpi Kiev ih tuah ding a sina’n kan Georgia le Russia ram pahnih buainak ruangah South Africa ram ah tthawn a si. Miss World hrilnak ah hin 2004 tiang ram 107 an tel ih, 2005 ihsin ram 109 an tel. Leitlun ah fala mawi hrilnak a phunphun a um ih, Miss World hrilnak hi an tuah hmaisabik a si. Cucu kum 1951 ihsin an thawk. Miss Universe (Miss World hrilnakih a tel ban lo ciahciah pawl) hrilnak cu kum 1952 ihsin an thawk ve. Miss International hrilnak cu kum 1960 ihsin an thawkih, Miss Earth hrilnak cu 2001 ihsin an thawk. Miss Tourism Queen International hrilnak cu 2004 ihsin an thawkih, hih pawl hi leitlun ih fala mawi hrilnakih picangbik cu an si. Miss World le Miss Universe sinak hi kum khat sungih ngah veve theitu ram 4 an um ih, 1953 ah France ram fala Christine Martel (MU) le Denise Perrier (MW), 1972 ah Australia ram fala Kerry Anne Wells (MU) le Belinda Green (MW), 1981 ah Venezuela ram fala Irene Saez (MU) le Pilin Leon (MW), 1994 ah India fala Sushmita Sen (MU) le Aishwarya Rai (MW), 2000 ah India fala thotho Lara Dutta (MU) le Priyanka Chopra (MW) pawl an si. MU=Miss Universe; MW=Miss World. -(http://beautyquee ngallery. blogspot. com)

2. Leitlun ah nunau lawng hi angki hnuailam ( abmfv D baw-li) hrutu an si lo. Mipa hrekkhat cu nunau thinlung an nei ih, cuvek pawl cun mipa dang thotho darling ding in an hawl. Asinan, nunau thinlung neih ruangah si loin mipa huatsuak le mawi duh tuk pawl cun angki hnuailam hruk an duh. Japan ram cun mipa hruk ding abmfvD an tuahsuakih zarh 2 sungah 300 an khawngih pakhat ah Yen 2,800 (RM 109) man a si. ( Japan Today Novvember)

3. United States Immigration and Customs Enforcement (ICE) cun kum 1943 ih German uktu Hitler ih thilri pakhat (Cabu karih retmi le casiar rero lai hminsinnak dingih an tuah- bookmark) an firsakmi cu Washington khawpi ih Seattle ah an kai ngah. Cuih boolmark cu sui a si ih, amah Hitler ih zuk a um. Hih hi Hitler ih darling Eva Braun in Hitler hnen ih a peekmi laksawng a si ih, Spain ram khawpi Madrid ah 2002 ah an rak zuarmi a si. Hitler ih bookmark ih sui carat 18 ih tuahmi a si ih, a paa (thin) zet ruangah amah Hitler ih zuk tiang an umter thei ruangah mithiam zet pawlih tuah a si ding tiah zumnak a um. Malaysia sui tuahnak ah hin carat 22 tiang lawng an tuah. (ICE, Washington news)

4. South Africa ramih khawte pakhat Tzaneen ahcun mitthi vuinak thuhla thawn pehpar aw in daan maksak zet an nei. Mi zokhal in an sungkhat mitthi cu zinglam nazi 9 hnulam ah thlanmual ih an vui (phum) ahcun R 100 (RM 35) an kuan ding. Hih hi mitthi vuinak ih a fehtu pawl hrangah hnattuannak caan an neih theinak ding ah a si ih, tangka kuanmi cu thlan laihnak thilri (digging tools) leinak ding ah a si. Mitthi vuinak ah mipa jacket hru lotu le nunau lu le liang khuh lotu cu an tel ve thei lo. (Graphic news)

5. Leitlun milai 33,000,000 hrawng cun AIDS natnak thihpi tengteng ding an nei ih, kum khat sungah nauhak 500,000 cu AIDS natnak nei cing in an suakih 2007 ah nauhak 290,000 cu AIDS natnak ruangah an thi. Africa ah AIDS natnak neitu an tambik ih, Tuluk le India ram cun natnak thihpi ding cazin milai 700,000 hrawng a nei ih, Iran cun 100,000 hrawng a nei ve. South Africa ram cu a tuar nasabik tu a si ih, natnak neitu 5,500,000 an um ih, nikhat ah 1000 hrawng cun TB (Tuberculosis Bacteria) natnak in an thi. Curuangah South Africa acozah cun kum 2011 ihsin AIDS natnak neitu hmuahhmuah lakih 80% cu sii ttha ttha thawn zohkil a tum ih, a ram sungih natnak 50% cu hlohter dan dinig a hawl. Asinan leitlun ih AIDS natnak zohkiltu hnen ihsin bawmhnak tangka US$ 92,000,000 le TB khamnak ding hrang US$ 68,000,000 a dilmi cu a ngah lo. (WHO)

World News

LEITLUN THUTHANG

Shah Rukh Khan in ‘Datuk’ ngah: India ram zuknung Bollywood ih hminthang zet Shahrukh Khan cu Malaysia thlanglam Malacca state acozah cun ‘Datuk (Knight)’ sinak cu zarhte ni (December 6) ah a peek. Malacca acozah in hivekih ramdangmi ‘Datuk’ sinak a pek ding thu thawn pehpar aw in Malaysia rammi tampi cun an sawisel ih, thuthangca le media tiangin dodalnak khal an suah. Asinan, Malacca acozah cun Khan ih zuknung tuah 4 rori ruangah Malacca cu leitlun ah a hminthang deuhdeuh ih ‘Datuk’ sinak hi peek a si ding tiah an sim. Khan cun lungawi zet in, “Ka ttong vek khal ttong dah lotu in hivek ih upatnak in peek  ruangah,.. ka hngakhlap zet” tiah a ti. Khan hi kan dung thla ah Malacca acozah in hih ‘Datuk’ sinak hi peek an tum zo na’n a hnattuan a buai tuk ruangah a ra man lo. – AP

Honda in F1 cawlhsan ding: Japan ramih mawttaw tuah tambik Honda Company cun hmai kum 2009 sungah F1 mawttaw tlan zuam awknak ah tel a tum lo tiah a phuang. Honda cun tulai leitlun economy siatbal reronak hi theithiam in rei lote sung a cawl ding tiah CEO (Chief Engineering Officer) cun a sim. F1 motor sporting hotubik Max Mosley cun tuih kum sungah F1 mawttaw tlan zuam awknak ah US$ 120,000,000 hman a si ih, kum dang hnak in a mal’ a ti. Honda company hin leitlun ah kum khat sungah mawttaw a malbik 140,000 an zuar suakih, tuilai economy harnak ruangah hnattuantu 18% rori a cawlhter. –Reuters/AP

Singapore ramri kiltu in nunau ihpi: Singapore le Malaysia ramri ih hnattuantu Singapore Immigration hotubik Chung Cheong Weng cun 2006 Dececmber ihsin 2007 April karah Tuluk ram fala Li Yanxiu cu vei nga rori a ihpi ruangah Singapore acozah cun thutthennak ah a thuhla an tawlrel rero lai. Chung Cheong Weng (Kum 58) hin hih tuluk fala a ihpi ttheu ruangah a hrangah Singapore luh theinak le um theinak ding cahnah pawl cu awlsam zet in a rak tuahsak ih, acozah in hih thuhla an theih lonak ding ah Li Yanxiu thawn sms an kuat awkmi pawl khal hlawn thluh ding in a fial. Chung ih thubuai hi December 29 ah rel sal ding a si ih, amah an puhmawhnak pawl hi a dik ahcun kum 5 tiang thawng thlak thei a si ih, Singapore dollar 100,000 khal a kuan bet thei. – CAN/vm

India ramih hotel minutes 60 sungah runsuak: Kan dung zarh tlawngkai nithum ih India ram thlanglam Mumbai (Bombay) khawpi sung five-stars hotel pahnih hrenbettu tapung pawl cu India commando (Black Cats)pawl in minutes 60 sungah an that thluh ih, acozah kut hnuai ah a um sal. Hih tapung pawl hi Pakistan ihsin a rami an si tiah India acozah cun an phuang ih, kan dung September thla ah Pakistan khawpi Islamabad ih Marriott hotel siatsuahtu Laskar-e-Taiba pawl an si tiah tapung pakhat an kaih ngahmi cun a sim. Marriott hotel ih bomb puak ruangah milai 55 an thi ih, tuih ttumih Mumbai khawpi sung Taj Mahal hotel le Trident Oberoi hotel ah mi 195 an thi; 300 cun hliam nasa zet an tuar. India raalkap 1, hotel kiltu security 15 le foreigner (ramdangmi) 30 an thi ih, hotel hrenbettu tapung 1 cu a nung rori in an kai, adang 11 cu raalkap thawn an do awknak ah an thi. India commando 1,000 hrawng cun nazi 60 sung ah hnattuan an ttheh. Hih hotel pahnih siatsuahnak hi India ram hrang ahcun 9/11 a si. Laskar-e-Taiba pawl hin 2001 ah India parliament House (acozah thurelkhawmnak inn) hmai ah bomb an puahter ruangah India le Pakistan ram karah buainak tumpi a suak dah. Tuih ttumih buainak ruangah Pakistan cun India thawn buainak a ttih ruangah ramri ah raalkap 100,000 a kuat bet ih, India acozah in harsatnak a tuarmi parah Pakistan cu misual thawn pehtlaih awknak an neih lo thu uar zet in a sim. Hotel ih ramdangmi mitthi lakah USA mi an tambik ih, Singapore nunau Lo Hwei Yen (K 28) tla a tel. Hih hi Singapore in tapung pawl cangvaihnak ruangih a rammi thihnak a tuar veikhatnak ding a si. – Reuters/AFP

Malaysia ah Yoga buainak: Taksa le thinlung lam exercise tuahnak ding le harhdamnak lam hrangih mi tampi in an zir rero mi Yoga cun tulai Malaysia mipi thinlung a luahkhat deuhdeuh ruangah Muslim biaknak lamih thuneitu pawl cun ‘Kham (prohibited)’ an tum. Asinan, hih Yoga hin milai thinlung le taksa parah zianghman siatsuah theimi a ni loih, taksa harhdamnak thil a si ruangah mi tampi in dodalnak cu an sawisel ve. Dr. Mahathir cun mipi ruahnak cu hitin a forh hai: Yoga na thlun ruangah muslim na sip hah cuang lo vekih, muslim ihsin na suah phah cuang lo. Kanmah tei’ kan zoh awk theinak hi a thupibik cu a si ih, Yoga ruangah mai’ biaknak kan thleng thei ding ka zum lo’ tiah a ti. Malaysia rammi vansangih khualtlawng hmaisabik (first Malaysian Space hero) Dr.Sheikh Muszaphar Shukor cu amai thilhmuh le tawnmi (experience) pawl midang zirh ih sim ding in nazi pakhat sungah RM 8,000 a lak ih, cuvek hnattuan in tlawng a phunphun 300 le bulpak 150 hnen rori ah caan a rak hmang zo tiah puhmawhnak a um. Hivek puhmawhnak hi Dr.Sheikh cun nasa zet in a el ih, a khualtlawnnak thuhla le lehnu lamih harnak a tuarmi pawl cu cauk pakhat ih tuah a tumih, cuih cauk cu hmai kum ah suah thei a tum thu tla a sim. – The Star (Nov. 30 ihsin updated)

Nigeria ah Khrihfa le muslim buainak: Tulai Nigeria ram uktu ding hril awknak ah muslim le khrihfa pawl karah dodal awknak nasa zet a suak ih, mi 60 hrawng an thi zo. Muslim pawl hin leitlun hmunkip ah an biaknak duh tuk ruangah lawng si loin midang biaknak dodal duh tuk ruangah tapung vekih cangvaih an uar zet ih, leitlun ram tampi cun Nigeria ram cu tapung zuat ngah pang lo ding in ralrinnak thu an sim. – Reuters

Thailand ah ramdangmi an taang: Thailand ram nainganzi buainak cu a zual sinsin. Kan dung zarh ihsin Thai mipi cun vanzam ttumnak hmun tum deuhdeuh (international airport) 3 rori (Chiang Mai, Utapao, Phuket) an kham ih, ram dangdang cun Thailand ramih an mi le sa pawl phuarsuak ding in vanzam an kuat. Asinan , Thailand ram sungah ram dangmi 300,000 hrawng cu zam suak thei loin an taang. Airport hi tlawngkai nithum ah an ong thei sal.Prime minister Somchai Wongsawat cun a sinak a tan ih, Chavarat Charnvirakul cu acting prime minister a si. Thailand acozah thutthennak cun an ram buainak cu ram uktu ding hrilsalnak tuah lawng in a felfai ding tiah thu a rem sal ih, December 8 le 9 hrawng ah prime minister thar khal neih thei an beisei. –AFP

Barbara Bush sizung ihsin suak: US president George W.Bush ih nu (mother) Barbara Bush cu kan dung tlawngkai nithum ah Houston Hospital ihsin a suak sal. Barbara Bush (K 83) hi a pum a nat ruangah kan ding November 25 ah sizung an ret ih laparoscopic surgery (lenglam ihsin at loih sunglamih thanmi pum ahnak cet) an tuahsak hnu ah a suak sal. – Reuters

Saddam Hussain ih unaupa thah ding a si: Iraq ram special thutthennak inn cun kan dung tlawngkai nihnih ah Sadam Hussain ih unaupa Ali Hassan Al-Majid cu thah lohli ding a si tiah thu a tthen sak. Ali hi ‘Chemical Ali’ ti’n leitlun ah a lar ih, 1980 ah Kurd miphun parih a cangvaih dan ihsin ‘Wanted’ a si zo. 1991 ah Shi’te muslim pawl parih a cangvaih dan ruangah ‘Chemical Ali’ ti a si. -AP

Tuih zarh hrang thufim

Mi tampi cun Pathian duhdawtnak hi Eden hmuan ihsin an simthawk, asinan kei ka hrang ahcun Bethlehem hmuan ihsin a fiangbik a si. –Billy Graham

A neitu LCF, Malaysia

Editor Biak Chawn

Joint Editor Salai Kawl Lian

Zemdarhtu(Circulati on managers)

SalaiLiante

Obed Cungte

Lal Ruat Lian

Khumte

Calai kawmiti

Salai Kawl Lian

Mang Hlei Sang

Biak Chawn

Obed Cungte

Advisor Upa Za Dun

Patron Rev. Run CungMang

Contact

Hruaitu

Bangunan Tan Kim Onm

No. 46-48 2nd Floor

Jalan Sungai Besi

57100 Kuala Lumpur

E-mail : hruaitu@yahoo. com

SMS : 016 3440 672 ( Biak )

016-302 1254 (Kawl)

Pastor 017 – 3880 848

(Visited 89 times, 1 visits today)

Comments

comments

Comments

%d bloggers like this: