Rammi Sinak ih Lunghmuinak

-Papu Luai

1. Rammi sinak ih lunghmuinak

America rammi sinak citizen card neih cu America mi le sa diktak sinak a ken ruangah cui ramneitu cazin ah khumluh an si ih, civil rights ziangkim an co. Cucun lunghmuinak ngaingai a thlenter. Refugee dinhmun ih va vailut hmuahhmuah hrangih thiltha co sunglawibik a si. Asile kan Myanmar ram ah teh cuvek lunghmuinak a um maw? Um hrih lo. Ziangahtile Myanmar rammi sinak ihsin covo tha ngah ding a um kupkap lo ruangah a si. Milai pakhat in poimawhbik ih a ruahmi pumcawmawknak zangkhai le hngetkhoh a um lo ruangah a si.

Kan ramri India, Mizoram State ih pumcawmnak va hawl kan Chinmi dinhmun zoh sehla a fiang zet ding. Rawlkhop kan ngahnak hmun, sumtuah kan hlawkpinak hmun ahcun anmai mi le sa bangtuk lole anmai mi le sa si tata ding ih cangvaih poi tinak a kiam vivo. Harsa zual hrangah, ration card ngahnak ding a si ahcun Mizoram khuikhua si maw ih suak le seilian bangtuk ih rel aw in; rammi sinak la in, cui ram covo tha cu co ve dingin kan zuam. Kan ngah. Mi tamtak hrangah Mizorammi sinak neih hi lunghmuinak ngaingai a tlingban ve.

Curuangah kan Myanmar ram lole Chin State mi le sa diktak sinak ih lunghmuinak cu zangkhai le hngetkhoh zet ih pumcawmnak kan neih hnu lawngah a si lai ding. Economics thansonak in milai a kokhawm ih, hmunkhat ah mipum tam zet an khawsa thei. “Ziangahtile nan sumsaw umnak ah nan thinlung khal a um ve.”(Matt.6:21)

2. Ram hrang ih Rinumnak

Politics buantual ih luhtumtu cun hihi a theihfiang a tul…Politics hi election ah nehnak co ih lalhrawt vial a si lo. State cangkang si dingin hmalaknak hlawhtling tuansuah dan konghmang felzet khawkhannak a nei tengteng ding a si. A uknak ram sungih misenpi pawl in nuam an ti ih, hmunhnget ih um lanta an duh lawnglawng ah rammi sinak ih lunghmuinak a parsuak thei. Ram duhdawtnak khal cunahcun a um cih. Cui dinhmun lawngah ram hrangih rinumnak a hnget thei. Mai hmun le ram zuar hlo tahratin hmun dang ram dang ih vaih hlo duhnak thinlung a um lo nak hmun lawngah ram duhdawtnak a ttunghmun thei. Mizo sunlawinak cu Mizoram State thansonak ah a um (Chinmi pawl ih sunlawinak khal Chin State thansonak par ah a tthum aw.) Cui thansonak rawlbel khatter theitu acozah cun a rawlbel ringih partlantu hmuahhmuah parah huham a nei ih zinkong dangdang in a va hliahkhuh thei fawn.


(Chin Theological Association in 2017 kum ih a suahmi Journal “Khristian khawthlir” timi Journal bu sungih ka cahram ” Secular state le State religion” timi sung ih ta lakmi thuhlawmte a si.)

(Visited 74 times, 3 visits today)

Comments

comments

Comments

%d bloggers like this: