Ramkhelh Tongfang Hmeltheihnak

Ramkhelh Tongfang Hmeltheihnak

(Political Terms)

JC Kip Ling

Ramkhelh tongfangpawl hi olte vek bang siin thei vekih um ih theihliah ngaingai lo pang a um thei. Zirthlurh tongfang hrimhrim cun mah le sawhkhih hleice mi san le huapcin an nei fekfek ruangah thlamphai le nuainam luklak menih a tican rak leh mai ci an si lo. Christian zumnak le a thuhla thei dah bembem lo hin ‘Fapa Tlanhlo, Thlaici vawrhtu’ tivek tongfang a theih tikah a zumhmang le ngaidan menih rak let tahratin a tongfung le cahram ah rak telh kual ciamco bang sehla hnihsuakza ah a suak ding. Ramkhelh tongfang (Political term) lephei hi cu, a tongfang ih dungkhar le suahkehnak theihfiang a tul sinsin. A hminkawh theihnel vial men si loin ramkhelh thuhla khalih kan hna a van deuh beiseinak thawn tlin lo cingte’n, mi’ nganca lakhawmin, ka timtuah ve mi a si. Kimcang zetih kan sim man lo le kan rel thei lo hmanah sakhi culram fan talin kan hun fang zualzo hnik pei. F-20 Journal ah A, B, C, … tiin ka thok ruangah The Chin Voice ahcun A, Y, X, … tiah a kir zawngin ka ngan ding. Damrei thilthu ahcun kan theh man em kei cu! Thlatin ngan thei ka run zuam ding.

Zionism (Zion-phungthluk)

Jewish (Israel tiah a oltlong zawngih kan theih theu mi) miphunpawl in an pipu suahkehnak hmun le ram Palestine ah kirsalin Jew sakhuanak, daan le dun, nunphung le anka darhzaiter dingih hma an laknak thupom cu Zionism tiah an ko. A hmaisabik Leitlunhuap Zionist Congress cu 1897 kum Switzerland ram Basle khawpi ah an rak tuah. An pawlkom hmin cu Zionist Organization (ZO) tiah an phuah. A dintu le phuahlautu bik cu Theodor Herzl a si. 1960 kum ah World Zionist Organization (WZO) tiin a hmin an run thleng. “Jewish mipipawl hrang Palestine ah hmunram khuar ding, zapi daan hnuaiah kilhimnak tuah ding” timi au-hla thawn an sawhhngetaw. Zabi 20 thoktir hrawng ihsi khan Zionism hin Jew miphun lakah ram a la cak nasa. Culaifangah Jew dokalh cangvaihnak (Jew miphun huatnak) khal Europe rampawl ah a thok ve cih. (Israel thlahtu an pu Abraham hnenih Pathian ramtiam tiah an pomhnget. Jerusalem cu urhsun le sunsak takin an seherh ringring, khuarel rosiah tiih ruat na-na-na cu ta neihin an neih. Khatlam ah Palestine miphunpawl Jew miphun hua hleuhleu tu Hitler cu 1930 ah German ih a hung lal sapbai cun Jew miphun cimih dingin hma a la ciamco.

Palestine hmunram hi 1928-1948 karlak cu, Israel le Arab miphun cuhawkbuai ruangah, Rampi Komkhawm ( League of Nations) le a ro run cungtu Rampi Sihkhawm (United Nations) lu-baan pawlih uknak hnuaiah ret a rak si. Ralpi Veihnihnak laiih Nazi-pawlin Jew miphun mi ting sawmruk deuhthaw an thah hnu khacun Palestine hmunram ih Jew miphun pawl ra cer cu Nitlak rampawl khalin khoh tukin an dawn nawn lo. 1948 ah British ralkap cu Palestine an suahsan ih, cu veten Jew miphun duhdawttu ralkap sosangpawl cun Zionism pitlinter dingah Israel Rampi an din zo thu an phuang. 1960 kum ah World Zionist Organization Israel ram rung keuh ding rak nuai cimit duhtu Arab rampawl cun tan an rak la ve. Cui an buainak cu tuini tiangih leitlun hna virh zettu Nisuah-lai lam (Middle-east) thubuai ih suahkehnak ah a hung cang ta.

Yuppie

“Nonawn, Thansoh lam pan, Pumcawm thei” tinak a siih, a Mirang tong cun “Young, Upwardly mobile, Professional” asilole “Young Urban Professional” tiah an sim theu. Hrekkhat cun ‘Nonawn, tumtah sang, zirthiammi, nuntu khawsak dan sangih khawpi khawsa mi’ ti tla in an simfiang. Kum 20, 30 mi hrawng vanglai tak, miphun-u rual kawhnak a si bik. 1980 kum so hrawng ihsin hi tongfang hi a suak thok. American thuthangmipawl in an rak hmang hmaisabik. Yuppie pawl hin rampi thansohnak- ramkhel, sumtuah, serthiamnak lamah hmai an hruai a si tiah an rak hmu. Yuppie mibur an suah tam asile rampi thansoh lam a pan ti a si.

( A awsuahdan cu  [yuhp-ee] ti ding a si hmang.)

Xenophobia (Ramdang Tih Nat)

Ramdangmi, tluang le sing mi hrimhrim tih ih huat le dokalhnak tiang thinlung ih hnaikhuar natnak a si. Greek tongfang ‘Xeno’ (tluangmi lole ramdangmi) ti le ‘Phobos’ (tih) timi tongfang hnih komkhawmmi a si. “Ramdangmi hrimhrim parih hupphurhnak le mitkemnak thinlung hrambun thuk zet, asilole hmelthar tih le huatnak thinlung khuaram teng lo, ahleicein hnamdang mi parah” tiah Oxford English Dictionary le Webster’s Dictionary cun an simfiang. Ram le miphun duhdawtnak ihsi thinlung fehsual phunkhat a ti theih.

Xenophobia hi Chauvinism (France) le Jingoism(English) timi Phunduhluarphungthluk thawn an bangaw lo. An nai-aw zet vek nan, an hrambunnak cu a bangaw lo. Chauvinism khal, Jingoism khal ramdangmi hmuhtheilonak ahcun  Xenophobia thawn an lungrual zet. Sinan, Chauvinism le Jingoism cun mai’ miphun, mibur kha cungcuang le phun-u ce ih an ruahhnget ruangah ramdangmi an hmuhthei lo. Xenophobia cu thanaunak le mah le mah phun-nau ih retawk thupnak ah hram a bun. Ramdangmi an ra lut asile an hnatuan le hmakhua an ra cuhkalh ding tiih hupphurhnak ruangah hrekkhat cun ramdangmi tih nat hi an ngah theu.

(Visited 86 times, 1 visits today)

Comments

comments

2 Comments

  1. A tha tuk.Theihnak in ruahnak a thleng ter theu a si.

  2. hi .its a interesting blog.can i copy & past some of passage & pictures from this blog to my blog?forward massage to me ,please:zahratabbaty@gmail.com

Comments

%d bloggers like this: