Ramkhel Zilthli (4)

Minung maw Party?

Sianglianuk Kianghrol

12109131_975893202467964_7377526001282665754_n

Zuk: Depayin Buainak thlen ding ttum ih Pi Suu Kyi Hakha a feh ttum.

Tui ttum 2015 November 8 hrilawknak hrangih vote lemthlemnak (pawlsawmnak) ttongkam lakah NLD Chairperson Pi Aung San Suu Kyi ih “Minung zoh hlah uh, party zoh in vote in pe uh” a timi ttongkam hi rel hlawhbik mi pakhat a si.

Ram pum huap cangan thiam hminthang Shwe Gu May Hnin, President thuron petu hlun le cangantu Dr. Nay Zin Latt, le cangantu dangdang in “minung a thupi sawn” tiah an ttang. “Minung tthat lo ahcun party ih fehpimi kalhmang cu ziangtluk in ttha khal sehla, a ttangkai lo” titu dang tampi khal an um ko ding.

1947 kum ih hrilawknak ah Pha-sa-pa-la hotu Bogyoke Aung San in “Uico in a hngawng ih pha-sa-pa-la tacik a run orh khal ah vote rak pe uh” a rak ti ve dah. 2010 hrilawknak khal ahkhan Lairawn le Chin ramkulh ah minung hnakih party zoh sawntu Chinmi kan tam nasa. “Chin party palai cu vok a si khalle miphun dang party palai hnakin ka hril sawn” titu an rak um hnuaihni.

Pi Suu Kyi ih ttongkam hi theihthiampi a ttulnak zawn a um. “Ramkhel Zilthli (3) : Ziang Party in President A Ttuan Ngah Ding?” timi cahram ah ka tarlang zo vek in, tui ttum ih NLD in cozah a din theinak ding ahcun mipi hriltlin mi palai zatek tampi a ngah a ttul. Ramdingkhawm Tlangsuakbu (Paydaungsu Hluttaw) ih palai 664 ah a hrek luan a si mi 333 le a tlunlam ngahtu lawng in cozah an din thei ding kan ti kha!

Cumi palai 664 ah zatek 25% a si mi ralkap palai 166 kan hlon asile palai 498 lawng an tang. Palai 498 lakih 333 ngah thei ding cun NLD party in palai tohkham zatek 66% lenglo a ngah a ttul. Party 193 lakah party pakhat in cu zatzat nehnak ngah ding cun mipi in party zoh ih vote pek a ttul rusngah a si. Cun himi kalhmang hi 1990 kum hrilawknak ih an rak nehnak kalhmang a si.

Kan ram ahhin 1947, 1951-52, 1960, 1990, le 2010 kum pawl ah rampi hrilawknak rak tuah a si. Cumi pawl ah mipi in minung hnakin party an zoh sawn ringring ti sehla a sual tuk lo ding.

Tthimnak ah 1960 hrilawknak ah U Nu ih hoha mi pah-hta-sa party le U Kyaw Nyein ih hoha mi pha-sa-pa-la party an zuam aw. Cumi lai ah mipi ih duh hlawh zet Bohmogyoke Kyaw Zaw khal bulpak (independent) in Kyimindaing peng ah a zuam ve. Pah-hta-sa party ihsin mi lar lo Thakhin San Way timi khal Kyimindaing peng ihsin a zuam ve. Mi tampi ruahdan ahcun ram pumpi ih duh mi Bohmogyoke Kyaw Zaw cu midang cun neh ngaihnsk a um lo.

Asinan himi can hi mipi in ralkap an huat lai fang, tuisan Suan-arr-shin pawl vekih mipi hremtu Pyusaahtay timi mibur an suah sal an phan san a si. Pha-sa-pa-la vote kan pek ahcun Philippines le Thailand vekin US sal ah kan cang ding ti an phang ih pha-sa-pa-la cu an hrial. Cutikah U Kyaw Zaw le Thakhin San Way ah zo in a neh ding timi an cuan.

Hrilawknak ni a thlen tikah U Kyaw Zaw uh lamttang pawl cu an phur zet. Thakhin San Way cu a ih hman a itthat thei lo. Asinan vote an vun siar tikah mipi duh mi pah-hta-sa party palai Thakhin San Way in nehnak a ngah.

2010 kum hrilawknak ih tualtto party CPP le CND (tu ih CNDP) in nehnak an co thluhnak hmun Falam, Thantlang le Hakha khal ah “Nangmah cu kan lo duh nan na party kan duh lo” ti ih hnon tuartu palai an um hnuaihni. Tui ttum ramkulh tlangsuakbu le ramdingkhawm tlangsuakbu hrangah teh ziang kan bang ding ti hi theih hiar a um nasa.

Himi zawn ah democracy a duhtu mipi cun democratic lam a hoi mi party ciocio lak ahcun minung zoh ih hril khal a poi tuk lo tla a si thei. Asinan cozah din ding cun party pakhat ih vote ngah zat kha a thupi bik ti hngilh lo a ttha. Hoi dan bang aw lak ihsin a minung zoh ih hril a poi tuklonak san cu tlangsuakbu ih an vung ttan tlang thotho ding ruangah a si deuh.

Tui’ kan ram ih party lakah mipi hnenih thuneihnak pumhlum a thlen ding duhlotu party lakah USDP hi a thupibik a si. Annih cun a thupibik mi remdaihnak tuah ngah hnu ah nuamtete’n kan zuam ding tiah mipi an sim. Asinan kum nga sung USDP ih in hruai sungah ram dang bomnak US dollar million tor le seng hmang in remdaihnak ngah an zuam nan an hlawhtling lo ti theih a si.

Ziangahtile NCA ih hminsen kartu pawlkom pariat ahhin za ah sawmkua cu pawlkom thupi lemlo ti theih an si. Ram sung remdaihnak hrangih a thupi sawn mi ralthuam kaitu pawlkom tum KIA, SSPP/SSA, Wa tivek pawl thawn remdaihnak an tuah thei lo. Thil um dan zoh tikah Myanmar Ralkapbu hin amai’ hlawknak ding lawng a zoh ruangah ramhrin miphun karlak ah remdaihnak a um thei lo a si bik. Tuihnu khal ah a si vivo hmel fawn. An party ih fehpi mi kalhmang hi rampi tuah ttha ding ngai a hoi lemlo.

Taktak ahcun minung khal a thupi ih party khal a thupi. Hitler khal kha tthatei’ hrilawknak paltlangh ih hung tling so a si ko nan a minung tthat lo ruangah mi sualral ah a cang thotho. Rel ding dang tampi an um nan ca a sau ding ruangah duhtawk mai sehla.

Mipi in minung le party kop ih kan zoh tikah a ttha tluantling an um lo tla a si thei. Asinan kum 50 sung mipi in hrekkhawngtu pawl ih vulhsuah mi minung umnak hmun, dinhmun sebik ih in hnukthlatu pawl beunak party cu ziang a si ti kan theih a ttul.

Himi zawn ah democratic party lam ahcun mipi loram longtu, mipi hrekkhawngtu, leitlun ram retheibik ih in tuahtu hi an um hman ah USDP le a ttanrualpi party hnak cun nasate’n an mal hrimhrim ding.

Curuangah a minung zoh khal ah, party zoh khal ah a ttha sawn cu zo an si ti kan theih a poimawh bik ding.

(Visited 208 times, 1 visits today)

Comments

comments

Comments

%d bloggers like this: