Ramdingkhawm Remdaihnak le Aung San Suu Kyi Lungput

February 12 ni cun Ramdinkhawm Kawl mi-uk ram ih kan telnak kum 70 a kim curco thlang ding. Himi Kum 70 kimnak puai cu Ramdinkhawm dingih thu an rak relcatnak Shan ramṭhen Pinlong khua ah Rampi kumpi ih hohanak in tuah ding a si.

Aliam ciami kum 70 sungah Rampi an rak dinkhawm laiih an sunmang pawl cu thungai in kan tep/hmu ngah hrih lo. Daw Aung San Suu Kyi le NLD in hrilawknak ah nehnak an congah tikah Ramdingkhawm rampi a sinak hmuar nei zetin Tlangparmi pawl in hmuh kan duh cio. Asinan, DASSK ih lungput le hnaṭuandan hi tlangparmi le an Hriamhreikai pawl in tutiang fiangte ih thei thei an um hrih lo a si hmang.

Ralkap tuahmi 2008 Constitution in Ramdingkhawm rorelnak fiangten a ngan tel lo. Ralkap pawl ih lal theinak lawng phurzet in ngan a si. Curuangah 2008 Constitution cu thleng a ṭul timi cu Democrary sal hmuahhmuah lawng si lo in anmah ralkap pawl lala khal ih theihmi le rel rero mi a si.

Ralkal hotubik General Min Aung Hlaing cun Hriamhreikai pawl dorelnak an bansan ih Rampi ah daihnak a um tikah Constitution kan thleng ding – cumi tikcu cu kum 1 sung khalah a si thei; kum 10 sung khalah a si thei. Hriamhreikai pawl parah a ṭhumaw tiah a sim leuhleuh. Cutiin, President Thein Sein san laiah Hriamhreikai pawl thawn rualremnak tuah dingin Nationwide Ceasefire Agreement (NCA) tiah lungrualnak tuahnak an rak nei. NCA ah KNU le CNF tla an tel ve. Asinan, KIA, AA (Arakhine Army), TNLA, MNDAA pawl cu a rung tel lo. Kawl ralkap pawl cun KIA le AA cu Ramdingkhawm miphun ah a ruat ih NCA ah tel ter a duh nan, TNLA le MNDAA cu NCA ih tel ter a duh lo. Curuangah Shan State Restoration Army (SSRA) tla TNLA thawn do aw dingin a forh ṭheu ih kum 3 sungah voi 4 lai an do aw zo, MNDAA cu 2015 ah khan Kawl ralkap in nasa tak in a do nan Tuluk cozah in MNDAA a ṭanpi ruangah Kawl ralkap in dongam nawn lo in a colhsan. Himi backgroung thuhla cu hivial in si hrih seh.

Ka ngan duhmi ngaingai sawn cu Ramdingkhawm rampi thawn pehparaw in Daw Aung San Suu Kyi ih lungput a si. NLD Leadership Team sungah

(1) NCA ih ra cangsuak dingmi Rampi remdaihnak a um hnu ah Hriamhreikai pawl thawn Ramdingkhawm rampi sinak Constitution rem theih a si ding, timi le
(2) Constitution rem hnu lawngah Rampi remdaihnak a um thei ding, timi ruahnak a um.
Ton dah hrih lomi a si ruangah khawimi a dik sawn ti cu zohman in an thei lo. Constitution rem duh le a thar lawlaw ih ngan duh tla an um.

Simzo bangin U Thei Sein san lai ih Ralkap hohanak ih rak tuahmi NCA kha DASSK in a thok ah a rak duh lo. Miphun zapi remdaihnak le Constitution remnak ding pawl cu mipi hrilmi Parliament ihsin lawng tuah ding a si tiah a rak ṭang bet. Hriamhreikai pawl in cuti asi ahcun, Parliament ih tel lo kannih pawl cu political process sungah telh lo vuarvi maw kan si ding tiah an lung a rak awi lo. Curuangah, 2015 Rampi hrilawknak ah Tlangparmi Hriamhreikai hrekkhat pawl le a vuangvang rak theihpi pawl in NLD hnakin USDP an rak hlawptlonak san a si. Culaiah KIA cun NLD in nehnak an co a rak hngakhlap zet.

Parliament Chairman Thura Shwe Mann ih ṭanpinak le mipi million tampi signature thawn Parliament sungah Constitution rem an rak tum nan, Ralkap tel lo rori cun remtheih a si lo tikah, DASSK in NCA lungkimpi sal in rampi remdaihnak tuah a run duhsal. NCA ih telcia pawl le tel hrih lo pawl tel theinak dingah tiin, Pu Cin Sian Thang (ZCD) ih thuronpeknak vekin 21st Century Pinlong Conference tiin Naypitaw ah KIA tel in an ron tuah thei. Asinan, Ralkap pawl in DASSK ih tuahmi Rampi remdaihnak ngaingai a duhpi lo; anmah Ralkap pawl ih Terms & Conditions lawng si ding an duh ruangah, KIA hotu pawl thawn Naypitaw ih remdaihnak thu an rel lai rori ah Gen. Min Aung Hlain in KIA do dingin thu a pe cih mai. Cutin tla 4 lenglo an doawk hnu ah Kawl ralkap in KIA Gideon camp an run laksak. (Gen. Min Aung Hlaing parah thuneitu an um ih amai’ thuthu in a cang thei ve lo…. Ka ngan leh ding.)

2008 Constitution vek cun raldonak thuhla ah Rampi President in Ralkap hotu thupek theinak a nei lo ti a si ruangah President U Htin Kyaw siseh, DASSK khalin KIA donak cawl dingin thu a pek thei lo ruangah ti mualpho-awk hrial in mipi theih in voi khat hman raldo cawl ding thu NLD hohami kumpi in a relsuak dah lo. U Thein Sein sanlai ah raldo cawl dingin ralkap lubik a sim nan, an cawl duh lo tikah U Thein Sein le a cozah an mithmai a siat phah timi tla casiartu pawl in nan cing lai ding ka zum.

NLD le DASSK cun NCA ihsin Rampi remdaihnak ngah in Parliament le Parliament ih tel lomi remdaihnak a lungkimpitu Hriamhreikai pawl thawn Constitution remṭhat ding timi an zuam rero nan a cang thei nawn lo ti an thei suah zo. Curuangah, 2017 Union Day le A Voi Hnihnak 21st Century Pinlong Conference cu Pinlong ah tuah tahrat in NCA khal si hlah, Hriamhreikai khal si hlah, mipi hrilmi MP pawl le Mipi ai-awhmi ih an ruahmi Hriamhreikai sungin siseh, Mino Pawlkom pawl siseh, Civil Society Organisations (CSO) pawl siseh, telkhawm in Constitution remtheinak ding ruahsannak thawn an cangvai rero nak a si.

Rampi cozah le Ralkap in Chinmi kan umdan in theiṭha zet ih CNF cu Chin mipi ai-awhtu an si lo tiin President Office Spokesman U Hmuu Zaw @ U Zaw Htay ih ngam tak ih a simmi tla video clip in nan rak hmu zo ding. Gen. Min Aung Hlaing khalin CNF cu Hriamhreikai burpi an si ciah lo tiih a simmi tla youtube ah a um. Himi ruangah NCA ih telmi CNF ih tumtahmi Chin Statewide mipi thawn thureltlannak hman tuahter nawn lo ih Kumpi lam ihsin anmai’ an tuah sawn ding thu an simnak a si. CNDP (Chin National Development Party) tla cun CNF hrangah zaangram in NLD parih an lungawi lo nak statement tla a suah hngehnge zo. KNU pawl cu mipi ai-awh thei ah an ruahsak.

Chinmi pawl ih kan ruah dingmi cu Independence ngah thei rori dingin Unity and One Force kan neih thei ceng si lo ahcun Ramdingkhawm sungih um ringring ding kan siih, Ralkap le NLD lakin politics thlengaw reromi kan hliahlai ringring ih kan theihthiam a ṭul tinak a si. Mino pawlkom pawl le CSO pawl khalin Peace Talk tivek ah kan telnak ding si lo tivek in lungput nei lo in Ramdingkhawm politics ah kan ti theimi cio in kan Chin mipi le Chinram in mi kan bang theinak dingah kan ṭan cio a ṭul. ,,, tiah ka hmuhtonmi te ka lo hlawm ta..

© Steven R Sunthang, Feb 10, 2017.

Comments

comments

Comments

%d bloggers like this: