Ramdangmi ih Covo

Thansoh Bawmtu Part – 5

RAM DANGMI IH COVO

Fakselnak neitu hnakin tong nei mumal loih um ngiongiopawl tih an nung sawn timi thufim kan nei. Cuvekin zalen zetih sumdawn san ah ram pakhat ah ram dang mipawlih sumhram an tauhnak ruangah rampi in hlawknak tampi kan hmu, ram pakhatin aram sungih ram dang mi sumdawn asianlonak rampawl ahcun aram in siatralnak an tong rero thu mithmuh tham theih asi.

Japan milianpawl America ih inn hmun leirampawl pursum hramthlaknak an va neih ciamco laiah America pawlin Japan pawl hnenah,” America pawl hi leitu lawngah maw in ruah” tiah cuanglai san ah nasa takin fakselnak an rak nei. Lehlamah America pawlin France company pawl le Euro ram ih America an bang lo san(Euro Disney Land) laiah,” France ram cu leitupawl” tiin an rak ti dah.

Hivekih an tongsuak rero hi,” leitlunram tinkim ah ram khat le ram khat  sumdawnawknak an neihsian thu an hngilh si ko ding.” Chinram in federal asilole Independence angah ahcun ram leng mipawlin Chinram cu sumdawnnak ah an hmang dingih an sal kan si hnu cun Israel pawl Pathian an vui ciamco hman kan bang leh lo ding kan ti thei lo.

Ramlengih sumhramthlak timi hi thilri kuatawknak ih amiat (trade surpluses) ihsi ra suakmi asi timi te tal kan hngilh siang lo kei uh. Nasatak ih hna kan tuan reronak ruangah a lut hnakin asuak lam thilri kuat theitu ram pakhat in leitlun thilri zuarnak ah sumhram thla dingin sumpai tam zet a lak lut thei ruangah cui sumpai tamzet thazang rinsan in ramleng cozah in an thilri zuarmi sumpai cawiawknak cachuk thawn an thilri kuatnak ram ah inn leiram, company, adt.. cui ram sungih an lei duhmi an tuah duhmi ramleng ihsin ramsungah lei siannak an pe. Thimnakah::

America cozah, ramleng thilri kuatnakih arak hlawhtlin laiah ramlengah nasatakin sumhram arak thla, sum arak dawng. Cutin 1980 hnu lam cun America cozah cu a zawnzawn rori tlukin ramleng thilri kuatnak ih a sunral vivo hnu cun ramleng hrangih atuahmi ting millions lenglo man thilripawl cu America cozah ih sumdawnnak sungah ramlengpawlih sumhramthlaknak ah an cang thluh. America pawlin Japan pawlih thilri kan lei an ti rero nain America pawlih sumdawnnak lamzin hlohlam hnakin kiangkap hnatuantupawl hrangah hna thar thuam thar an ngahnak pakhat asi ruangah cuih hlawknak in Japan zar an tonak asi.

Athupibik pakhat cu ram pakhat ih khaikhawm sumdawnnak, santiluan vekih an tuahmi thilripawl(High tech Industries)  cu ramdangpawlin kan duhmi hmuahhmuah ramleng ihsin kan leiawk theilonak dingah cozah dan hmangin khapbetmipawl cu meithal, ralnam pawl an si. Thilri dang ram khat le ram khat sumdawnawknak ih khapbet aum lo ruangah khat le khat tluangten sum an dawnawk rero theinak si.

Thilri kuatnakih sunlampan ram hrekkhatpawl hi leitlun thilri zuarnakah tamsin an tel theinak ding rua hmannak thawn ramlengih sawmngiarnak in pumpak neihsiah thilripawl zalen zetih kuatawknak a on ruangah cuvekih hlawknak tampi apekmi rampawl khal an um. Curuangah ram pakhat le pakhat pehtlaihawknak cozah ih a khapbet tikah a ram mi le thilri neitu pahnih in sunralnak kan tong ding asi.

Ramleng ihsin ramsung thilri kuat sian mi le mi lo kan nei si bang sehla kan ram in a mipi hna nei lo ah in can dingih rampi hrangah tulsammi sumhram tlaksiatnak apan ve ding asi. Cutikah kan hnenih ra thleng ding sumhramthlatupawl cun zalen zetih sangka ongtu ram ah in tlansan thluh ding ruangah Mizoram hrekkhatpawl Burma ram ihsin thilri in kuat lo khalah kan nung thei an ti rero hi an thu theih lo asiih tuisun nitiang mizorampawl an thangso thei lo ruangih an at deuhdeuhnak khal asi.

Comments

comments

Comments

%d bloggers like this: