RAM LENGAH … MAH LAWNG!!!

Ram lengah … Mah lawng!!!

By: Hniangsinpa

 Can rei zet a si ko ding. Inn suahsan in ka um ih, ka umnak kip ah nuam ka ti in ka theiaw ih, ka thlennak kip cu hmun nuambik si vivo khin ka thei theu. Can a hung rei vivo ih, ka zum ban lo pi in, kan inn, ka nu le pa le unau pawl umnak lam pan cun ka her lala. Zankhat cu, kei zan it that mal ti fam cun, TV ka zoh rero ih, kan ihnak lam ihsin ka nu le pa cun, sunih an hnatuan thuhla le thuhla dangdang an rel rero. An rel sau deuhdeuh ih, Lhniangsinpaaitlang lam thu an rel, khaw tinkim deuhthaw siin ka thei, an sal vivo ih, an lungleng ve zet si ding. Zinglam khawvang zik tiang rori thu cu an rel ih, Kawlram ih kir an hiar zia an relmi cun an thu rel cu an cem ter.

 Kei khal, khua a vun vang zik ngaingai cun, ka ihnak lam ka pan ih, zing ih in thang pang phangih, ka tar theu mi, “In thang siang hlah” timi cu ka tarnak theu ahcun nuamnai ten ka vun tar ta ih, ka lukham ka nau le pawlin, thiangfai zet ih in sawp sak mi cu hnim phahin, ihthah cu ka vun tum nan, thuruah a ti sau sawn in ka thei.

 Singai… e… a si ko… mai ram ih um rem can lonak phunphun ruangah, mi ram ah, a ti thei deuh, ram nuam deuh ah, ti thei lo deuh in, ram nai sawn ah um in, then aw darh theh hmansehla, kan lunglen le kan khaw ngaih in banni a nei thei lo ding. Mi ramah um in, sum le paiah, harsatnak ngaingai nei lo vekin va um hmansehla, khawngaih, lunglen a reh thei lo. Kan tong in kan tong thei lo ih, kan ei le in duh theu mi khal ei ban lo in kan um. Kan suahkehnak ngai duahdo in um khal sehla, ngai man a um theu lo.

 Mino hrangah rual le pi ngai a nat vekin, kum upa hrangah a zual deuhdeuh. Kan ram ngai a na, kan hngilh thei si lo, um kan hiar nan, ka um thei si lo. Kum kim zet zo khal, kum kimlo vekih um a rak tul, nupa duhaw zet silo khal, duhaw zet vekih um a tul. Ngai a va na so kan RAM.

 Hrekkhat cu, an umnak hmunah, an mai tong ih biak ban thei an um lo!!! An hmuhban, Internet in an siar ih, an lunglen a fah thei ngai fawn lo. Hla an hmuh ban sun an ngai, lunglen ti zualtu an si lala fawn. Ziangtin so maw, mi ram ahcun kan lunglen a reh thei ngai ding? Maw, kan cung mang bawi, nang lai rel law, tiah thla za an cam ve ding khin ka zum. Khawitawk hmun khalah um in, ei le in lamah tlaksam neilo vek va si khal hman ningla, lunglen ti zual tu men an si e.

 Rualtha le sungkhat unau ngaiah, tap ih can an hman can a tam ko ding. Hmuhsuam nautat nak karlakah, an hmuhtawn mi tam in lang hmansehla, lunglen reh tini nei thei ding a bang cuang lo. An hrangah, nu le pa, sungkhat unau mualliam thu theih a bang lo, hiar zet hman hai sehla, kir a rem si lo. Nu in a fa duhlai a hmu ban lo ih, fa khal in a ngai duahdo mi a nui taang hlum a naih thei fawn lo. U le nau ngainatawknak tep hiarin an ai hram nan, duhthusam men in mual a liam san vivo.

 Can reiin a hnem ve dingah an neih nan, a hnem lo, can a rei, lunglen a na deuhdeuh. Hi lawmmam dinhmun in thlentu cu aw… ti hman nung, mah le mah thin ti heng aw tu ah an cang lala. Sungkhat unau thih thu a thang, riahsiat za vanduainak thawn, hnemtu an um cuang lo, hna ih ngai men lo cu.

Hiti lawmmam in ramleng suah kan hiar ih, ram leng kan suak cupco nan, ziangtikah kan ram a tha sal dingih, ziangtikah kan kir sal ding ti ruat lo cu an mal zet ding. Tumtahnak tum zet zet kan nei nan, mi ram a rak siih, kan tuahsuak siang fawn lo. Kan fim kan thiamnak khal, a hmannak ding hmun in a rak zir lo theu ih, a karh thei ngai lo e.

 Mi ramah, mahlawng ih um hnak cun, ka hril sawn, ka ram hniang… ti cu mi aa hnemawknak ah kan ngai zik a si lo sawm. Ka ram hniangte kan ti nan, a sungih um kan duh fawn lo. Mah lawng in rak tuar hrih ko tiah kan thlahthlam sung vekin ka hmu theu.

 Ka rualpa cun, “Zanlam a hung kimih, ka rualpi pawl thawn, nuthlawi kunza ti kan vun hmawm ta ih, kan duhduh kan relih, kan hmawmsak nuthlawi lungkim awm tawk capoh le thuphan kan rel hnuah, fala ka lengih, capoh hnihsuah kan duhduh kan vun sai lai tluk ih ka ngai mi can a um zik lo” tiah phone in in rak sim dah. A si tuk ding, zo in so maw, mai rualpi tha le tlanlennak mual ngai lo um ding. Mi ram ahcun, mahlawng kan si. Buai khalah, riahsiat khalah.

 Kan can sunglawi le kan no lai can hmuahhmuah, kohkir theih sehla tiih duhthu kan sam mi pawl cun, mual in liam san vivo ih, ramlengah, Mahlawng ih um dingin kan pan lai tho tho a si hi. Kan Laimi cu Mahlawng in Ramlengah…. Aw….

 A leng e, a li leng e an lunghnnnn copy

A zual sinsin ni nu a liam cun

A thar lala, ni nu a suah in

Koh sal an hiar, a liamcia can

 

Ramleng thlen hiarin an ai hram nan,

An thleng ta ceng duh a kim lo

Lengza nuamkim thawm a thang

Kir hiar in an tap, mah lawng in

 

Nuam tin tawl nuam maw tiah

Tep hiar in an suak nan

Duh a kim lo, mi ram ahcun

Kir hiar in an tap, mah lawng in.

 

Theih sehla maw, ram dang tul lawn

In tuah thei nan, cung hlum khuanu’n

Hmanseh, ziangah li leng kum thlir ding in

Kan suak si maw, kannih Laimi

A leng e, lung a leng e

Ngai mi um lo, ngai lo um lo

Ruahnak hmuah hlo cimit theh in

Ka lo ngai e, ka ram hniangte.

 

Lai mi phunkip, thla za camnak cun

Kan cung thangvan thleng in,

Van sangka ong in kan ram in cuan law

Nang Laireltu kan hrang ruat hram.

 

That can neih a um, nan Kawl ral bawi

Lungruh cem can nei in,

Sunghno kan suahnak kan ram hniang

In pe hram aw, tiah kan lo ngen.

 

Kan sual kan palh, in ngaithiam in

Kan parah na lung hmui she

Cutin, khua za kip um kan Laimi khal

Kan kir theinak Kan Laitlangah.

(Visited 34 times, 1 visits today)

Comments

comments

One Comment

  1. A leng ngai, Hniangsinpa na ti ttha…..

Comments

%d bloggers like this: