Raltlan sinak ih Australia ram na thlen tikah

By S. Van Bawi Lian 

Kawlram Ramharsak nak ruangah India, Malaysia, Singapore, Thailand le ram dangdang ih a tlan tu kan Chinmi pawl Australia rampi an thlen tik ih theih ttha mi a si ding ti ruah san nak thawn Raltlan sinak ihsin Australia ram na thlen tikah tin a tlangpi thu in ka rawntar lan nak a si. 

Australia ram in kan lo hmuak 

A hmaisa bik Australia ram ih na ra thlen veten AMES (Adult Multicultural Education Services) lole organisation dang hmangin MIC ( Migrat Information Centre ) pawl in nangmah lo hmuak tu ding le nangmah lo tuamhlawm tu ding an lo ruat sak cia ding. MIC ih palai an thlah mi cu thlennak hmun ih zir in a bangaw cio lo. Australia,VIC state sungih a thleng tu pawl, a hleice in Melbourne ah cun AMES lawngin an buaipi tisehla a sual lo. 

A lo buaipi tu pawl in Vanzam ttunhmun ihsin an lo hmuak dingih, umnak hmun an lo hawlsaknak hmunah an lo tthum ding. Inn an hawlsak cia mi pawl cu an mai inn ah an ret cih, amahlawngte inn an hmuh sak lo ah cun Motel pakhat khat ah ret sung an si theu. 

Community Guide

MIC ih a palai hmangih organisation pakhatkhat kut hnuaih a ttuantu, nangmah lo hmuak tu pawl ih hleiah, Chin Community sung ihsin nangmah lo buaipi dingin community Guide timi an um bet lai. Hi pawl in nitin in na ttul sam mi hmuahhmuah ah an lo fehpi ding.

 Interpreters (Ttong lettu pawl)

Mirang ttong na thiam lo ruangah thinhar ding zianghman a um lo. Na thiammi ttong ( phunhnam tenau tuk ttong cu silo, Chin ttong hmanmi tt.. Falam, Hakha, Zo or Tedim) hmangih na ttongmi lo letsak tu dingah Australia ram pi in Interpreters mi ziangmaw ti zat a nei.  

Medicare

Medicare hi Australia na thlen vete ih na thil ttul hmaisabik le a pawimawh bik pakhat a si. Zato ih na feh duh ah simaw, na damlo ah simaw na hriselnak lam ih an lo hminsinnak ding hrang ih card fate a si. Hi mi hi damlo caan ih siikhan na feh tinte ih na ken dingmi a si.

 Bank Account

Sumpai Centrelink ih an lo bawmmi siseh, a dangdang na khawlnak ding hrangih a pawimawh zetmi a si. 

Kum 16 tlun lam hin an mahte in Bank account tuahsak an si theu ih, nu le pa ih lungkimnak thawn an bank ah paisa khal thansak a si ttheu.

Centrelink 

Australia na thlen vete ih a lo cawm tu ding pawl an si. Na sumpai lakluh mi, na hnattuan nak, na tlawngkainak, na tuahmi pawl a lo hminsinsak tu le na umnak pawl lo hminsin sak tu khal an si.

Centrelink ah hin ziangkim sim a ttul ttheu. Australia ram ih raltlan ih a lut tu hmuahhmuah ih hminsin a nei thluh. A ram na thlen veten an mai’ hminsin dan vekin na thuhla an lo sut dingih hminsinnak an nei ding. (UN ih interview vek ih ngah le ngah lo ti cu a silo. 

Mirang ttong a thiam lo pawl hrangah ttonglet tu an um ih, hmaiton in thusuh nak neih a si ttheu. Centrelink ih an feh hnu lawnglawngah paisa acozah ih bawmnak cu don a si theu. Medicare, Bank A/C pawl khal hi Centrelink ah pek thluh a ttul ruangah community guide pawl in Centrelink ih an feh hlan in a ttul mi pawl cu a hlankhan ihsin an rak tuah sak ttheu.

Health Care Card

Health care card hi a thupi zetmi centrelink ih a pek mi card a si. Hi card te hi phun dangdang a um ih, hnattuan theilo pawl hrang ih tuahmi, le kum upa pawl hrangih tuahmi tin a um.

Meisa man, Gas man, Tlangleng man, Si leinak tvp.. ah hi card hmang in ziangmaw ti zat cu ti niam sak an si theu ih an card ih zir in covo an neihdan khal a bang aw lo.

Hna tuan tha neih hnu cun hi card hi pek an si nawn lo ih, hna an tuan nawn lo vete in pek an si sal theu.

Hi Health Care Card hi centrelink thawi dawr awknak ding hrangih hminsin pakhat khal a si ruangah card numbat hmangin ca, phone le a ttul mi tuah a si theu.

Covo dang pawl

Raltlan sinak ih Australia na thlen ve ih na covo hmaisabik cu a ram ih um hnget theinak (permanent resident –PR) sinak na nei cia. A ram mi si na duh ah cun kum (4) fai a ram sungah na um a ttul ih cu mi hnu lawngah test na tuah thei. Kumli (4) a kim hlan sung ah cun ram dangah thlathum (3) sung lawng tlawn theinak covo na nei. Hi thlathum (3) cu kum siarnakah an siar telve lo.

Na thlen vete ihsin thlathum sung cu um awlnak caan acozah in an lo pe dingih, hi caan ah cun zianghman ttuan in le zir lo khal in na um thei. (Melbourne thleng laimi pawl cun firm an feh ttheu..Firm feh daan). Hi thla thum (3) a kim veten Centrelink in a lo ko dingih ziangna tuah ding timi lo suhnak an nei ding. Tlawng na kai duh maw, lole hnatuan na duh lole ziang na tuah ding timi felfai ih relfel awknak an lo nei ter ding. 

Tlawng a kai tu pawl in zarhkhat ah sml 20 tengteng a kai lo ahcun, zarh khat ah hna (4) hawl dingin fial an si theu. 

Thla ruk (6) sung cu AMES or a lo zohtu pawl in community guide pawl hmangin an lo zoh dingih, thlaruk (6) a kim veten MIC kut hnuai ah nangmah te ih thil ziangkim tuah thiam dingin an lo ret ding.

AMEP le tlawng kai daan

A tlangpi thu in Australia ih raltlan sinak ih a thlengtu pawl ih an zir hmaisabik mi cu AMEP (Adult Migrant English program) a siih, sml 510 sung zir theinak annei. Miring tong zirnak hmun a siih an thiam daan ih zir in tlawng inn ah level tthensak an si theu. 

Hi an cazir mi caan sml a cem hnu ih zir bet a duhtu pawl hrangah Centrelink ah dilnak tuah a theih thiamthiam ih centrelink in zirbet dingin caan ziang maw ti zat a pe bet sal theu.

Nauhak pawl hrangah mirang ca zirnak a hleiin tlawng an kai hlanah tuahsak an si ttheu ih, an thiam daan ih zir in tlawng ah an mah in an ap. Amahlawngte hi nauhak miring an zir tir dan cu hmun khat le hmun khat a bang aw cio lo. Abangaw mi cu tlawng inn ah an mah pawl hrangah miring zirh bawmtu an um pakhat lawng a si.

Mi rangca thiam kum kim cia pawl cu mahte in TAFE ah mai duhmi zir theih a siih, a ram ih PR sinak a nei tu pawl hrangah an thiam daan ih zirin zir theilomi a um lo. 

Job Network ( Hna pehtlaihnak)

Zo vek khal Joh Network ah luh theilo a um lo, hna ttuan a hawl duh tu pawl a bawmtu pawl an siih, Centrelink thawn a peh zawm awk mi an si. Thil zir simaw tlawngkai a duh pawl hrangcu hi Job Network pawl ih feh tlangin kai a si ttheu.

An mai kut hnuai ihsin TAFE siseh phunsang a kai tu pawl cu an tlawngkai man khal bawmnak an pek sak theu.

Comments

comments

Tags:

Comments

%d bloggers like this: