Raltlan Sinak, Covo Le Tuanvo Thutawi

Raltlan Sinak, Covo le tuanvo Thutawi

(World Refugees Number 35 Million)

images (3)

Raltlan an rak umnak hi a rei zoih, minung thuanthu tluk in raltlan thuanthu hi a rei ve ti a theih a si.  Khuahlan siangpahrang san ihsin mai ram hruaiawk daan duh lo ruangih ram dang ah raltlan in rak vakvai an um zo.  Tuisan khalah mai ram hruaiawknak that lo ruangah leitlun hmun zakipah raltlan tampi an um.

Raltlan an rak umnak hi rei zet zo hmansehla raltlan sinak, covo le tuanvo pawl hi daan ih an tuahnak cu a rei hrih lo.  Leitlun ralpi vei2nak hlan tiang ahcun Europe ram cak deuh pawl in leitlun an rak uk ih, an ukmi ram mipi pawl cu ram dangah tlan thei lo in an rak um.  Ralpi vei2nak an doawk ruangah mi tampi cu raltlan in mi ram ah an vakvai.  Ralpi vei2nak a cem ah

colony ram pawl in zalennak an ngah hnu khalah ram sung buainak a phun phun ruangah raltlan

an tam sin sin.  Tuisan raltlan tam sawn khal ram hruaiawknak tha lo le ral buai ruangah a si.

UN & Raltlan

Tulai raltlan buaipitu lakih tuanvo nei tumbik le hna tuan tambik cu UN hi a si.  UN HCR (United Nations High Commissioner for Refugees) hi December 4, 1950 ah rak din mi a si. UN HCR cu UNO ih hnge (branch) pakhat lawng a si. Atlangpi thu in leitlun ramkip um raltlan pawl bawm ding le nun thar din dingih tan lakpi ding hi UN HCR ih hna tuan a si. UN HCR ih tarlannak ah raltlan hi mi 34 million hrawng an um.  UN HCR cun raltlan pawl ih minung covo humhim le thatnak tuah sak ding hi a thil tum hmaisa bik a si.  Asinan, raltlan pawl ih covo humhim sak le an thatnak tuah lawng in raltlan pawl hrangah rei a daih thei ngai ngai lo ruangah raltlan pawl ih harsatnak relfel sak ding ah ‘durable solutions’ timi tumtahmi a nei bet.

Durable Solutions

UN HCR cun a kut sung um raltlan pawl cu ‘durable solutions’ pathum pek mi a nei. Cu pawl cu, anmai duhnak vekin anami ramih kuatkir sal (voluntary repatriation), an umnak ram ih ciahpil awk (local intergration) lole third country ih resettlement (resettlement to third country) pawl an si.   UN HCR hin tuah theimi tampi a neih vek in tuah thei lomi khal a nei ve.  Curuangah, a kut sung um raltlan pawl hrangih tha bik a tuah sak thei lo caan khal a tampi ve.

Raltlan Sinak

Zo vek pawl hi so raltlan an si kan ti ahcun sim dan a tampi men thei nan, “1951 Convention Relating to the Status of Refugees” vek in kan sim ahcun ‘mai ram leng ih um mi, miphun (race & nationality) dang si ruangah, biaknak, vantlan (social) pawlkom lole political pawlkom pakhat khat ih member si ruangah hrem tuar teng teng dingih tihnak nei ruangah mai ram acozah ih humhimnak dil duh lo asilole hrem tih ruangih mai ram ih kir ngam lo’ cu raltlan a si. “1951 Convention Relating to the Status of Refugees” ah raltla cu zo a si ih, ziang vek covo le tuanvo pawl a nei ti tarlan a si.  Tarlan zo vekin raltlan cu:-

  • Mai ram leng ih a um mi,
  • Hrem tuar ding rori si ruangah tihnak nei,
  • Mai ram ih kir duh lo maw, kir peih lo a si.

Ca ahcun hi ti in ngan si hman sehla, a tlun ih sinak pathum neih ruangah UN HCR lole ram dang acozah in raltlan ah an pom cih ding tinak a si lo.  ‘Determination of refugee-status lole refugee-status determination (RSD)’ timi a um lai.  RSD hi ram acozah pakhat le pakhat an tuah daan a bang aw lo vekin UN HCR office khalah tampi bang aw lo mi a um ve. Curuangah raltlan sinak famkim nei hman la RSD ih tlin lo khal a um thei tho tho.

Raltlan Covo

Ram dang acozah lole UN HCR in raltlan ih an pom zo mi raltlan pawl cun covo tampi an nei.  An umnak ram misa vek in covo cu an nei tam lo ding nan minung sinak covo tampi an nei.  Raltlan pawl ih covo hrekkhat cu a tanglam ih tarlan vek an si.

  • Mai biaknak thlun (pratice) theinak le fanau pawl zirh theinak
  • Court ih taya cuai theinak
  • Pumcawmnak hrang hnatuan tuan theinak
  • Phunsangtlawng hnuai lam tiang ca zir theinak
  • Sumpai bomnak

Raltlan Tuanvo

Raltlan zovek khal in tuanvo an nei theh.  Midang ram ih um an si vek in le an umnak ram ih lainatnak ruangih um thei an si ruangah an umnak ram ih daan pawl an thlun ve a tul.  Cuhleiah, an umnak ram ih daan kalh in sum hawl le hnatuan lo ding khal in raltlan pawl in tuanvo an nei.  Raltlan pakhat cun a umnak ram daan kalh in thil a tuah tikah a umnak ram acozah cun ziang tik lai can khal ah an ram in an dawi suak thei ring ring.  Curuangah, raltlan pawl ih theih ding thupi zet cu ‘mai umnak ram daan thlun ding’ a si.

Ngantu: Thangpu

(Visited 39 times, 1 visits today)

Comments

comments

Comments

%d bloggers like this: