Raltlan Pa!

A hnuai ih biazai pawl hi biazai danglam le siar nuam zet an si!

RAL TLAN PA!

Hmin thar a thleng
Hmailem a bun
A mei a thup
Laimi a si.

Theih a hailo
A ngai dahlo
A laihri at-tu
Lairawl.

A lung a leng dah lo
A nu a ngai dah lo
A mah ngai in zo a tap
A thei lo!

Santi luan afen ahlo
Tlang par mi a si
A dang lam lo.

Khuihmun khuiram
Van dumral thleng hmanseh
A thuanthu sung
A hmin an khen

“RAL TLAN PA” tiin.

CIN PAK

NANG KHER KA RAK LO TON

Mitmeng val zarual lakah tong ngah ing ee mittial mawite,
Nimthlakau bang i ron kap maw mitmeng no sersi cun.
Khawrii ttek tla men bang hnin durdo maw kei lung sung ah,
Daram(drum) thawimi men bang a hruan aw maw ka lungthin cu!

Lungtum ruhmi hluanin a hak ka lungthin cu,
Hmanseh nang ka ton ni ah theifiang ee maw.
A tak ramah zupral thluh ee vuurhlom(ice-cube) ni satmi bang.
A cuih aan neem neitu nang kher ka rak lo ton cu!

Lunghno ngai ee “Baby” tiih kawh aw ka dawn caan,
Ka khawvel ah zo dang umlo nangmah pakhat lawng,
Ruah kan cu thlang runinn khat ih len tlang ding,
Hmanseh Ar puul thi bang na thihter maw ka sunmang pawl cu!

Ruat ngam hlah ing ‘Nusun’ men si ding cu!
I zohsuk hlah law, ka si aw ee hnahkhat leng!
I kop tumhlah ‘Nusur’ ka silo ding cengcun,
Ka lungthin hmuah nahrang ka pek thluh zo hnu!

Ka tuar nattuk ruangah camsiat tiangin ka nuam,
Mawh neilo mi nang ka lo ton ni le thla!
Hmanseh duhdawtnak ka theih ve nak.
Khal ter sal ning zupral thluh zo ka lungthin cu!

Sungmuril tiang fangtu kiangkap aanka ka theih caan,
Mimawi vansia pitawp in ti maw!
Mi innsang tthektu si ka tummi a silo!
I bumtu nang mawh lo phurh khal ka tum hleilo.

Mawhnak neilo na thinlung le ka thinlung tin….
Hmanseh lo ngen ko ning, i fehter hram!
Thinlung mitthli luang cingin feh thlang ko ning!
Ziangruangah i bumtu nang kher ka rak lo ton??????

I kam hramhlah ‘Next Life’ ih co aw ding cun,
Khristian zumnak ah ‘Next Life’ a umlo,
Thihhnu pialralram ih kan thlen hnu’n,
Kumkhua kan cawl lan ding runtui’ ttaangah.

Hilei ka sankhat nunah, lungduh colo leng maw ka si ding????
Hngawngkol bat tlang theilo Nang Kher Ka Rak Lo Ton Cu!!

Tuartu Dc. Rem2 ih tuarnak ngan sakmi.

Ronnie Thiang

Nang Ngai Ka Bang Lo

Niziat a sithlang in fehsan caan?
Kumziat a reithlang in thennak caan?
Caanhmuah liamin a her rero
Ka lungngai nak liampi thei haiseh ka ti nan
Zohman in an phur theilo maw nang ka longainak

Khawhsal theih nawn lawn nang na fehliam
Kir zairel nawnlo caankhal anliam ta
Nangngai man teh ziang san a tlaiding?
Kawhnak awwnem sangtu um lawn
Ka auu rero santlai lo ti thei cingin
Kumpi herin caan rei hmanseh
Nang Ngai Ka Bang Lo tu’i ni tiang

Mitthli hulcaan a cu tuk in ti hai
Tuarnak dam caan a cu zo in ti
Ka zuam rero, ka tum rero
Ka thazang in a tlinlo ka titheinak in a nehban lo
Nanghngilh ding cu a har fualfo ko ee ka hrang !!!!

Hausum Fanu

Zo saw na si?

Na duhmi rongsen
Na duhmi rose sendup
Na duhlo mi coffee
Na ei lo zawng luruh ring minu
Na huatmi t’ongkam ” duhaw tuk ”

Nang cu na lungruh
Nang cu na thinnem
Nang cu ti-aw-ter na hmang
Nang cu mi hniksak na paih
Nang cu mi lehrul na talent

Nang cun ka sunmang fala i ti
Nang cun na sunmang hmuah i ruah
Nang cun na ‘ Social Life ‘ i ti
Nang cun ka thazang na si i ti
Nang cun ….nang cun ….

Ka ruahnak ,.ka thluak le ka lungthin
A zaten tanglo ko bial na fang
“Zo saw na si ? ” ka hrang ah ;
Tik cu le caan in ” Zo saw na si ? ”
An lo phuang leh mai ding ?

By…Hlingnei Par

Hnem Tawi

(Visited 65 times, 1 visits today)

Comments

comments

Comments

%d bloggers like this: