Ralring Aw, Setan A Cangvai Rero

RALRING AW, SETAN A CANGVAI RERO

                                                                   Timothy Sui Lian Mang

Mipiangthar zumtu hin Setan cangvaihdan hi kan zingzawi le kan theihthiam rori a ṭul.  Curuangah zumtu pitling nun langdan tampi lak ihsin Setan le zumtu thuhla hi kan zirtlang dingah tiah Bible hmangin phawrhlang ka duh.

Bible sungih Setan hmin dangdang pawl zoh tikah a tumtah mi a langfiang zet. “Setan” tiih sullam cu doral tinak  a si. Setan cun Pathian a do, Pathian kawhhran a do ih, Pathian minungpawl a do. “Diabol” tiih sullam cu mirelsiattu tinak a si. Pathian a relsiat, Pathian kawhhran a relsiat ih, Pathian minungpawl a relsiat. Anih cu “tleu vancungmi vekah a tuahaw” (2Kor. 11:14), thil diklo rori kha dik vekin a langter. Cathianghlim in Setan cu “Sualfawrhtu”(Mat.4:3., 1Thes.3:50), “miṭhalopa” (Joh.17:15), “Mithattu”, “Thuphanper le thuphanih pa”(Joh.8:44) tiah a ko. Cun Cathianghlim in Setan cu “rul” (Sem.3:1;Thu.20:2) vekin tla a langawkter thu a rel, ziangahtile anih cu athupteih thilti, hrawkhrawl le tur nei a si; “rulhreng”(Thu. 12:9; 20:2), ziangahtile anih cu ṭih a nung; “ a huk reoro mi kiosa vekin”(1Pet.5:8), ziangahtile anih cu nunrawng le kawlhsen a si. A hminpawl hin a sinak, a ziaza an langter. Setan hi ziangsiarlo ih um men ding le hmuhsuam men ding a si hrimhrim lo. Zumtu kan pumpak nun, kan sungkaw nun, kan kawhhran le kan khawtlang ziantlukin in siatsuah zo ti hi thlarau mit ih zohthiam athupi zet.

SETAN CANGVAIHDAN

Bible sungih kan hmuh lak ihsin mal lai in tarlang sehla:

Setan cun na hlawhtlin tikah a lo ṭhua ding:  Zohṭhim ding ṭha zet 2Samuel 1-11 ah kan hmu. Siangpahrang David in Israel dotu ral hmuahhmuah a neh ṭheh ih, mipi cu lungrual ko le pumkhat ah a tuah, khawpi thar a din; ziangkim hi a tluang thluh verver thlang a bang. Culaifang ah Setan cun David cu uire pa ah le mithatpa ah a canter.

Setan cun na cah lo can le na bang zet can ah a lo ṭhua ding:  Zohṭhim ding ṭha zet Elijah (1Kings 19) kan nei. Setan in beidawng dingin le mah le mah thahawk duh ding tiangin suar a fawrh a si kha! A cau tuk, a tha a bang tuk tikah Setan in kha vek lungthin nei ding tiangin a ṭhua a si.

Setan cun a langsar zet mi hmanrua in a lo ṭhua thei:

Pathian mi a si lo mipawl na kawm ih, na kawm vivo asile, annih cun an lo ciahneh ding ih, siatnak lamah an lo hruai vivo ding. Curuangah Pathian ziangsiarlopawl hi kawm lo, kawppiih hmang lo dingin Bible in in fawrh.

Setan in na rualpi ṭha zet hmang in, nangmah lo ṭan zet vekin a lo ṭhua thei: Jesu a donak ah, Jesu kiangnai bikih um Peter kha Setan in hman a tum (Mar. 8:31-33). Jesu Kalvary lam pan lo dingin, a parah tuarnak le thihnak thleng lo dingin, Peter in hmang in thlem a tum. Ralring aw, na rualpi ṭha zet hmangin kha vek phun khan Setan in a lo ṭhua ve ding.

Setan in leitlun ih khawruatthiam zet mipawl hmangin a lo ṭhua thei: William Carey le  Gladys Aylward te khal kha an missionary rawngbawlnak ding khamtu le kankuattu cu missionary committee an si kha!

Setan in pulpit ih Pathian thu aupitu a hmang thei: Kan Bible kan siar ringring a ṭul. Bible sungah le kawhhran hmaisa thuanthu ah teh ziangvekin Setan a cangvai tipawl thei dingah kan zingzawi natsat a ṭul. Vei hnih vei khat cu Pathian cangvaihnak dotupawl hi  kut in Bible keng tahrat ih, thinlung ah cun Pathian thu Bible um cuang si lo, Pathian thu simtu an si thei. An khawruahnak le an tumtah mi cu Thlarau lam thu si lo, anmai ruahnak le hngalnak in a uk hai.

Setan in misawisel duhnak thinlung neipawl a hmang thei: Cucu Mawsi ih tawn mi nun ah khan kan hmu thei, sawiseltupawl in an do (Mipum. 12,14,16). Mi pakhat in lungkim lonak ci a tuh ih, thinhengnak, mingaih lonak, sawiselnak, relsiatawknak a kho cih mai. Mitungding zawngih sawlselnak cu thil ṭha a sin an, a relsiat zawngih sawiselnak cu khensa nat vekin mi nun a siatsuah.

ASILE ZUMTU IN ZIANG KAN TUAH DING?

  1. Setan a um taktak zia hi thei in fimkhur ringring aw!

“Cu lo asile Setan in kan hnen ihsin remcannak a ngah pang ding. Ziangahtile Setan-ih khawkhandan cu kan thei a si,”(2Kor. 2:11).

  1. Fimvar aw!

“Nan doralpa Diabol cu a huk rero mi kiosa bangin a deh ding hawl ih a tawihvah rero ruangah, fimvar uhla, ralring uh,”(1Pet. 5:8).

  1. Setan cu do aw!

“Leitlun hmun dangih a um mi nan unaupawl hnenah cuti vek tuarnakpawl cu a thleng ve ti thei in, amah cu do uhla, zumnak ah dinghnget uh,” (1Pet. 5:9).

“Curuangah Pathian hnenah tlulut uh. Diabol cu do uh, cule a lo tlansan ding,” (James 4:7).

Pathian ralthuam famkim hruh aw!

“Diabol-ih phiarthupnakpawl tla do in nan din theinak dingah, Pathian ralthuam cu hruk uh,” (Ef. 6:11).

“Curuangah ni ṭha lo ni ih nan khamawk theinak dingah le ziangkim nan tuah hnu khalih nan din theinak dingah, Pathian ralthuam cu la uh,” (Ef.6:13).

  1. Nangmah hrangah le midang hrangah thlacam aw!

“Thlacamnak tinkim le dilnak tinkim in ziangtik lai khalah Thlarau ah thlacam uh. Cun mithiangpawl hmuahhmuah hrangah taimaknak hmuahhmuah le dilnak hmuahhmuah thawn ngaihven uh,” (Ef.6:18).

  1. Setan in sual a lo fawrh tikah Pathian cun nehnak ding, tlansuahnak ding khua a lo khansan ti thei ringring awla, amah rinsan aw!

“Mi zo cio par khalih a thleng mi siarlo nan parah sualfawrhnak a thleng lo. Asinan Pathian cu a rinum a si. Anih cun nan tuar thei lo ding mi sualfawrhnak nan hnenih thlenter a siang lo ding. Cui sualfawrhnak nan tuar theinak dingah tlansuahnak lamzin a lo tuahsak ding,” (1Kor. 10:13).

  1. Setan cu neh mi ral a si ti kha hngilh hlah!

“Sual a tuahtu cu atir ihsin sual a rak tuahtu Diabol hnen ihsin a si. Pathian Fapa a runglangnak san cu Diabol-ih hnaṭuan ṭhiatbal dingah a si,” (1Joh. 3:8).

“Cule uktupawl le thuneitupawl cu hnukthla in khraws hmang in cupawl cu a neh ih, langsar zetin a mualphoter hai a si,” (Kol. 2:15).

  1. Khrih ah tlaitluan in nehnak na nei ti kha cing ringring aw!

“Sihmansehla cui thilpawl hmuahhmuah ah cun in duhdawtui zarah nehtupawl hnakin nehtu kan si. Ziangahtile thihnak in si seh, nunnak in si seh, vancungmipawl in si seh, uktupawl in si seh, huhampawl tlain si seh, atui canih thil ziangkhal in si seh, hmai lam canih thil um ding mi ziangkhal in si seh, thil sang ziangkhal in si seh, thil thuk ziangkhal in si seh, sersiam mi a dang ziang thil khalin Khrih Jesu kan Bawipa-ih um, Pathian duhdawtnak ihsin zianghman in in ṭhen thei lo ti ka theifiang,” (Rom.8:37-39).

“ Sikhalsehla zangfahnak hmuahhmuah ih Pathian, a sankhuk ropitnak co dingih Khrih Jesu ih a lo kotu khan reilote sung nan tuar hnuah a lo tuahṭha famkim ding ih, a lo tungding ding. A lo cakter ding ih, a lo hngetter ding. 11  A hnenah ropitnak le huham cu kumkhua in kumkhua tiang um seh. Amen,” (1Pet. 5:10,11).

Piangthar zumtu pauhpauh hi thlarau lam doawknak ah kan um a si ti hi hngilh lo ding mi a si. Ka ralpa hi fimhrawkhrawl, ṭihnung, hrohrang, mithah duh, misiatsuah duh a si ti thei ringring aw.

*****

Comments

comments

Comments

%d bloggers like this: