Rakhine Pine Ih Buainak Rehlam A Pan Lo : Thlirnak

Rakhin Pine ih Muslim le Budish pawl buainak cun rehlam a pan thei hrihlo. Kan dung tlawngkai ninga ni ihsin an buai thok ih mi 25 lenglo an thi zo. Hi biaknak pahnih hi hlanlai san ihsin rak ngaih awlo an siih tusan tiangin cui an thuanthu cu rawn zawh peh vivo in tui dinhmun tiang a ra thlennak cu a si.

Kawlram a cozah pi khal in hi tiih tui tum ih an buai veten state of emergency a puang cih nan zianghman a tidanglam cuanglo. New York sirhsan Human Rights Watch pawl cun Kawlram a cozah in nasa tawk in hmalaknak na neilo tiin Kawlram acozah pi cu a soisel.

Kawlram ah Muslims hi a nawlpi kawm in zatek 4 tluk an um ih a tambik hi Rakhine ah an um ding tisehla kan sual lo ding. Hi muslim pawl cu Rohingya pawl an si tlangpi. An ni pawl hin himnak hawlin leh umnak hmun hawlin beunak hawlah Bangladesh ah tipithuamthun ihsin khalin a thupthiar ten an tlanlut theu. Hivek ih a tlanlut an tam ve thlang ruangah Bangladesh khal in beunakhawl mi ziangmaw tizat cu a neih phah hngehnge a si.

Cui laiah United Nations cun Rohingya pawl hrang Bangladesh in umnak hmun rak tuahsak dingin a rak dil ve. Sinan mi ziang maw tizat beunakhawl  ih an pom lo mi pawl cu vakvai ih um khal an tam phah zet thlang a si.

Rohinya pawl hi umnak hmun le ram neilo an siih Kawlram acozah hin hlanthuanthu ihsin a rak hnawhmi leh a rak hmuhsuam zetmi miphun pakhat khal an si ticu santhuanthu ihsin hminsin a rak si. An neih theitawk ih an covo cu danlo ih vailut tilawng an rak si theu.

Hivek dinhmun a si ruangah tulai santhar minung covo lam humhual pawl cun tui tum ih an buainakah Kawlram acozah khal a soisel zet ih hivek ih a ramsungih miphun pakhat leh sakhuanak ruangih buainak na Menlo ih a suah hi a rampi acozah in a miphun tlangpar mipawl a kilhim tawklo a si tiin an rak soisel zet.

Rakhine ih um Rohingya lo khalin acozah in Rohingya pawl a duhduh ih a hmuhsuamnak ruangah ziangmaw tizat an rak tel ngah ve. Hivek ih buainak acozah lak leh an sakhuanak ih buainak a si ruangah rehlam cu pan thei lo in a luar vivo ih ziangvek tiang an thleng vivo ding ti cu theih a si hrih lo.

Hi thlirnak leh thuthang hi thuthang dangdang sirhsan hmangih kawm khawm a siih CT Administrator Van Bawi Lian ih ngan sawng mi a si.

(Visited 52 times, 1 visits today)

Comments

comments

Comments

%d bloggers like this: