Rah dingin Hngettek Hleuh

September 15
Zarhte Ni

Rah dingin Hngettek Hleuh

Bible Siar Ding: Johan 15:1-6

Ka sungih rah a rah lomi hnge pawl cu a tan ttheh ih a rahmi hnge kha a thiannak dingah le rah tam sinsin a rah theinak dingah a hnge ttha lo pawl kha a tan sak. – Johan 15:2

 

A harhdammi le rah ttha tampi a rah theitu thingkung pawl khi ttha teih zingziatmi le a hngettek ttha lomi pawl thianfai sakmi pawl an si ringring. Cumi in kan hrangah sullam a nei ringring lo men ding nain a caancaan ahcun mal tete cu a ttul ve ding. Asinan hngettek hleuh (pruning) le vaattan (trimming) cu an bang awk cekci lo.

Thingkung asilole hawikung kan vaat (trimming) tikah khuimi hngettekbik hi a dang hnaihnoktu a si ti’n kan zohfel kher lo ih ka sattan men ttheu. Sikhalsehla thingkung hngettek hleuh (pruning) tuahtu cun thiamnak (skill) a neih a ttul. Khuimi hngettek kan tan sak asile khuimi hngettek in rah ttha tampi a rah thei ding timi theithiam a ttul.

A thiamzetmi hngettek hleuhtu cun a thimi le a ttangkai lomi hnge pawl a thliadang thiam. Rah a rah lotu ding hnge pawl kha a thianfai sak. Cutikah rah a rah dingmi hngettek pawl in thingkung tawhram ih a dawkmi tidai le dawm pawl kuat ngah ko in a tuah sak thei. Cuti’n thingkung in rah ttha tampi a rahsuah thei a si.

Zumtu pawl tla Pathian hrangah rah tampi kan rah tikah, Bawipa cun in hnongin in hlonhlo men lo ding. Rah ttha kan rah sinsin theinak dingah kan mizia ttha lo pawl kha in rem sakin in hlonsak ttheu a si. Cumi cu tuar a har in a naa theizet ttheu. Pathian in rah ttha kan rah theinak dingah kan nunnak ihsin minung maw, thilri maw, mizia maw in laak sakih in hlon sak ttheu a si. Ziangtiklai caan khal ah, kan hrangih a hmuitinmi cu rah tampi a rahmi nunnak tlamtling neitu kan si theinak dingah a si.

Kan Bawipa, Hmuan neitu in kan hngettek a hleuh tikah kan aukio in kan phunzai thei, asilole lungthozet in rah ttha kan rah theinak dingah a si, ti’n kan tuar cuahco thei.

Vancung ih a um kan Pa, ka nunnak in remsakmi parih ka phunzai ttheumi in ngaithiam hram aw.
Na hnenah thathozet ih tlulut thei dingin in bawm aw, cuti’n rah tampi ka rah thei ding.

Ka nunnak khuimi zawn ah Bawipa ih remtthat ka ttul?
Nun remnak ah ka phunzai pang maw?
Ziangti’n si ka nunremnak ah ka tel ve thei ding?

@Pennington

(Visited 25 times, 1 visits today)

Comments

comments

Comments

%d bloggers like this: