Raaldonak ih Thabangnak

September 11
Tlawngkai Nihnih

Raaldonak ih Thabangnak

Bible Siar Ding: 2 Samuel 22:1-33

Pathian cu kan beunak a hngetmi raalhruang a si; Amah in kan lamzin a tluangter. – 2 Samuel 22:33

A caancaan ah nunnak cu raaldonak thawn tla a bang awk zik. Zaan kan it tlai deuh caan ah a thaizing zing teih thawh ding khi raaldo ding vekin a har ttuitto zik ttheu. Kan fanau pawl tlawngkai dingih thlah phah le kan hnattuannak hmun ah tikcu khel ih thlen thei ding tla mawttaw traffic jam thawn cu raaldo ding vekin a baang aw theizet.

Kan hnattuanpi asilole kan innhnen vengpa pawl in thil thupi lemlo ttukttak ttee a bangmi thu ih in buaipi le in dodal ciamco tikah raaldo vekin kan thinbaangzet thei. Suncaw ei caan ah tokham le cabuai remcaang ngah dingih cuh-awk khal khi raaldonak phunkhat si ve. Netabik ah, hnattuannak ihsin innlam tlunnak lamzin ih traffic jam khal khi innsang hnattuan ttulmi helhkamzet phah thawn raaldonak vek a si thotho.

David in raaldonak hmun ah catbaang lo ih raalring teih um ringring a ttul daan cu a thei fiang nasabik cuang ding. Samuel in Israel siangpahrang thar dingah hriakculh zomi si hmansehla, Siangpahrang Saul ih thah tumnak in himnak le luatnak ngah thei dingin raaldonak hmun ah a malbik kum hra lenglo lai cu tlan le zuang in a um.

David hrangah Pathian siar lo relhnak ding raalhruang khui hmun hman ah a nei lo. Asinan David hrang ahcun beunak ding Pathian a neih cu a tawk emem. Pathian thla hnuai hnakin himnak a ngah theinak ding hmun dang khui hmanah a um nawn lo.

Pathian cu tuni khal ah A minung pawl kan hrangah himnak raalhruang a si ringring ko. A baan tha pawl cu an cak, an hngetkhoh ih ziangvek raallian hman ttih ding um loin in humhim thei a si. Leilung tlun ih raalhruang sakmi tthabik ziangvek khal khi Bawipa hnakin Pathian ih fahniang pawl hrang ahcun beunak tlak raalhruang ttha an si thei lo.

Bawipa Pathian, ka himnak raalhruang Na si ringring ruangah ka lung a awi.
Na humhimnak kulh sungah hnangam te’n cawl thei dingin in bawm aw.

Ttihphannak ka ton tikah khui hmun ah ka tlan hmaisabik ttheu?
Pathian in ka himnak hmun tthabik cu Amah a si zia ziangti’n a langter?

@Pennington

(Visited 24 times, 1 visits today)

Comments

comments

Comments

%d bloggers like this: