Ra Kir Saal Aw

September 29

Tlawngkai Nithum

Ra Kir Saal Aw

Siar:

Hosea 14

An parah ka thin a heng nawn lo ding.     – Hosea 14:4

Kumkhat Sung Baibal:

–   Isaiah 7-8

–   Efesa 2

Judah mi pawl an tlukbah ih an dungtolh tikah Pathian in ziangtluk a thin an natter zia Hosea hnen ihsin theihter hngai a duh. Curuangah Hosea cabu hmailam kan siar tikah zoh rem lomi thuanthu lamdang kan hmu. Pathian in profet cu a taksa pum a zuar awmi Gomer timi nunau hlawhhlang cu tthit a fial. Cuti cun rintlak lo nupi ih rintlak pasal a simi profet cun thlaraulam ah Judah pawl ih rintlak lo sinak in Pathian ih thinlung a natter zia a tep ngah.

A cabu cemnaklam ah Hosea in fiangte’n a nganmi cu Judah mi pawl in ziangtluk a thin an natter hmanah Pathian cun, “Ka minung pawl cu ka hnenah ka kirter ding, ka thinlung ngaingai in ka duhdawt hngai ding. An parah ka thin a heng nawn lo… Keimai’ humhimnak hnuai ah an um saal ding,” (Hos.14:4-7) a ti.

Pathian dungtuntu ih nunnak cu mawhnak le diriam lonak in hminsin a si ttheu. Sual nunzia sungah a tluktu zumtu piangthar cun Pathian hnenah thlaraulam ih rintlak lo sinak hrangah man pek a ttul kha thukzet in a thei.

Zaangfahnak Pathian in Israel mi pawl sual ngaidamnak le hlawhtlinnak a pek saal vekin tuih sun ni khalah thinlung takin sualsir aw ngaingaitu pawl cu an nunnak a rem ttha saal (1John 1:9). Hloh cih lantanak ding na hril pang maw? Atu ra kir saal aw. Na sualnak sir aw awla tuih sun ah Bawipa thawn pehtlaihnak le remtthat saalnak ding hawl aw.    – Dennis Fisher

Pathian na dodal ih A hnen in na tlan ahcun,

Na theihmi cu a dik,

A hnenah kir aw; A lo ngaithiam ding,

A ngaithiamnak in a lo hngak.    – Sper

Pathian thawn tharthawh dingah a tlaituk ti a um lo.

(Visited 33 times, 1 visits today)

Comments

comments

Comments

%d bloggers like this: